নতুন দিল্লী
ভাৰত আৰু নেপালৰ মাজত ৰে’ল যোগাযোগ ব্যৱস্থা অধিক উন্নত কৰাৰ উদ্দেশ্যে এক নতুন পদক্ষেপ গ্ৰহণ কৰিছে ভাৰতীয় ৰে’লৱেই। নেপালৰ জনকপুৰ ধামৰ পৰা উত্তৰ প্ৰদেশৰ অযোধ্যালৈ এখন নতুন সাপ্তাহিক ৰে’ল চলাচলৰ অনুমোদন জনাইছে ৰে’ল মন্ত্ৰালয়ে। শনিবাৰে কেন্দ্ৰীয় চৰকাৰে এই কথা ঘোষণা কৰে। অৱশ্যে নতুন ৰে’লসেৱাটোৰ বাণিজ্যিক চলাচল কেতিয়াৰ পৰা আৰম্ভ হ’ব, সেই বিষয়ে এতিয়াও আনুষ্ঠানিকভাৱে ঘোষণা কৰা হোৱা নাই।
ৰে’ল মন্ত্ৰালয়ে এই পদক্ষেপক ভাৰত আৰু নেপালৰ মাজত যোগাযোগ ব্যৱস্থা শক্তিশালী কৰাৰ ক্ষেত্ৰত এক গুৰুত্বপূৰ্ণ পদক্ষেপ হিচাপে অভিহিত কৰিছে। বিশেষকৈ ৰামায়ণৰ সৈতে জড়িত দুই ঐতিহাসিক আৰু ধৰ্মীয় স্থানক সংযোগ কৰাৰ ক্ষেত্ৰত এই ৰে’লসেৱাই বিশেষ ভূমিকা পালন কৰিব বুলি আশা কৰা হৈছে।
উল্লেখ্য যে, নেপালৰ জনকপুৰ ধামক মাতা সীতাৰ জন্মস্থান হিচাপে গণ্য কৰা হয়। আনহাতে, উত্তৰ প্ৰদেশৰ অযোধ্যা ভগৱান শ্ৰীৰামৰ জন্মস্থান হিচাপে পৰিচিত। এই দুই পৱিত্ৰ স্থানৰ মাজত পোনপটীয়া ৰে’ল যোগাযোগ স্থাপনৰ ফলত দুয়োখন দেশৰ তীৰ্থযাত্ৰী আৰু পৰ্যটকসকলে বিশেষ সুবিধা লাভ কৰিব।
ৰে’ল মন্ত্ৰালয়ে প্ৰকাশ কৰা তথ্য অনুসৰি, নতুন সাপ্তাহিক ৰে’লখনে প্ৰায় ৬০৪ কিলোমিটাৰ দূৰত্ব অতিক্ৰম কৰি জনকপুৰ ধাম আৰু অযোধ্যা কেণ্ট ৰে’ল ষ্টেচনক সংযোগ কৰিব। ৰে’লখন প্ৰতি শনিবাৰে জনকপুৰ ধামৰ পৰা আৰু প্ৰতি সোমবাৰে অযোধ্যা কেণ্টৰ পৰা যাত্ৰা আৰম্ভ কৰিব।
এই ৰে’লসেৱাই বিহাৰ আৰু উত্তৰ প্ৰদেশৰ কেইবাখনো গুৰুত্বপূৰ্ণ চহৰ সামৰি ল’ব। ৰে’লখনৰ নিৰ্ধাৰিত বাণিজ্যিক ষ্টপেজসমূহ হ’ব জয়নগৰ, মধুবনী, শিশো, সীতামঢ়ী, ৰক্সৌল, নৰকটিয়াগঞ্জ, গোৰখপুৰ, বস্তি, মনকাপুৰ আৰু অযোধ্যা ধাম। অৱশ্যে নেপালৰ ভিতৰত আন কোনো ষ্টেচনত ৰে’লখন ৰ’ব নে নাই, সেই বিষয়ে মন্ত্ৰালয়ে এতিয়ালৈকে কোনো তথ্য প্ৰকাশ কৰা নাই।
ৰে’ল মন্ত্ৰালয়ৰ মতে, এই নতুন সেৱাই দুয়োখন দেশৰ মাজত যাতায়াত অধিক সহজ আৰু সুবিধাজনক কৰি তুলিব। বিশেষকৈ ধৰ্মীয় তীৰ্থযাত্ৰা, পৰ্যটন, শিক্ষা, ব্যৱসায় আৰু পাৰিবাৰিক প্ৰয়োজনত সীমান্ত অতিক্ৰম কৰি যাতায়াত কৰা লোকসকল উপকৃত হ’ব।
ইয়াৰ উপৰি ৰামায়ণৰ সৈতে জড়িত ধৰ্মীয় আৰু ঐতিহাসিক স্থানসমূহক সামৰি পৰ্যটনৰ নতুন সম্ভাৱনা সৃষ্টি হ’ব বুলি আশা কৰা হৈছে। জনকপুৰ ধাম আৰু অযোধ্যাৰ মাজত ৰে’ল যোগাযোগ স্থাপনৰ ফলত দুয়োখন দেশৰ পৰ্যটন খণ্ডতো ইতিবাচক প্ৰভাৱ পৰাৰ সম্ভাৱনা আছে।
ভাৰত আৰু নেপালৰ মাজত দীৰ্ঘদিনীয়া সাংস্কৃতিক, ঐতিহাসিক আৰু সামাজিক সম্পৰ্ক আছে। দুয়োখন দেশৰ ধৰ্মীয় পৰম্পৰা, সাংস্কৃতিক ঐতিহ্য আৰু সীমান্তৱৰ্তী অঞ্চলৰ জনসাধাৰণৰ মাজত থকা ঘনিষ্ঠ সম্পৰ্কই এই বন্ধন অধিক সুদৃঢ় কৰি আহিছে।
ৰে’ল মন্ত্ৰালয়ে প্ৰকাশ কৰা বিবৃতিত উল্লেখ কৰা হৈছে যে, নতুন ৰে’লসেৱাই ভাৰত আৰু নেপালৰ দ্বিপাক্ষিক সহযোগিতাত এক নতুন মাত্ৰা সংযোজন কৰিব। ৰে’ল যোগাযোগৰ জৰিয়তে দুয়োখন দেশৰ জনসাধাৰণক অধিক ওচৰ চপাই অনাৰ লগতে সাংস্কৃতিক আৰু ধৰ্মীয় সম্পৰ্ক অধিক শক্তিশালী কৰাত এই পদক্ষেপে সহায় কৰিব বুলি আশা প্ৰকাশ কৰা হৈছে।
