নতুন দিল্লী
পাটনাত উমানাথ মন্দিৰৰ ওচৰত গংগা নদীত এক ভয়ংকৰ নাও দুৰ্ঘটনা সংঘটিত হৈছে। ঘটনাৰ সময়ত মাজ নদীত এখন সৰু নাও গৈ আছিল। হঠাৎ প্ৰবল বতাহ বলিবলৈ আৰম্ভ কৰে আৰু নাওখনে নিয়ন্ত্ৰণ হেৰুৱাই পানীত ডুব যায়। এই মৰ্মান্তিক দুৰ্ঘটনাত এতিয়ালৈকে ৩ জন লোকৰ মৃত্যু হোৱাৰ খবৰ পোৱা গৈছে আৰু আন ৫ জন লোক সন্ধানহীন হৈ আছে। ইতিমধ্যে এই দুৰ্ঘটনাৰ এটা ভিডিঅ’ ছচিয়েল মিডিয়াত ভাইৰেল হৈ পৰিছে।
আৰক্ষীৰ সূত্ৰই প্ৰকাশ কৰা অনুসৰি বৃহস্পতিবাৰে পুৱা এই দুৰ্ঘটনা সংঘটিত হয়। সৰু নাওখনত ১৪ ৰ পৰা ১৫ জন যাত্ৰী আছিল। অতিৰিক্ত যাত্ৰী উঠোৱাৰ বাবেই এই দুৰ্ঘটনা সংঘটিত হ’ল নেকি, সেই বিষয়ে উদ্ধাৰকাৰী দলে এতিয়াও নিশ্চিতকৈ একো জানিব পৰা নাই। স্থানীয় সংবাদ মাধ্যমৰ মতে, যাত্ৰীসকলে প্ৰতিদিনে পুৱা নাও চলাই উমানাথ মন্দিৰ এলেকাত শাক-পাচলি বিক্ৰী কৰিবলৈ গৈছিল। সেয়েহে নাওখনত ১৫ জন যাত্ৰীৰ উপৰিও বহুতো শাক-পাচলিৰ বস্তা আছিল।
উল্লেখযোগ্য যে, মাজ নদীত প্ৰবল বতাহ অহাৰ লগে লগে নাওখনে ভাৰসাম্য হেৰুৱাই ডুব যায়। জানিব পৰা মতে, মৃত্যু হোৱা ৩ জনৰ ভিতৰত দুগৰাকী মহিলা আছে। প্ৰথমে ওচৰত থকা আন নাৱৰীয়াসকলে যাত্ৰীসকলক উদ্ধাৰ কৰিবলৈ নদীত নামি পৰে। ইয়াৰ পিছতে এন ডি আৰ এফ আৰু এছ ডি আৰ এফৰ দলে উদ্ধাৰ অভিযান আৰম্ভ কৰে। স্থানীয় লোকসকলৰ মতে, সন্ধানহীন হোৱা ৫ জন লোকো পানীত ডুব গৈছে আৰু সেয়েহে মৃতকৰ সংখ্যা বৃদ্ধি পোৱাৰ আশংকা কৰা হৈছে। উদ্ধাৰকাৰী দলৰ অভিযান এতিয়াও অব্যাহত আছে যদিও সন্ধানহীন লোকসকলৰ মৃতদেহ এতিয়াও বিচাৰি পোৱা হোৱা নাই।
