গুৱাহাটী
মৰিগাঁও জিলাত প্ৰস্তাৱিত প্ৰতিৰক্ষা উদ্যানে দেশৰ পূব সীমান্তৰ কাষলৈ অস্ত্ৰ নিৰ্মাণৰ ব্যৱস্থা লৈ অনাৰ লগতে দক্ষ যুৱক-যুৱতীসকলৰ বাবে কৰ্মসংস্থাপনৰ সুযোগ সৃষ্টি কৰিব বুলি সোমবাৰে মুখ্যমন্ত্ৰী হিমন্ত বিশ্ব শৰ্মাই কয়।
মধ্য অসমৰ জিলাখনত স্থাপন কৰিবলৈ প্ৰস্তাৱ কৰা এই প্ৰকল্পৰ কথা উল্লেখ কৰি সামাজিক মাধ্যমৰ এটা পোষ্টত শৰ্মাই কয়, “ভাৰতৰ সুৰক্ষাৰ বাবে সমৰ্পিতঃ প্ৰতিৰক্ষা উদ্যান, নেলী, অসম।”
তেওঁ লগতে কয়, “আমাৰ পৰিকল্পিত প্ৰতিৰক্ষা উদ্যানে অস্ত্ৰ নিৰ্মাণৰ ব্যৱস্থা আমাৰ পূব সীমান্তৰ কাষলৈ লৈ আনিব। ইয়াৰ ফলত যোগান পথৰ দৈৰ্ঘ্য হ্ৰাস পাব, অস্ত্ৰ-সামগ্ৰীৰ মজুত অধিক দ্ৰুতগতিত পুনৰ পূৰণ কৰিব পৰা যাব আৰু আমাৰ যুৱক-যুৱতীসকলৰ বাবে দক্ষতাভিত্তিক কৰ্মসংস্থাপনৰ সৃষ্টি হ’ব।”
ৰাজ্যৰ প্ৰথমখন প্ৰতিৰক্ষা উদ্যান স্থাপনৰ বাবে নেলীত প্ৰায় ১,৯৮৪ একৰ ভূমি আবণ্টনৰ প্ৰস্তাৱত ৰাজ্যিক কেবিনেটে ৩ নৱেম্বৰত অনুমোদন জনায়।
মুখ্যমন্ত্ৰীয়ে পোষ্টটোৰ সৈতে শ্বেয়াৰ কৰা এটা চুটি ভিডিঅ’ত কোৱা হয় যে ৰাজ্যখন “ক্ষেপণাস্ত্ৰৰ গতিত” আগবাঢ়িছে আৰু পৰৱৰ্তী বৃহৎ পদক্ষেপ হ’ব প্ৰতিৰক্ষা সামগ্ৰী নিৰ্মাণ।
ভিডিঅ’টোত কোৱা হয়, “আমি ভাৰতৰ প্ৰহৰী হৈ থিয় দি আহিছোঁ; এতিয়া আমি ভাৰতৰ বাবে নিৰ্মাণ কৰিম।”
২০২৪ চনত শৰ্মাই ৰাজ্যখনত এটা প্ৰতিৰক্ষা কৰিডৰ স্থাপনৰ প্ৰস্তাৱ প্ৰতিৰক্ষা মন্ত্ৰী ৰাজনাথ সিঙৰ ওচৰত উত্থাপন কৰিছিল।
তেওঁ তেতিয়া কৈছিল যে অসমৰ প্ৰস্তাৱটো “বিবেচনাৰ এক অগ্ৰসৰ পৰ্যায়ত আছে, কিন্তু বিষয়টো সংবেদনশীল হোৱা বাবে কিছু সময় লাগিব পাৰে।”
মুখ্যমন্ত্ৰীৰ কাৰ্যালয়ে জাৰি কৰা এক বিবৃতিত কোৱা হয় যে প্ৰকল্পটোৰ উন্নয়নৰ বাবে উদ্যোগ বিভাগক ভূমি আবণ্টন দিয়া হ’ব।
বিবৃতিটোত কোৱা হয় যে দেশৰ কেইবাটাও অঞ্চল প্ৰতিৰক্ষা সামগ্ৰী নিৰ্মাণৰ প্ৰধান কেন্দ্ৰ হিচাপে গঢ় লৈ উঠিছে যদিও অসম দীৰ্ঘদিন ধৰি এই দ্ৰুতগতিত সম্প্ৰসাৰিত খণ্ডটোৰ বাহিৰত ৰৈ গৈছিল।
‘আত্মনিৰ্ভৰ ভাৰত’ৰ দৃষ্টিভংগীৰ সৈতে সংগতি ৰাখি প্ৰস্তাৱিত প্ৰতিৰক্ষা উদ্যানে এই দীৰ্ঘদিনীয়া ব্যৱধান দূৰ কৰাৰ লগতে ৰাজ্যখনৰ ঔদ্যোগিক বিকাশৰ নতুন পথ মুকলি কৰিব বুলি আশা কৰা হৈছে, মুখ্যমন্ত্ৰীৰ কাৰ্যালয়ে কয়।
বিবৃতিটোত লগতে কোৱা হয় যে আগশাৰীৰ দেশীয় আৰু আন্তঃৰাষ্ট্ৰীয় বিনিয়োগকাৰীক আকৰ্ষণ কৰিবলৈ অসমৰ ক্ৰমবৰ্ধমান ঔদ্যোগিক সম্ভাৱনা আৰু বিনিয়োগৰ সুযোগসমূহ দাঙি ধৰাৰ উদ্দেশ্যে ৰাজ্য চৰকাৰে শীঘ্ৰেই ৰোডশ্ব’ আয়োজন কৰাৰ লগতে এলানি প্ৰচাৰমূলক পদক্ষেপ গ্ৰহণ কৰিব।
ইয়াত আৰু কোৱা হয় যে ৰাজ্য চৰকাৰে ইতিমধ্যে ২০২৫ চনৰ ২৩ ফেব্ৰুৱাৰীত ‘অসম এৰ’স্পেচ আৰু প্ৰতিৰক্ষা সামগ্ৰী নিৰ্মাণ নীতি, ২০২৫’ অধিসূচিত কৰিছে।
চৰকাৰী ৰাজপত্ৰত প্ৰকাশৰ তাৰিখৰ পৰা পাঁচ বছৰৰ বাবে কাৰ্যকৰী এই নীতিয়ে বহুতো কৌশলগত খণ্ড সামৰি লৈছে। ইয়াৰ ভিতৰত আছে বিমান নিৰ্মাণ, উন্নত প্ৰতিৰক্ষা সঁজুলি, লঘু অস্ত্ৰ আৰু গোলাবাৰুদ, মানৱবিহীন আকাশী যান (UAV) আৰু ড্ৰোন, বিমানৰ বৈদ্যুতিন ব্যৱস্থা (avionics) আৰু ছাইমুলেচন ব্যৱস্থা, ৰক্ষণাবেক্ষণ, মেৰামতি আৰু সম্পূৰ্ণ সংস্কাৰ (MRO) সেৱা, প্ৰতিৰক্ষা-সম্পৰ্কীয় গৱেষণা আৰু উন্নয়ন, লগতে প্ৰতিৰক্ষা খণ্ডৰ ষ্টাৰ্টআপ আৰু অতি ক্ষুদ্ৰ, ক্ষুদ্ৰ আৰু মজলীয়া উদ্যোগ (MSME)।
‘অসম এৰ’স্পেচ আৰু প্ৰতিৰক্ষা সামগ্ৰী নিৰ্মাণ নীতি, ২০২৫’ আৰু প্ৰস্তাৱিত প্ৰতিৰক্ষা উদ্যানে একেলগে ৰাজ্যখনলৈ আগশাৰীৰ এৰ’স্পেচ আৰু প্ৰতিৰক্ষা কোম্পানীসমূহক আকৰ্ষণ কৰাৰ বাবে এক শক্তিশালী ভেটি গঢ়ি তুলিব বুলিও মুখ্যমন্ত্ৰীৰ কাৰ্যালয়ৰ বিবৃতিটোত উল্লেখ কৰা হয়।
