নতুন দিল্লী
বৃহস্পতিবাৰে পুৱা বলীউডৰ প্ৰবীণ অভিনেতা নানা পাটেকাৰৰ মৃত্যু হয়। মৃত্যুৰ সময়ত তেওঁৰ বয়স আছিল ৭৫ বছৰ। মণিপাল হাস্পতালে তেওঁৰ মৃত্যুৰ তথ্য নিশ্চিত কৰে৷
মণিপাল হাস্পতালৰ অংক’লজী বিভাগৰ মুৰব্বী ডাঃ শেখৰ ছালকাৰে এটা সংবাদ সংস্থাক জনোৱা মতে, হিন্দী আৰু মাৰাঠী চিনেমাত শক্তিশালী অভিনয়ৰ বাবে পৰিচিত অভিনেতাগৰাকীৰ বৃহস্পতিবাৰে পুৱা ৫:২০ বজাত নিজৰ ঘৰত হৃদযন্ত্ৰৰ ক্ৰিয়া বন্ধ হৈ মৃত্যু হয়। তেওঁৰ মৰণোত্তৰ পৰীক্ষা কৰা হ’ব।
গোৱাৰ মণিপাল হাস্পতালে আনুষ্ঠানিকভাৱে নিশ্চিত কৰিছে যে, অভিনেতাজনক গোৱাৰ ড’না প’লাৰ ঘৰত অচেতন অৱস্থাত উদ্ধাৰ কৰা হয় আৰু লগে লগে তেওঁক চিকিৎসালয়লৈ অনা হয়৷ চিকিৎসালয়ত উপস্থিত হোৱাৰ পাছতেই চিকিৎসকে তেওঁক মৃত ঘোষণা কৰে৷
১৯৫১ চনৰ ১ জানুৱাৰীত জন্মগ্ৰহণ কৰা নানা নামেৰে পৰিচিত বিশ্বনাথ পাটেকাৰ হিন্দী আৰু মাৰাঠী চিনেমাৰ অন্যতম সন্মানীয় অভিনেতা হিচাপে পৰিগণিত হয়। ৰূপালী পৰ্দাত শক্তিশালী উপস্থিতি আৰু অনন্য সংলাপ প্ৰদানৰ বাবে পৰিচিত নানাই গুৰুতৰ, আৱেগিক আৰু নেতিবাচক ভূমিকাত সমান গভীৰতা আনিব পাৰিছিল।
১৯৭৮ চনত ‘গমন’ ছবিৰ জৰিয়তে হিন্দী চিনেমাত পদাপৰ্ণ কৰা নানাই ক্ৰমান্বয়ে ‘ছালাম বম্বে!’ আৰু ‘পৰিন্দা’ দৰে চিনেমাৰ জৰিয়তে নিজৰ সুকীয়া পৰিচয় বনাবলৈ সক্ষম হয়৷ ‘পৰিন্দা’ত তেওঁৰ অভিনয়ৰ জৰিয়তে বহু প্ৰশংসা লাভ কৰিছিল আৰু তেওঁৰ কেৰিয়াৰৰ এক টাৰ্নিং পইণ্ট হিচাপে প্ৰমাণিত হৈছিল।
অংগাৰ, তিৰংগা, ক্ৰান্তিবীৰ, অগ্নি সাক্ষী, খামোশী: দ্য মিউজিকেল, যশৱন্ত, অৱ তক ছপ্পন, অপহৰণ, ৰাজনীতি আদি ছবিত তেওঁ স্মৰণীয় অভিনয় কৰিছিল । তেওঁৰ চৰিত্ৰবোৰ প্ৰায়ে শক্তিশালী আৰু সুকীয়া সংলাপ প্ৰদানৰ স্বকীয় পদ্ধতিৰ বাবে জনাজাত আছিল।
মাৰাঠী চিনেমা আৰু থিয়েটাৰৰ লগতো যথেষ্ট জড়িত আছিল। ১৯৯১ চনত তেওঁ পৰিচালনা আৰু অভিনয় কৰা প্ৰহাৰ: দ্য ফাইনেল এটেক ছবিখনৰ জৰিয়তে চলচ্চিত্ৰ নিৰ্মাণৰ ক্ষেত্ৰখনত প্ৰৱেশ কৰে। তেওঁ হিন্দী আৰু মাৰাঠী প্ৰকল্পৰ মাজত পৰ্যায়ক্ৰমে কাম কৰি আহিছে।
নানা গভীৰ আৰু শক্তিশালী চৰিত্ৰৰ বাবে বেছিকৈ পৰিচিত আছিল যদিও তেওঁ ‘ৱেলকাম’ ফ্ৰেঞ্চাইজিত নিজৰ কমিক দিশটোও দেখুৱাইছিল। ‘ৱেলকাম’ত তেওঁৰ উদয় শ্বেট্টীৰ চৰিত্ৰই বিপুল জনপ্ৰিয়তা লাভ কৰাৰ লগতে তেওঁৰ কৰ্মৰাজিক নৱ প্ৰজন্মৰ দৰ্শকৰ সৈতে পৰিচয় কৰাই দিছিল। চিনেমালৈ নানাৰ অৱদানক কেইবাটাও ডাঙৰ সন্মানেৰে স্বীকৃতি দিয়া হয়। চিনেমা আৰু কলাক্ষেত্ৰলৈ আগবঢ়োৱা অৱদানৰ বাবে তেওঁ তিনিটাকৈ ৰাষ্ট্ৰীয় চলচ্চিত্ৰ বঁটা লাভ কৰাৰ লগতে ২০১৩ চনত পদ্মশ্ৰী বঁটা লাভ কৰে।
চলচিত্ৰৰ উপৰিও নানা বিভিন্ন সামাজিক কামৰ লগত জড়িত হোৱাৰ বাবেও পৰিচিত আছিল। নাম ফাউণ্ডেচনৰ জৰিয়তে তেওঁ কৃষক আৰু পৰিয়ালক সহায় কৰিছিল; তেওঁ অভিনেতা মাকাৰন্দ আনাছপুৰৰ সৈতে এই ফাউণ্ডেশ্যনটো সহ-প্ৰতিষ্ঠা কৰিছিল। ভাৰতীয় চিনেমাৰ অন্যতম চিনাকি মুখ হোৱাৰ পিছতো নানাই নিজৰ ব্যক্তিগত জীৱনটোক বহুলাংশে চৰ্চাৰ পৰা আঁতৰাই ৰাখিছিল।
কেইবাটাও দশকজুৰি চলি থকা তেওঁৰ কেৰিয়াৰত স্মৰণীয় চৰিত্ৰ, শক্তিশালী অভিনয় আৰু এক সুকীয়া উপস্থিতিয়ে তেওঁক সমসাময়িকসকলৰ পৰা পৃথক কৰি তুলিছিল।
.webp "ভাৰতৰ কনছুলেট জেনেৰেলত অনুষ্ঠিত এক অনুষ্ঠানত ৰাষ্ট্ৰদূত লক্ষ্মী মুৰ্দেশ্বৰ পুৰী")
