গুৱাহাটী
গুৱাহাটীৰ খানাপাৰাত অনুষ্ঠিত ৮০ সংখ্যক স্বাধীনতা দিৱসৰ সমাৰোহত ভাষণ প্ৰদান কৰি অসমৰ মুখ্যমন্ত্ৰী হিমন্ত বিশ্ব শৰ্মাই উন্নয়ন, সমাজ সংস্কাৰ, অর্থনৈতিক সৱলীকৰণ আৰু সৰ্বাংগীন বিকাশৰ ওপৰত গুআৰোপ কৰি এখনি শান্তিপূৰ্ণ, স্বাৱলম্বী আৰু সুযোগ-সম্ভাৱনাৰে ভৰপূৰ অসমৰ নিজৰ লক্ষ্যৰ কথা সদৰী কৰে।
শৰ্মাই কয় যে অসম এতিয়া কেৱল আন ৰাজ্যৰ পৰা শিকি থকা অৱস্থাত নাই, বৰঞ্চ শান্তি, আন্তঃগাঁথনি, উদ্যোগ, বিনিয়োগ, সংস্কাৰ আৰু প্ৰযুক্তিৰ ওপৰত ভিত্তি কৰি গঢ়ি উঠা উন্নয়নৰ নিজা আৰ্হিৰে আগবাঢ়ি আহিছে। তেওঁ কয় যে চৰকাৰৰ লক্ষ্য হৈছে এনে এখন অসম গঢ়ি তোলা, য’ত যুৱক-যুৱতীসকলে নিজৰ প্ৰতিভা বিকাশৰ বাবে ৰাজ্য এৰি যাবলগীয়া নহয় আৰু বিশ্বৰ বিভিন্ন প্ৰান্তৰ লোকে সুযোগৰ সন্ধানত ৰাজ্যখনলৈ আহে।
ৰাজ্যখনৰ অর্থনৈতিক বৃদ্ধিৰ কথা উল্লেখ কৰি মুখ্যমন্ত্ৰীয়ে কয় যে ডেৰ দশকতকৈও কম সময়ৰ ভিতৰতে অসমৰ অর্থনীতি প্ৰায় তিনিগুণ বৃদ্ধি পাইছে, যিয়ে ৰাজ্যখনক পৰিৱৰ্তনশীল আন্তঃগাঁথনি আৰু উন্নয়নত বিনিয়োগ কৰাৰ অধিক ক্ষমতা প্ৰদান কৰিছে। তেওঁ ছেমিকণ্ডাক্টৰ নিৰ্মাণকে ধৰি উন্নত উদ্যোগসমূহৰ উত্থানৰ কথা উল্লেখ কৰাৰ লগতে বৈহাটা চাৰিআলি-তেজপুৰ চাৰিআলি পথৰ দৰে প্ৰধান সংযোগ প্ৰকল্পসমূহৰ কথা আঙুলিয়াই দিয়ে, যিয়ে অসমৰ ভিতৰতে আৰু অৰুণাচল প্ৰদেশৰ সৈতে সংযোগ শক্তিশালী কৰি তুলিছে।
শৰ্মাই বিগত কেইটামান মাহত চৰকাৰে গ্ৰহণ কৰা পদক্ষেপসমূহৰ কথাও উল্লেখ কৰে, য'ত বিধায়ক এলেকা উন্নয়ন পুঁজি বৃদ্ধি কৰা, গুৱাহাটী বিমানবন্দৰৰ কাষত এটা নতুন উপগ্ৰহ চহৰ (চেটেলাইট চিটি) নিৰ্মাণৰ পৰিকল্পনা আগুৱাই নিয়া আৰু অসম আৰক্ষীৰ জৰুৰীকালীন সেৱা ১১২ ক ২৪ ঘণ্টীয়া বাহনেৰে আধুনিকীকৰণ কৰাৰ বিষয় অন্তৰ্ভুক্ত আছে।
সামাজিক ন্যায় আৰু মহিলাৰ সুৰক্ষাৰ সন্দৰ্ভত শৰ্মাই আইনী বিবাহ বিচ্ছেদ নোহোৱাকৈ চৰকাৰী কৰ্মচাৰীৰ দ্বাৰা পৰিত্যক্ত হোৱা মহিলাসকলক সহায় কৰাৰ বাবে এক প্ৰস্তাৱিত ব্যৱস্থাৰ কথা ঘোষণা কৰে। তেওঁ কয় যে যদি কোনো চৰকাৰী কৰ্মচাৰীয়ে প্ৰথম পত্নীক আইনীভাৱে বিবাহ বিচ্ছেদ নকৰাকৈ এৰি দিয়ে আৰু আন এগৰাকী মহিলাৰ সৈতে অনানুষ্ঠানিক বিবাহত লিপ্ত হয়, তেন্তে চৰকাৰত আবেদন দাখিল কৰিলে তেওঁৰ দৰমহাৰ ২০ শতাংশ কৰ্তন কৰা হ'ব আৰু পোনপটীয়াকৈ প্ৰথম পত্নীৰ বেংক একাউণ্টত জমা কৰা হ'ব, যাতে তেওঁ মৰ্যাদাপূৰ্ণভাৱে জীয়াই থাকিব পাৰে।
মুখ্যমন্ত্ৰীয়ে কয় যে চৰকাৰে ব্যক্তিগত খণ্ডৰ কৰ্মচাৰীৰ দ্বাৰা পৰিত্যক্ত মহিলাসকলকো একেধৰণৰ সুৰক্ষা প্ৰদান কৰাৰ বাবে আইন প্ৰণয়নৰ প্ৰস্তাৱ আগবঢ়াইছে।
শিশু বিবাহৰ বিৰুদ্ধে যুঁজ অব্যাহত ৰখাৰ প্ৰয়োজনীয়তাৰ ওপৰত গুৰুত্ব আৰোপ কৰি শৰ্মাই কয় যে এই প্ৰথাই শিশুসকলক তেওঁলোকৰ শৈশৱ, শিক্ষা আৰু সুযোগৰ পৰা বঞ্চিত কৰে। অসমৰ পুত্ৰ-কন্যাৰ ভৱিষ্যত সুৰক্ষিত কৰিবলৈ শিশু বিবাহৰ বিৰুদ্ধে অভিযান অধিক দৃঢ়তাৰে চলাই যাব লাগিব বুলি তেওঁ জোৰ দি কয়।
অসমৰ ইতিহাসলৈ স্বৰ্গদেউ চাওলুং চুকাফাই আগবঢ়োৱা অৱদানৰ কথা স্মৰণ কৰি শৰ্মাই কয় যে ব্ৰহ্মপুত্ৰ উপত্যকাত তেওঁৰ পদার্পণে এক দীৰ্ঘস্থায়ী সংহতি, সহাৱস্থান আৰু একতাৰ যাত্ৰা আৰম্ভ কৰিছিল যিয়ে অসমীয়া সমাজক গঢ় দিছিল। তেওঁ উল্লেখ কৰে যে ২০২৮ চনত চুখফাই ৰাজ্যত পদদোপৰী কৰাৰ ৮০০ বছৰ সম্পূৰ্ণ হ'ব, যিটোৱে ৰাজ্যখনৰ সামাজিক গাঁথনিত তেওঁৰ অৱদানৰ ঐতিহাসিক গুৰুত্বকে প্ৰতিফলিত কৰে।
মুখ্যমন্ত্ৰীয়ে অসমৰ ক্ৰীড়াবিদসকলৰ সাফল্যৰ কথাও উল্লেখ কৰি কয় যে অলিম্পিক পদক বিজয়ী বক্সাৰ লাভলীনা বৰগোহাঁই আৰু বেডমিন্টন খেলুৱৈ অস্মিতা চলিহাৰ শেহতীয়া প্ৰদৰ্শনে প্ৰমাণ কৰিছে যে উপযুক্ত সুযোগ পালে অসমৰ যুৱক-যুৱতীসকলেও বিশ্বৰ মঞ্চত উজ্জ্বল প্ৰদৰ্শন আগবঢ়াব পাৰে।
শৰ্মাই কয় যে চৰকাৰৰ দৃষ্টিভংগী কেৱল ভৌতিক পৰিৱৰ্তনতে সীমাবদ্ধ নহয়। তেওঁ কয় যে ইয়াৰ লক্ষ্য হৈছে প্ৰতিজন নাগৰিকৰ মৰ্যাদা, প্ৰতিজন যুৱক-যুৱতীৰ বাবে সুযোগ, প্ৰতিগৰাকী মহিলাৰ বাবে অর্থনৈতিক শক্তি, প্ৰতিখন গাঁৱৰ বাবে সংযোগ আৰু প্ৰতিটো পৰিয়ালৰ বাবে আশা নিশ্চিত কৰা।
তেওঁ দেশপ্ৰেমৰ গুৰুত্বৰ কথাও উল্লেখ কৰে আৰু কয় যে ই ভাৰতীয় সভ্যতাৰ এক অভিন্ন অংগ, যিটো সভ্যতাক বার্তা ভৱিষ্যৎ প্ৰজন্মই আগুৱাই লৈ যাব।
স্বাধীনতা দিৱসৰ দিনটোত শৰ্মাই অসমৰ উন্নয়ন, সামাজিক সদ্ভাৱ আৰু একতা শক্তিশালী কৰাৰ দিশত নিৰন্তৰ প্ৰয়াস অব্যাহত ৰখাৰ আহ্বান জনোৱাৰ লগতে প্ৰগতিৰ লাভালাভ যেন সমাজৰ প্ৰতিটো শ্ৰেণীয়ে লাভ কৰে সেয়া নিশ্চিত কৰে।
_(1).webp "ত্ৰিবেণী-সপ্তগ্ৰামৰ খানকাহত চুফীসকলৰ কবৰ")
