গুৱাহাটী
টোল গেটত দীঘলীয়া শাৰীৰ সমস্যা দূৰ কৰিবলৈ আৰু স্থানীয় লোকসকলক ডাঙৰ সকাহ দিবলৈ কেন্দ্ৰীয় চৰকাৰে এক নতুন আঁচনি প্ৰস্তুত কৰিছে। এই নতুন ব্যৱস্থা অনুসৰি, টোল প্লাজাৰ পৰা ২০ কিলোমিটাৰ ব্যাসাৰ্ধৰ ভিতৰত বাস কৰা স্থানীয় বাসিন্দাই এতিয়াৰে পৰা বাৰে বাৰে টোল টেক্স দিব নালাগে।
চৰকাৰে এই স্থানীয় লোকসকলৰ বাবে বিশেষ ডিজিটেল ই-পাছ জাৰি কৰাৰ পৰিকল্পনা কৰিছে, যিটো পোনপটীয়াকৈ তেওঁলোকৰ FASTag-ৰ সৈতে সংযোগ কৰা হ’ব, যাৰ ফলত গাড়ীসমূহ নোৰোৱাকৈয়ে টোল প্লাজা পাৰ হ’ব পাৰিব। বৰ্তমান স্থানীয় বাহনসমূহৰ বাবে ৩৫০ টকাৰ যি মাহেকীয়া পাছৰ ব্যৱস্থা আছে, বিষয়াসকলৰ মতে এই নতুন ডিজিটেল পাছটো তাতকৈও কম মূল্যৰ হ’ব পাৰে।
চৰকাৰে দেশত বেৰিয়াৰ নোহোৱা আধুনিক টোলিং প্ৰণালী দ্ৰুতগতিত বৃদ্ধি কৰিবলৈ লৈছে, য’ত কোনো পৰম্পৰাগত টোল বুথ নাথাকিব। ৰাস্তাত সংলগ্ন থকা উন্নত কেমেৰা আৰু চেন্সৰে বাহনখনৰ FASTag স্কেন কৰি স্বয়ংক্ৰিয়ভাৱে টোলৰ ধন কাটি ল’ব, যাৰ ফলত ট্ৰেফিক জামৰ পৰা মুক্তি পোৱা যাব।
কোনো ব্যক্তিয়ে যাতে ভুলকৈ নিজকে স্থানীয় বাসিন্দা সজাই ইয়াৰ অপব্যৱহাৰ কৰিব নোৱাৰে, তাৰ বাবে আধাৰ নম্বৰৰ সহায়ত ঠিকনাৰ ডিজিটেল ভেৰিফিকেচন কৰা হ’ব। এই ডিজিটেল পাছটো চৰকাৰৰ ৰাজমাৰ্গ (Rajmarg) প’ৰ্টেলত অনলাইন যোগে উপলব্ধ হ’ব আৰু বৈধ পাছ নোহোৱাকৈ কোনো বাহন পাৰ হ’লে চিষ্টেমে স্বয়ংক্ৰিয়ভাৱে ই-নটিচ জাৰি কৰিব।
প্ৰাৰম্ভিক পৰ্যায়ত এই আধুনিক ব্যৱস্থাটো হাৰিয়ানা, দিল্লী, ৰাজস্থান, গুজৰাট, মহাৰাষ্ট্ৰ, তামিলনাডু আৰু অন্ধ্ৰপ্ৰদেশ আদি ৰাজ্যৰ প্ৰমুখ ঘাইপথসমূহত কাৰ্যকৰী কৰাৰ পৰিকল্পনা কৰা হৈছে, যাৰ ফলত লাখ লাখ স্থানীয় লোকৰ ধন আৰু সময় দুয়োটাই ৰাহি হ’ব।
