নতুন দিল্লী
পোহৰৰ উৎসৱ দীপাৱলীৰ পৱিত্ৰ ক্ষণত দেশৰ নিৰাপত্তাৰক্ষীসকলৰ মাজত উপস্থিত হৈ এক অনন্য নিদৰ্শন দাঙি ধৰিলে প্ৰধানমন্ত্ৰী নৰেন্দ্ৰ মোদীয়ে। ছত্তীশগড়ৰ বস্তৰৰ গভীৰ অৰণ্যত কৰ্তব্যৰত সেনা জোৱানসকলৰ সৈতে এইবাৰৰ দীপাৱলী উদ্যাপন কৰে প্ৰধানমন্ত্ৰীগৰাকীয়ে। এই বিশেষ ক্ষণত জোৱানসকলক সম্বোধন কৰি তেওঁ কয় যে, এসময়ত নক্সালবাদীৰ সন্ত্ৰাসৰ ক’লীয়া ডাৱৰে আৱৰি ৰখা বস্তৰত এতিয়া উন্নয়ন আৰু শান্তিৰ এক নতুন প্ৰভাতৰ সূচনা হৈছে। জোৱানসকলৰ অহোপুৰুষাৰ্থ, ত্যাগ আৰু অদম্য সাহসৰ ফলশ্ৰুতিতেই অঞ্চলটোৰ পৰা নক্সালবাদৰ সন্ত্ৰাসৰ অৱসান ঘটিছে বুলি উল্লেখ কৰি প্ৰধানমন্ত্ৰীয়ে দেশক নক্সালমুক্ত কৰাৰ বাবে সমগ্ৰ দেশবাসীৰ হৈ নিৰাপত্তাৰক্ষীসকললৈ গভীৰ কৃতজ্ঞতা জ্ঞাপন কৰে।
প্ৰধানমন্ত্ৰী মোদীয়ে এই বৰ্ষৰ দীপাৱলীক এক ‘ঐতিহাসিক আৰু ব্যতিক্ৰমী’ উৎসৱ হিচাপে আখ্যা দিয়ে। তেওঁ কয়, “২০২৬ চনৰ এই দীপাৱলী সঁচাকৈয়ে এক বিশেষ তাৎপৰ্য বহন কৰিছে। সুদীৰ্ঘ ৪০-৫০ বছৰৰ সংগ্ৰামৰ অন্তত আপোনালোকৰ বাবে এনে এক দীপাৱলী আহিছে, যি সময়ত দেশে নক্সালবাদ আৰু মাওবাদী সন্ত্ৰাসৰ বিৰুদ্ধে চলা দশকজোৰা যুঁজত চূড়ান্ত বিজয় সাব্যস্ত কৰিছে।” তেওঁ গৌৰৱেৰে উল্লেখ কৰে যে দেশৰ প্ৰতিখন জিলাই নক্সালবাদৰ কৱলৰ পৰা মুক্ত হোৱাৰ পিছত এইখনেই হৈছে প্ৰথমখন দীপাৱলী। কোটি কোটি ভাৰতীয়ই নক্সালবাদৰ যি ভয়াবহতা, তাক পৰাস্ত কৰিবলৈ সক্ষম হৈছে আৰু এই অসাধাৰণ তথা বিৰল সফলতাৰ মূলতেই হৈছে নিৰাপত্তাৰক্ষীসকলৰ অতুলনীয় অৱদান।
উৎসৱৰ তাৎপৰ্য বাখ্যা কৰি প্ৰধানমন্ত্ৰীয়ে কয় যে দীপাৱলী হৈছে পৰিয়াল আৰু আপোনজনৰ সৈতে মিলিত হৈ আনন্দ ভাগ-বতৰা কৰাৰ এক পৱিত্ৰ ক্ষণ। সমগ্ৰ দেশ তথা বিশ্বৰ বিভিন্ন প্ৰান্তত বসবাস কৰা কোটি কোটি ভাৰতীয়ই এই উৎসৱ উদ্যাপন কৰিবলৈ দূৰ-দূৰণিৰ পৰা নিজৰ ঘৰলৈ উভতি আহিছে। জোৱানসকলৰ সৈতে থকা তেওঁৰ আত্মিক সম্পৰ্কৰ কথা ব্যক্ত কৰি তেওঁ কয়, “ময়ো আজি আপোনালোকৰ মাজত, অৰ্থাৎ মোৰ পৰিয়ালৰ সৈতে দীপাৱলী উদ্যাপন কৰিবলৈ আহিছোঁ। দেশৰ সীমান্তত হওক বা দেশৰ অভ্যন্তৰত, যিসকল জোৱানে ৰাষ্ট্ৰক সুৰক্ষা প্ৰদান কৰি আছে, তেওঁলোক সকলোৱেই মোৰ পৰিয়ালৰ অভিন্ন সদস্য।” এইখিনিতে তেওঁ দেশৰ ১৪০ কোটি জনতাৰ হৈ জোৱানসকলৰ চৰম ত্যাগ, সমৰ্পণ আৰু নিস্বাৰ্থ সেৱাৰ বাবে সশ্ৰদ্ধ প্ৰণাম জনায়।
ৰাষ্ট্ৰ এখনৰ সুৰক্ষা ব্যৱস্থাত আভ্যন্তৰীণ নিৰাপত্তাৰ গুৰুত্বৰ ওপৰত আলোকপাত কৰি প্ৰধানমন্ত্ৰী মোদীয়ে প্ৰাচীন ভাৰতীয় দৰ্শনৰ এক উদ্ধৃতি দাঙি ধৰে। তেওঁ কয়, “আমাৰ দূৰদৰ্শী পূৰ্বপুৰুষসকলে কৈ গৈছে— ‘অভ্যন্তৰ ভয়ং ৰক্ষম, অসাৰং বাহ্যতো ভয়ম।’ অৰ্থাৎ, যদিহে এখন ৰাষ্ট্ৰৰ আভ্যন্তৰীণ নিৰাপত্তা ব্যৱস্থা শক্তিশালী আৰু সুদৃঢ় হয়, তেন্তে বাহ্যিক শত্ৰুৱে কেতিয়াও মূৰ দাঙি উঠিব নোৱাৰে। ইয়াৰ বিপৰীতে আভ্যন্তৰীণ নিৰাপত্তা দুৰ্বল হ’লেই বাহ্যিক শত্ৰুৱে সুবিধা লাভ কৰে।” সেয়েহে, সীমান্তত পহৰা দিয়া সেনাবাহিনীৰ সমানেই দেশৰ ভিতৰত কৰ্তব্যৰত নিৰাপত্তাৰক্ষীসকলৰো ভূমিকা অপৰিসীম বুলি তেওঁ উল্লেখ কৰে।
দেশৰ ঐক্য আৰু অখণ্ডতা ৰক্ষাৰ স্বাৰ্থত নিৰাপত্তাৰক্ষীসকলে কৰা অগণন ত্যাগক শ্ৰদ্ধাৰে সুঁৱৰি প্ৰধানমন্ত্ৰীয়ে কয় যে দেশবাসী তেওঁলোকৰ ওচৰত চিৰকৃতজ্ঞ। আভ্যন্তৰীণ নিৰাপত্তাৰ দায়িত্বত অহোৰাত্ৰি নিয়োজিত হৈ থকা চি আৰ পি এফ, কোব্ৰা, বি এছ এফ, আই টি বি পি, এছ এছ বি, আই আৰ বি, ৰাজ্যিক আৰক্ষী আৰু বিশেষকৈ বস্তৰ ফাইটাৰ্ছৰ দৰে বিশেষ বাহিনীৰ জোৱান তথা মহিলা যোদ্ধাসকলৰ বীৰত্বক তেওঁ শলাগ লয়। কোটি কোটি ভাৰতীয়ই এইসকল বীৰ জোৱানক লৈ সদায় গৌৰৱ অনুভৱ কৰে বুলি উল্লেখ কৰি প্ৰধানমন্ত্ৰী নৰেন্দ্ৰ মোদীয়ে ভাষণৰ অন্তত দেশৰ সীমান্তত ৰাষ্ট্ৰৰ সুৰক্ষাৰ দায়িত্বত নিয়োজিত প্ৰতিগৰাকী সেনা জোৱানলৈ দীপাৱলীৰ আন্তৰিক শুভেচ্ছা জ্ঞাপন কৰে।
