গুৱাহাটীৰ ছায়েন্স চিটীৰ উন্নয়নমূলক কাম পৰিদৰ্শন মুখ্যমন্ত্ৰী হিমন্ত বিশ্ব শৰ্মাৰ
গুৱাহাটী
মুখ্যমন্ত্ৰী হিমন্ত বিশ্ব শৰ্মাই ১০ আগষ্টত সোণাপুৰস্থিত গুৱাহাটী ছায়েন্স চিটীত চলি থকা উন্নয়নমূলক কামসমূহ পৰিদৰ্শন কৰাৰ লগতে প্ৰকল্পটোৰ পৰৱৰ্তী পৰ্যায়ৰ প্ৰস্তুতিৰো পৰ্যালোচনা কৰে।
১৫০ বিঘাতকৈ অধিক ভূমিত বিস্তৃত ছায়েন্স চিটীত চলিত বৰ্ষৰ আৰম্ভণিতে আনুষ্ঠানিকভাৱে উদ্বোধন কৰাৰ পিছতো কেইবাটাও অতিৰিক্ত উন্নয়নমূলক কাম অব্যাহত আছে। মুখ্যমন্ত্ৰীয়ে আশা প্ৰকাশ কৰে যে, সমগ্ৰ প্ৰকল্পটোৰ কাম ২০২৭ চনৰ মাৰ্চ মাহৰ ভিতৰত সম্পূৰ্ণ হ’ব।
ছায়েন্স চিটীত বিভিন্ন আন্তঃগাঁথনি আৰু দৰ্শনাৰ্থীসকলৰ বাবে প্ৰয়োজনীয় সুবিধা উন্নয়নৰ বাবে ৰাজ্য চৰকাৰে অতিৰিক্তভাৱে ১০০ কোটি টকা আগবঢ়াব বুলি মুখ্যমন্ত্ৰীয়ে ঘোষণা কৰে।
প্ৰস্তাৱিত অতিৰিক্ত সুবিধাসমূহৰ ভিতৰত ডিজিটেল পেনোৰামা, কনভেনচন চেণ্টাৰ, মিউজিকেল ফাউণ্টেইন আৰু পাৰ্কিং ব্যৱস্থাকে ধৰি বিভিন্ন আন্তঃগাঁথনি অন্তৰ্ভুক্ত আছে। ভাৰত চৰকাৰৰ সংস্কৃতি মন্ত্ৰালয় আৰু অসমৰ বিজ্ঞান আৰু প্ৰযুক্তি বিভাগে যৌথভাৱে এই প্ৰকল্পটো ৰূপায়ণ কৰি আছে।
মুখ্যমন্ত্ৰী শৰ্মাই কয় যে, ৰাজ্য চৰকাৰে গুৱাহাটী ছায়েন্স চিটীক দেশৰ অন্যতম উৎকৃষ্ট ছায়েন্স চিটী হিচাপে গঢ়ি তুলিবলৈ লক্ষ্য লৈছে। তেওঁ বিশেষকৈ বিদ্যালয় আৰু মহাবিদ্যালয়ৰ ছাত্ৰ-ছাত্ৰীসকলক ছায়েন্স চিটী পৰিদৰ্শন কৰিবলৈ উৎসাহিত কৰে।
দৰ্শনাৰ্থীসকলৰ যাতায়াত অধিক সুচল কৰাৰ বাবে গুৱাহাটী আৰু ছায়েন্স চিটীৰ মাজত অসম ৰাজ্যিক পৰিবহণ নিগম (ASTC)-ৰ এখন বিশেষ বাছ সেৱা আৰম্ভ কৰাৰ বিষয়েও ৰাজ্য চৰকাৰে চিন্তা-চৰ্চা কৰি আছে।
পৰিদৰ্শনৰ সময়ত বিজ্ঞান আৰু প্ৰযুক্তি মন্ত্ৰী কেশৱ মহন্ত, কৃষি মন্ত্ৰী পীযুষ হাজৰিকা, খাদ্য আৰু ৰাজহুৱা বিতৰণ মন্ত্ৰী কৌশিক ৰায়ৰ লগতে জ্যেষ্ঠ চৰকাৰী বিষয়াসকল উপস্থিত থাকে।
ইয়াৰ পিছত মুখ্যমন্ত্ৰীয়ে সোণাপুৰৰ কোমাৰকুছিস্থিত ‘জুবিন ক্ষেত্ৰ’ও পৰিদৰ্শন কৰে। প্ৰখ্যাত অসমীয়া গায়ক তথা শিল্পী জুবিন গাৰ্গৰ স্মৃতিত নিৰ্মাণ কৰি থকা এই স্মৃতিক্ষেত্ৰৰ চলি থকা নিৰ্মাণকাৰ্য তেওঁ পৰ্যালোচনা কৰে। এই সময়ত লোকনিৰ্মাণ বিভাগৰ বিষয়াসকল আৰু প্ৰকল্পটোৰ স্থপতিবিদ উপস্থিত আছিল।
মুখ্যমন্ত্ৰীয়ে স্মৃতিক্ষেত্ৰৰ চৌহদৰ সীমাৰ দেৱালৰ নিৰ্মাণকাৰ্য শীঘ্ৰে সম্পূৰ্ণ কৰিবলৈ সংশ্লিষ্ট কৰ্তৃপক্ষক নিৰ্দেশ দিয়ে। সীমাৰ দেৱালৰ কাম সম্পূৰ্ণ হোৱাৰ পিছতে প্ৰস্তাৱিত মুক্তমঞ্চ (Open-Air Theatre) আৰু সৌন্দৰ্যবৰ্ধনৰ কামকে ধৰি পৰৱৰ্তী কামসমূহ যাতে কোনো বিলম্ব নোহোৱাকৈ আৰম্ভ কৰিব পৰা যায়, সেই বিষয়তো তেওঁ গুৰুত্ব আৰোপ কৰে।
_(1).webp)
