নতুন দিল্লী
দিল্লী চৰকাৰৰ এক প্ৰতিবেদনত কোৱা হৈছে যে যোৱা দুটা দশকত ২৫ ৰ পৰা ৪৪ বছৰ বয়সৰ ভিতৰত যক্ষ্মা ৰোগত আক্ৰান্ত হৈ মৃত্যু হোৱা লোকৰ সংখ্যা সৰ্বাধিক।
২০০৫ৰ পৰা ২০২৪লৈ বিশ্লেষণ কৰা তথ্য অনুসৰি, এই সময়ছোৱাত ৬৫,৯৮৫জন যক্ষ্মা ৰোগীৰ মৃত্যু হৈছে। ইয়াৰ ভিতৰত ২০২৪ চনত সৰ্বাধিক ৫,০৯৩ জনৰ মৃত্যু হৈছে। বিগত ২০ বছৰৰ ভিতৰত ২০০৭ চনত সৰ্বাধিক ২,৫১৬ জন লোকৰ মৃত্যু হৈছিল।
২৫-৪৪ বছৰ বয়সৰ মুঠ ২১,০৯০জন যক্ষ্মা ৰোগীৰ মৃত্যু হৈছে হাস্পতাল আৰু অন্যান্য প্ৰতিষ্ঠানত, যিটো এই বয়সৰ শ্ৰেণীক সৰ্বাধিক প্ৰভাৱিত কৰিছে। ইয়াৰে প্ৰায় ৬৭ শতাংশ পুৰুষ অৰ্থাৎ ১৪,২২২ গৰাকী আৰু বাকী ৬,৮৬৮ গৰাকী মহিলা আছিল।
ইয়াৰ পিছতে আছে ৪৫-৬৪ বছৰ বয়সৰ লোক, য'ত মুঠ ২০,৮৬২জনৰ মৃত্যু পঞ্জীয়ন কৰা হৈছে। এই বয়সৰ পুৰুষৰ মৃত্যুৰ হাৰ ৩৬ শতাংশতকৈও অধিক। তথ্য অনুসৰি, ৪৫-৬৪ বছৰ বয়সৰ পুৰুষৰ ভিতৰত টিবিৰ প্ৰাদুৰ্ভাৱ একে বয়সৰ মহিলাৰ তুলনাত প্ৰায় তিনিগুণ বেছি।
বয়সভিত্তিক প্ৰৱণতা অনুসৰি, ২৫-৪৪ বছৰ বয়সৰ পিছত সৰ্বাধিক প্ৰভাৱিত গোট হ'ল ৪৫-৬৪ আৰু ১৫-২৪ বছৰ বয়সৰ লোকসকল।
প্ৰতিষ্ঠানভিত্তিক মৃত্যুৰ হাৰ প্ৰায় ৮০ শতাংশৰ পৰা ৯১ শতাংশৰ ভিতৰত ক্ৰমাগতভাৱে মুঠ যক্ষ্মাজনিত মৃত্যুৰ এক বৃহৎ অংশক সামৰি লৈছে। কেৱল ২০২৪ চনত ৪,৪১৬ টা প্ৰতিষ্ঠানত মৃত্যু হৈছে, ২০০৭ চনত এই সংখ্যা আছিল ২,০১৮ টা।
১৪ বছৰ বা তাতকৈ কম বয়সৰ শিশুৰ মৃত্যুৰ ভিতৰত ৪,৮১২টা প্ৰতিষ্ঠানভিত্তিক আৰু ৬৫ বছৰ বা তাতকৈ অধিক বয়সৰ লোকৰ মৃত্যুৰ সংখ্যা আছিল ৯,৩৪৮টা।
মহিলাসকলৰ ক্ষেত্ৰত, ২৫-৪৪ বছৰ বয়সৰ ভিতৰত যক্ষ্মা ৰোগত আক্ৰান্ত হৈ মৃত্যু হোৱা লোকৰ সংখ্যা প্ৰায় ৩০ শতাংশ, যিটোৱে যুৱ আৰু মধ্যবয়সীয়া মহিলাসকলৰ ওপৰত ইয়াৰ প্ৰভাৱকে দাঙি ধৰে।
PTIৰ সৈতে হোৱা বাৰ্তালাপত নেচনেল ইনষ্টিটিউট অৱ টিউবাৰকুল'ছিছ এণ্ড ৰেছপিৰেটৰী ডিজিজৰ চিকিৎসক ডাঃ মিত ঘোনিয়াই কয় যে অপুষ্টি আৰু ৰক্তহীনতাই মহিলাৰ যক্ষ্মাজনিত মৃত্যুৰ ক্ষেত্ৰত জটিলতা সৃষ্টি কৰে আৰু নিম্ন সামাজিক-অৰ্থনৈতিক স্তৰৰ মহিলাসকল ইয়াৰ দ্বাৰা অধিক আক্ৰান্ত হয়।
তেওঁ কয় যে ঋতুস্ৰাৱৰ ফলত হোৱা এনিমিয়াৰ দৰে সমস্যাই ৰোগীৰ সামগ্ৰিক স্বাস্থ্যৰ ওপৰত প্ৰভাৱ পেলায়, যাৰ ফলত ৰোগ প্ৰতিৰোধ ক্ষমতা হ্ৰাস পায় আৰু শেষত মৃত্যুৰ আশংকা বৃদ্ধি পায়।
চিকিৎসকসকলৰ মতে, মাল্টি-ড্ৰাগ ৰেজিষ্টেণ্ট টিউবাৰকুলছিছ (এমডিআৰ-টিবি) ৰ ঘটনা উদ্বেগজনক হাৰত বৃদ্ধি পাইছে, যাৰ ফলত মৃত্যুৰ সংখ্যাও বৃদ্ধি পাইছে।
ডাঃ ঘোনিয়াই কয় যে এমডিআৰ-টিবিৰ চিকিৎসা অতিশয় কঠিন, বিশেষকৈ যেতিয়া ৰোগীৰ একাধিক ৰোগ থাকে। তুলনামূলকভাৱে, ঔষধেৰে সংবেদনশীল যক্ষ্মা নিৰাময় কৰা সহজ।
তেওঁ কয় যে বায়ু প্ৰদূষণে এই ৰোগক অধিক জটিল কৰি তোলে। বিশেষকৈ যিসকলৰ ৰোগ প্ৰতিৰোধ ক্ষমতা দুৰ্বল, শ্বাস-প্ৰশ্বাস দুৰ্বল আৰু বহু ৰোগ আছে, তেওঁলোকৰ বাবে সমস্যা আৰু বেছি হয়।
