গুৱাহাটী
শুকুৰবাৰে নিশা স্থানীয় এদল যুৱকৰ সৈতে হোৱা এক সংঘাতৰ পিছতে যোৰহাট চিকিৎসা মহাবিদ্যালয় আৰু হাস্পতালৰ এজন চিকিৎসক আৰু এম বি বি এছৰ চূড়ান্ত বৰ্ষৰ ৩ জন ছাত্ৰক প্ৰহাৰ কৰাৰ অভিযোগ উত্থাপন হৈছে, যাৰ ফলত চিকিৎসালয় চৌহদত এক উত্তেজনাময় পৰিস্থিতিৰ সৃষ্টি হয়।
আহতসকলক ডাঃ ধীৰাজ পেগু আৰু অভিলেষ তথা সুকুমাৰ দাসকে ধৰি তিনিজন চিকিৎসা বিজ্ঞানৰ ছাত্ৰ বুলি চিনাক্ত কৰা হৈছে। প্ৰাথমিক তথ্য অনুসৰি, কাজিয়াৰ সময়ত দলটোৰ ওপৰত চোকা অস্ত্ৰৰে আক্ৰমণ কৰাৰ অভিযোগ উঠিছে, যাৰ ফলত তেওঁলোক আহত হয়।
এই ঘটনাৰ পিছতে, জে এম চি এইচৰ হোষ্টেলৰ বহুসংখ্যক আৱাসীয়ে চিকিৎসালয়ৰ বাহিৰত গোট খায় আৰু আক্ৰমণত জড়িত থকা বুলি অভিযোগ উঠা লোকসকলৰ বিৰুদ্ধে ব্যৱস্থা গ্ৰহণৰ দাবী জনায়। পৰিস্থিতি যাতে অধিক অৱনতি নঘটে তাৰ বাবে আৰক্ষীৰ লোক ঘটনাস্থলীত উপস্থিত হৈ হস্তক্ষেপ কৰে।
পৰৱৰ্তী সময়ত মূল অভিযুক্ত বুলি চিনাক্ত কৰা লোকজন আৰক্ষীৰ ওচৰত আত্মসমৰ্পণ কৰাৰ খবৰ পোৱাৰ পিছতে পৰিস্থিতি পুনৰ স্বাভাৱিক অৱস্থালৈ ঘূৰি আহে।
ডাঃ পেগু আৰু ছাত্ৰ তিনিজনক জে এম চি এইচত চিকিৎসা প্ৰদান কৰা হয়। বৰ্তমান তেওঁলোকৰ স্বাস্থ্যৰ অৱস্থা সুস্থিৰ বুলি জানিব পৰা গৈছে, অৱশ্যে আহতসকলৰ মাজৰ এজনৰ ভৰিত গুৰুতৰ আঘাত লগা বুলি কোৱা হৈছে।
ইফালে একাংশ স্থানীয় যুৱকে অভিযোগ কৰা অনুসৰি, চিকিৎসালয়খনৰ সমীপৰ এখন ৰাজহুৱা স্থানত একাংশ চিকিৎসা বিজ্ঞানৰ ছাত্ৰই বিয়েৰৰ বটল ভঙা এক ঘটনাৰ পৰাই এই সংঘাতৰ সূত্ৰপাত হৈছিল। সমগ্ৰ ঘটনাৱলীৰ প্ৰকৃত কাৰণ জানিবলৈ আৰু আক্ৰমণৰ বাবে জগৰীয়া লোকসকলক চিনাক্ত কৰিবলৈ আৰক্ষীয়ে তদন্ত আৰম্ভ কৰিছে।
