গুৱাহাটী
গুৱাহাটী মহানগৰীত পুনৰ এক গা শিয়ঁৰি উঠা ঘটনাই তীব্ৰ আলোড়নৰ সৃষ্টি কৰিছে। ধাৰাপুৰৰ স্থায়ী বাসিন্দা তথা গুৱাহাটী বিশ্ববিদ্যালয়ৰ পাঁচ বছৰীয়া সংহত পাঠ্যক্ৰমৰ এগৰাকী মেধাৱী ছাত্ৰী নিমিষা ঠাকুৰীয়াৰ মৃতদেহ গড়লস্থিত এখন হোমষ্টেৰ পৰা অতি ৰহস্যজনক অৱস্থাত উদ্ধাৰ হোৱা ঘটনাই সমগ্ৰ অঞ্চলটোলৈ নমাই আনিছে শোকৰ ছাঁ।
পৰিয়ালৰ সূত্ৰই সদৰী কৰা অনুসৰি, এই ভয়ংকৰ ট্ৰেজেডীৰ আৰম্ভণি ঘটিছিল যোৱা নিশা প্ৰায় ১১ বজাত। যুৱতীগৰাকীয়ে তেওঁৰ এগৰাকী বন্ধুৰ সৈতে নিশা ঘৰৰ পৰা ওলাই গৈছিল। কিন্তু ঘৰৰ পৰা যোৱাৰ কিছু সময়ৰ পাছতেই পৰিস্থিতি এক ভয়ানক দিশলৈ ৰূপান্তৰিত হয়। নিমিষাই আতংকিত অৱস্থাত নিজ মাতৃলৈ ফোন কৰে আৰু জনায় যে লগত থকা বন্ধুজনে তেওঁৰ ওপৰত চলাইছে অবৰ্ণনীয় শাৰীৰিক নিৰ্যাতন আৰু অত্যাচাৰ।
মাতৃক এই উদ্বেগজনক আৰু মৰ্মান্তিক খবৰটো দিয়াৰ অলপ পাছতেই যুৱতীগৰাকীৰ ম’বাইল ফোনটো হঠাতে সম্পূৰ্ণৰূপে চুইচ অফ হৈ পৰে। আতংকিত হৈ পৰা পৰিয়ালৰ লোকে বাৰম্বাৰ তেওঁৰ সৈতে যোগাযোগ কৰিবলৈ অহোপুৰুষাৰ্থ চেষ্টা চলায় যদিও সকলো প্ৰচেষ্টা ব্যৰ্থ হয়।
জীয়ৰীৰ নিৰাপত্তাক লৈ দিশহাৰা হৈ পৰা পৰিয়ালটোৱে পলম নকৰি ততাতৈয়াকৈ আজাৰা আৰক্ষী থানাত উপস্থিত হৈ সমগ্ৰ ঘটনাটো সবিস্তাৰে অৱগত কৰে। পৰিয়ালৰ গুৰুতৰ অভিযোগৰ ভিত্তিত আজাৰা আৰক্ষীয়ে ক্ষিপ্ৰতাৰে অভিযান চলায় আৰু গড়লস্থিত ‘RUDREAS KITCHEN’ নামৰ হোমষ্টেখনৰ পৰা নিমিষাৰ নিথৰ দেহ উদ্ধাৰ কৰিবলৈ সক্ষম হয়। এই শোকাবহ উদ্ধাৰৰ লগে লগে যুৱতীগৰাকীৰ মৃত্যুৰ প্ৰকৃত কাৰণ আৰু আঁৰৰ ৰহস্যক লৈ এতিয়া সৰ্বত্ৰে প্ৰশ্নৰ উদয় হৈছে।
সমগ্ৰ ঘটনাটোৱে এক পৰিকল্পিত হত্যাকাণ্ড আৰু নিৰ্যাতনৰ দিশলৈ আঙুলিয়াই দিছে। আৰক্ষীয়ে এই সন্দেহক অগ্ৰাধিকাৰ দি ইতিমধ্যে এক উচ্চ পৰ্যায়ৰ তদন্ত আৰম্ভ কৰিছে। যুৱতীগৰাকীৰ সৈতে শেষবাৰলৈ একেলগে থকা সেই বন্ধুজনক বিচাৰি উলিওৱাৰ সমান্তৰালকৈ আৰক্ষীৰ দলে হোমষ্টেখনৰ পঞ্জীয়ন আৰু বৈধতা পৰীক্ষা কৰাৰ লগতে কৰ্তৃপক্ষক সোধ-পোচ অব্যাহত ৰাখিছে। ইতিমধ্যে নিমিষাৰ মৃতদেহটো মৰণোত্তৰ পৰীক্ষাৰ বাবে গুৱাহাটী চিকিৎসা মহাবিদ্যালয় হাস্পতাললৈ প্ৰেৰণ কৰা হৈছে। মৰণোত্তৰ পৰীক্ষাৰ প্ৰতিবেদনে এই জঘন্য কাণ্ডৰ বহু নজনা তথ্য পোহৰলৈ আনিব বুলি আশা কৰা হৈছে।
