নতুন দিল্লী
তেলেগু দেশম পাৰ্টিৰ চন্দ্ৰবাবু নাইডু তৃতীয়বাৰৰ বাবে অন্ধ্ৰ প্ৰদেশৰ মুখ্যমন্ত্ৰী হ’ব। এই সিদ্ধান্ত লয় টিডিপি, বিজেপি, আৰু জনসেনা দলৰ নেতাই।
বুধবাৰে পুৱা ১১:২৭ বজাত আনুষ্ঠানিকভাৱে মুখ্যমন্ত্ৰী হিচাপে শপত গ্ৰহণ কৰিব নাইডুৱে। বিজয়াৱদাৰ বাহিৰত গন্নাৱৰাম বিমানবন্দৰৰ সমীপৰ কেছাৰাপল্লী আই টি পাৰ্কত অনুষ্ঠিত হ’ব এই অনুষ্ঠান।
বিজেপি, জনসেনা, টিডিপিৰ পৰা বিধানসভাৰ সকলো সদস্যই নাইডুৱে ৰাজ্যখনৰ নেতৃত্ব দিব লাগে বুলি একমত প্ৰকাশ কৰিছে। এই দলসমূহৰ নেতাসকলে ৰাজ্যপাল এছ আব্দুল নাজিৰৰ সৈতে সাক্ষাৎ কৰি নতুন চৰকাৰ গঠনৰ বাবে আনুষ্ঠানিকভাৱে অনুমতি বিচাৰিব।
মঙলবাৰে সন্ধিয়াৰ ভিতৰত ৰাজ্যপালগৰাকীয়ে তেওঁলোকক চৰকাৰ গঠনৰ বাবে আমন্ত্ৰণ জনোৱাৰ সম্ভাৱনা আছে।
নাইডুৰ লগতে আন দুই এজন মন্ত্ৰীয়ে বুধবাৰে শপত গ্ৰহণ কৰাৰ সম্ভাৱনা আছে। ইয়াৰ ভিতৰত আছে টিডিপিৰ সাধাৰণ সম্পাদক নৰা লোকেশ আৰু জনসেনাৰ নেতা মনোহৰ।
