নতুন দিল্লী
শনিবাৰে আবেলিৰ এক স্বাভাৱিক বিমানযাত্ৰা মুহূৰ্তৰ ভিতৰতে পৰিণত হ'ল এক অবৰ্ণনীয় আতংক আৰু হুৱাদুৱাত। গন্তব্যস্থান আছিল লক্ষ্ণৌ, কিন্তু আকাশৰ মাজতে সংঘটিত হোৱা এক আকস্মিক ঘটনাই সমগ্ৰ বিমানখনৰ যাত্ৰী আৰু ক্ৰু মেম্বাৰসকলৰ মাজত তীব্ৰ সন্ত্ৰাসৰ সৃষ্টি কৰে। বিমানখনৰ শৌচাগাৰত উদ্ধাৰ হোৱা এখন হাতে লিখা ভাবুকিপূৰ্ণ চিঠিয়ে সমগ্ৰ পৰিস্থিতি সলনি কৰি পেলায়।
প্ৰাপ্ত তথ্য অনুসৰি, শনিবাৰে আবেলি ৫:৫০ বজাত বেংগালুৰুৰ কেম্পেগৌড়া আন্তঃৰাষ্ট্ৰীয় বিমানবন্দৰৰ পৰা লক্ষ্ণৌ অভিমুখে উৰা মাৰিছিল ইণ্ডিগ’ৰ এখন যাত্ৰীবাহী বিমানে। বিমানখনত উপস্থিত আছিল মুঠ ১৭৮ জন যাত্ৰী। উৰণৰ কিছু সময়ৰ পাছতেই এজন যাত্ৰীয়ে বিমানৰ শৌচাগাৰলৈ যাওঁতে তাত এখন ৰহস্যময় হাতে লিখা চিঠি উদ্ধাৰ কৰে।
যাত্ৰীগৰাকীয়ে উদ্ধাৰ কৰা সেই চিঠিখনত স্পষ্টভাৱে লিখা আছিল এক ভয়ংকৰ হাইজেকৰ ভাবুকি— ‘সন্ধিয়া ঠিক ৬:৩০ বজাত এই বিমানখন হাইজেক কৰা হ’ব। এই কথাটো আওকাণ কৰিলে ইয়াৰ পৰিণতি বেয়া হ’ব।’
আকাশৰ মাজতে এনে এক অপহৰণৰ ভাবুকি পত্ৰ দেখি যাত্ৰীগৰাকী আতংকিত হৈ পৰে আৰু পলম নকৰি লগে লগে বিমান পৰিচাৰিকাসকলক এই বিষয়ে অৱগত কৰে। পৰিস্থিতিৰ ভয়াৱহতা আৰু স্পৰ্শকাতৰতা গভীৰভাৱে উপলব্ধি কৰি বিমানখনৰ পাইলটে ক্ষিপ্ৰতাৰে এয়াৰ ট্ৰেফিক কণ্ট্ৰ’লৰ সৈতে জৰুৰীকালীন যোগাযোগ স্থাপন কৰে। যাত্ৰীসকলৰ নিৰাপত্তা আৰু সুৰক্ষাক সৰ্বোচ্চ অগ্ৰাধিকাৰ দি, পাইলট আৰু এটিচিয়ে বিমানখন গন্তব্যস্থান লক্ষ্ণৌলৈ নিয়াৰ পৰিৱৰ্তে মাজ আকাশৰ পৰাই পুনৰ বেংগালুৰুলৈ ঘূৰাই অনাৰ এক গুৰুত্বপূৰ্ণ সিদ্ধান্ত গ্ৰহণ কৰে। কোনো ধৰণৰ বিপদৰ আশংকা নোলোৱাকৈয়ে বিমানখন উভতাই অনা হয়।
এই খবৰ লাভ কৰাৰ লগে লগে বেংগালুৰুৰ কেম্পেগৌড়া আন্তঃৰাষ্ট্ৰীয় বিমানবন্দৰত এক অভূতপূৰ্ব চাঞ্চল্যৰ সৃষ্টি হয়। সতৰ্কতামূলক ব্যৱস্থা হিচাপে তৎক্ষণাত বিমানবন্দৰৰ টাৰ্মিনেল ১-ত সম্পূৰ্ণ জৰুৰীকালীন অৱস্থা ঘোষণা কৰা হয়।
বিমানখন বেংগালুৰুত নিৰাপদে অৱতৰণ কৰাৰ লগে লগে সুৰক্ষা বাহিনীয়ে ক্ষিপ্ৰতাৰে সকলো যাত্ৰীক নিৰাপদে বিমানৰ পৰা বাহিৰলৈ উলিয়াই আনে। তাৰ পিছতেই নিৰাপত্তাৰক্ষীয়ে সমগ্ৰ বিমানখনত তন্নতন্নকৈ তালাচী চলায়। তদন্তকাৰী বিষয়া আৰু নিৰাপত্তা সংস্থাসমূহৰ প্ৰাৰম্ভিক সন্দেহ অনুসৰি, বিমানখনত থকা যাত্ৰীসকলৰ মাজৰেই কোনোবা এজনে হয়তো উদ্দেশ্যপ্ৰণোদিতভাৱে এই ভাবুকিপূৰ্ণ চিঠিখন শৌচাগাৰত এৰি থৈ গৈছিল। বৰ্তমান এই সূত্ৰৰ ওপৰত ভিত্তি কৰিয়েই সমগ্ৰ ঘটনাটোৰ আঁৰৰ ৰহস্য ফাদিল কৰিবলৈ নিৰাপত্তাৰক্ষীয়ে যাত্ৰীসকলকো সোধা-পোছা অব্যাহত ৰাখিছে।
