চুবুৰীয়া ৰাজ্য নগালেণ্ডৰ পাহাৰীয়া অঞ্চলত সংঘটিত এক ভয়াৱহ ভূমিস্খলনৰ ফলত নামনি অংশৰ শিৱসাগৰ জিলালৈ এক নতুন ভাবুকি নামি আহিছে। দিখৌ নদীৰ উজান অংশত হোৱা এই ভূমিস্খলনৰ ফলত নদীখনৰ স্বাভাৱিক জলপ্ৰবাহত তীব্ৰ বাধাৰ সৃষ্টি হোৱাৰ খবৰ পোহৰলৈ অহাৰ লগে লগে সমগ্ৰ শিৱসাগৰ জিলাতে বুধবাৰে প্ৰশাসনে এক সতৰ্কতামূলক অৱস্থা বা ‘হাই এলাৰ্ট’ জাৰি কৰিছে। সাম্ভাব্য দুৰ্যোগৰ মোকাবিলা কৰিবলৈ প্ৰশাসনৰ ফালৰ পৰা দ্ৰুত পদক্ষেপ গ্ৰহণ কৰা হৈছে।
প্ৰাপ্ত তথ্য অনুসৰি, নগালেণ্ডৰ মককচুং জিলাৰ অন্তৰ্গত ইয়ংইমছেন আৰু লংলেং জিলাৰ অন্তৰ্গত ইয়ংছেই গাঁৱৰ মাজৰ এক স্পৰ্শকাতৰ অঞ্চলত এই ভূমিস্খলনৰ ঘটনা সংঘটিত হৈছে। লংলেং জিলাৰ উপায়ুক্তই প্ৰেৰণ কৰা এক বিশেষ শ্ৰব্য বাৰ্তাৰ পৰা জানিব পৰা গৈছে যে পাহাৰৰ পৰা খহি পৰা বৃহৎ মাটিৰ স্তূপে দিখৌ নদীৰ প্ৰায় ৮০ শতাংশ জলপ্ৰবাহ আৱদ্ধ কৰি পেলাইছে। আনহাতে, ইয়ংছেই গাঁৱৰ অধ্যক্ষগৰাকীয়ে প্ৰদান কৰা প্ৰতিবেদনতো এই তথ্য নিশ্চিত কৰা হৈছে যে বৰ্তমান নদীখনত কেৱল ২০ শতাংশ পানীহে স্বাভাৱিকভাৱে বৈ আছে।
প্ৰতিবেদন অনুসৰি, উজান অংশত নদীৰ পানী আৱদ্ধ হৈ থাকিলেও নামনি অংশত বৰ্তমানলৈকে ইয়াৰ কোনো বিৰূপ প্ৰভাৱ পৰা নাই। শিৱসাগৰ প্ৰশাসনে নামনিৰ গাঁওসমূহত চলোৱা প্ৰাথমিক অনুসন্ধানত জলপ্ৰবাহ বা পানীৰ স্তৰ অস্বাভাৱিকভাৱে হ্ৰাস পোৱাৰ কোনো লক্ষণ চকুত পৰা নাই। ইয়াৰ সমান্তৰালভাৱে, শিৱসাগৰৰ বিহুবৰত থকা জলমাপক কেন্দ্ৰৰ তথ্য অনুসৰিও দিখৌ নদীৰ পানীৰ স্তৰ সম্পূৰ্ণ স্থিৰ অৱস্থাত আছে। তথাপিও, পৰিস্থিতিৰ গুৰুত্ব উপলব্ধি কৰি বৃহস্পতিবাৰে পুৱাই জিলা প্ৰশাসনৰ এক বিশেষ দলে অঞ্চলটোত এক বিস্তৃত স্থলভিত্তিক নিৰীক্ষণ চলাব। এই পৰীক্ষণৰ পিছতহে প্ৰকৃত পৰিস্থিতিৰ বিতং তথ্য আনুষ্ঠানিকভাৱে ৰাজহুৱা কৰা হ'ব বুলি প্ৰশাসনে জাননীত প্ৰকাশ কৰিছে।
সাম্ভাব্য যিকোনো দুৰ্যোগৰ মোকাবিলা কৰিবলৈ শিৱসাগৰ জিলা প্ৰশাসন সম্পূৰ্ণৰূপে সাজু হৈ আছে। নদীপৰীয়া অঞ্চলৰ ৰাইজৰ সুৰক্ষা নিশ্চিত কৰিবলৈ প্ৰশাসনে নাগৰিকসকলক এক বিশেষ আহ্বান জনাইছে। ৰাইজক কোনো কাৰণতে আতংকিত নহৈ ধৈৰ্য অৱলম্বন কৰিবলৈ অনুৰোধ কৰা হৈছে। জৰুৰীকালীন অৱস্থাৰ বাবে প্ৰয়োজনীয় জীৱনদায়িনী আৰু অত্যাৱশ্যকীয় সামগ্ৰীসমূহ নিজৰ হাতত মজুত ৰাখিবলৈ পৰামৰ্শ দিয়া হৈছে। লগতে, উৰাবাতৰিত ভোল নাযাই কেৱল চৰকাৰী মাধ্যমৰ পৰা প্ৰাপ্ত নিৰ্দেশনা আৰু বাতৰিৰ ওপৰতহে নিৰ্ভৰ কৰিবলৈ কোৱা হৈছে।
দিখৌ নদীৰ পানীৰ স্তৰৰ ওপৰত প্ৰশাসনে অহৰ্নিশে চোকা নজৰ ৰাখি নিয়মীয়া তথ্য সংগ্ৰহ অব্যাহত ৰাখিছে। যদিহে নদীপৰীয়া অঞ্চলৰ কোনো লোকে পানীৰ স্তৰৰ অস্বাভাৱিক পৰিৱৰ্তন প্ৰত্যক্ষ কৰে, তেন্তে পলম নকৰি লগে লগে শিৱসাগৰ জিলা দুৰ্যোগ ব্যৱস্থাপনা প্ৰাধিকৰণৰ জৰুৰীকালীন পৰিচালনা কেন্দ্ৰক অৱগত কৰিবলৈ কোৱা হৈছে। ইয়াৰ বাবে মুকলি কৰা জৰুৰীকালীন যোগাযোগ নম্বৰসমূহ হৈছে: ম’বাইল নম্বৰ: ৮৪৭১৮-৬৪৩৫৫, টোল ফ্ৰী নম্বৰ: ০৩৭৭২-১০৭৭।
