গুৱাহাটী
বৃহস্পতিবাৰে অসমৰ মুখ্যমন্ত্ৰী হিমন্ত বিশ্ব শৰ্মাই আৰক্ষী জোৱানসকলৰ সেৱা আৰু ত্যাগৰ প্ৰতি শ্ৰদ্ধা জনাই কয় যে ৰাজ্যখনৰ জনসাধাৰণে শান্তিত জীৱন নিৰ্বাহ কৰিব পাৰিছে কাৰণ ইউনিফৰ্ম পৰিহিত কোনোবা নহয় কোনোবাই দিন-ৰাতি ২৪ ঘণ্টাই পহৰা দি আছে।
'অসম আৰক্ষী দিৱস' উপলক্ষে মুখ্যমন্ত্ৰীগৰাকীয়ে সাহস, সহানুভূতি আৰু কৰ্তব্যৰ প্ৰতি অটল নিষ্ঠাৰে ৰাজ্যলৈ সেৱা আগবঢ়োৱাৰ বাবে অসম আৰক্ষীৰ প্ৰতিগৰাকী বিষয়া আৰু জোৱানক অভিবাদন জনায়।
ছ’চিয়েল মিডিয়াত কৰা এটা পোষ্টত তেওঁ কয়, "অসমৰ ৰাইজ শান্তিত আছে কাৰণ ইউনিফৰ্ম পিন্ধা কোনোবাই দিনে-ৰাতিয়ে ২৪ ঘণ্টাই পহৰা দি আছে।"
আৰক্ষীৰ জোৱানসকলে আগলৈকো নিস্বাৰ্থভাৱে ৰাইজৰ সেৱা কৰি যাব আৰু ৰাজ্যখনত যাতে শান্তি আৰু নিৰাপত্তা বৰ্তি থাকে তাক নিশ্চিত কৰিব বুলি তেওঁ আশা প্ৰকাশ কৰে।
উল্লেখযোগ্য যে, অসম আৰক্ষীৰ ইতিহাস, সেৱা আৰু বীৰত্বক স্মৰণ কৰাৰ উদ্দেশ্যে প্ৰতি বছৰে ১ অক্টোবৰ তাৰিখে 'অসম আৰক্ষী দিৱস' পালন কৰা হয়।
