অৰ্চলা খান / নতুন দিল্লী
উত্তৰ প্ৰদেশৰ পিলিভীটৰ এটা পুখুৰীত সংঘটিত এক দুৰ্ঘটনাই দেশবাসীক মানৱতাৰ উৎকৃষ্ট নিদৰ্শন দেখুৱাইছে। যিসময়ত পুখুৰীৰ পানীত এখন বাহন ডুব যাবলৈ ধৰাত শতাধিক লোকে বাহনখন আৰু ভিতৰত থকা চালকগৰাকী উদ্ধাৰ কৰাৰ পৰিৱৰ্তে ম’বাইলত দৃশ্য বন্দী কৰাত ব্যস্ত হৈ পৰিছিল, ঠিক সেই সময়তেই এজন মাছধৰা যুৱকে নিজ জীৱনক বিপদত পেলাই এক মুহূৰ্তো চিন্তা নকৰাকৈ পানীত জপিয়াই পৰি বাহনখনৰ ভিতৰত আৱদ্ধ শুভমক উদ্ধাৰ কৰিলে আৰু এক বীৰত্ব আৰু সহমৰ্যাদাৰ পৰিচয় দাঙি ধৰিলে।
এই সাহসী যুৱকজনৰ নাম হৈছে ফৈজল। যিগৰাকীয়ে নিজৰ নাঁৱেৰে পুখুৰীৰ পৰা মাছ ধৰি জীৱিকা নিৰ্বাহ কৰি আহিছে। দুৰ্ঘটনাৰ সময়ত তেওঁ নিজৰ নাওখন পানীত উলটি ডুব গৈছিল, যদিও তেওঁৰ সাহস আৰু আত্মবিশ্বাস অটল হৈ আছিল। তেওঁ পানীত জপিয়াই গাড়ীত আবদ্ধ হৈ থকা যুৱক শুভমক সঠিক সময়ত উদ্ধাৰ কৰি তেওঁৰ জীৱন ৰক্ষা কৰিছিল। এই সমগ্ৰ ঘটনা এক ভিডিঅ'ত বন্দী হৈ পৰে, আৰু সামাজিক মাধ্যমযোগে লাখ লাখ লোকৰ হৃদয় স্পৰ্শ কৰে।
ঘটনাৰ বিৱৰণী অনুসৰি শুভমে নিজৰ গাড়ীৰে নিজৰ গাঁৱলৈ উভতি আহি থকা অৱস্থাত হঠাতে গাড়ীখন নিয়ন্ত্ৰণ হেৰুৱাই পোনে পোনে পুখুৰীত পৰি যায়। মিনিটৰ ভিতৰতে গাড়ীখন পুখুৰীৰ পানীত ডুব যাবলৈ ধৰিছিল। তাত থকা লোকসকলে দৰ্শক হিচাপে সমগ্ৰ ঘটনা কেৱল চাইহে আছিল, কিন্তু সহায় কৰিবলৈ পানীত জপিয়াই পৰাৰ সাহস কাৰো নাছিল।
মানুহবোৰে নিজৰ নিজৰ ম’বাইল কেমেৰাত দৃশ্যটো বন্দী কৰাত ব্যস্ত হৈ পৰিছিল, যেন এইটো এটা স্বাভাৱিক ঘটনাহে। কিন্তু ফৈজলে সকলো দেখিছিল, আৰু তেওঁ এক মুহূৰ্ত সময় নষ্ট নকৰাকৈয়ে পুখুৰীত জপিয়াই পৰিছিল। প্ৰচণ্ড পানীৰ সোঁতৰ মাজেৰে সাঁতুৰি গৈ তেওঁ গাড়ীৰ ওচৰ পাইছিল আৰু গাড়ীখনৰ দুৱাৰখন খুলিবলৈ চেষ্টা কৰছিল, কিন্তু পানীৰ চাপৰ বাবে দুৱাৰখন সম্পূৰ্ণৰূপে বন্ধ হৈ পৰিছিল। ফৈজলে খিৰিকীখন ভাঙি ভিতৰত আবদ্ধ হৈ থকা শুভমক ওপৰলৈ টানি উলিয়াই আনিছিল।
এই সময়ছোৱাত ফৈজলৰ নিজৰ জীৱনো বিপদত পৰিছিল। তেওঁৰ নিজৰ নাওখন পানীত ডুব গৈছিল, গাড়ীখনৰ চাপো অপৰিসীম আছিল, কিয়নো পুখুৰীৰ তলটোও বৰ পিছল হৈ পৰিছিল। কিন্তু তেওঁ সংকল্পবদ্ধ হৈ আছিল। যেতিয়াই দুয়োজন নিৰাপদে ওলাই আহিবলৈ সক্ষম হৈছিল, তেতিয়া লৰালৰিকৈ পাৰৰ পৰা ঘটনা পৰিদৰ্শন কৰি থকা দৰ্শকসকলে সহায় কৰিবলৈ আগবাঢ়ি গৈছিল। ইয়াৰ পিছত গাঁৱৰ মানুহে শুভামক চিকিৎসালয়লৈ লৈ যায়, তাতে চিকিৎসকে কৈছিল যে, কেইমিনিটমান পলম হ’লে হয়তু শুভমৰ মৃত্যু হলহেঁতেন।
পিলিভীটৰ পুখুৰীৰ পৰা শুভমক উদ্ধাৰ কৰাৰ কিছু দৃশ্য
এই ঘটনাৰ ভিডিঅ’ সামাজিক মাধ্যমত ভাইৰেল হোৱাৰ পিছতে ৰাইজে মুকলিকৈ ফৈজলৰ সাহস আৰু মানৱীয়তাৰ প্ৰশংসা কৰিছে। একাংশই ভিৰৰ নিৰ্দয়তাক লৈ দুখ প্ৰকাশ কৰাৰ বিপৰীতে বেছিভাগেই হিন্দু-মুছলমানৰ পাৰ্থক্যক অতিক্ৰম কৰি ফৈজলক মানৱতাৰ উদাহৰণ বুলি অভিহিত কৰিছে। বহু সামাজিক মাধ্যম ব্যৱহাৰকাৰীয়ে লিখিছে যে, "এনে লোক সমাজৰ প্ৰকৃত শক্তি, তেওঁ কোনো ধৰণৰ বৈষম্য নোহোৱাকৈ আনক সহায় কৰিবলৈ আগবাঢ়ি আহিছে।"
স্থানীয় প্ৰশাসনেও ফৈজলৰ বীৰত্বক প্ৰশংসা কৰি তেওঁক সন্মান জনোৱাৰ প্ৰস্তুতি অব্যাহত ৰাখিছে। শুভমৰ পৰিয়ালে ফৈজলক "ঈশ্বৰৰ ৰূপ" বুলি অভিহিত কৰি কয় যে, যদি তেওঁ সময়মতে উপস্থিত নহ'লহেঁতেন, তেন্তে তেওঁলোকৰ পুত্ৰ আজি জীয়াই নাথাকিলহেঁতেন। এই ঘটনা কেৱল উদ্ধাৰৰ কাহিনী নহয়, বৰং মানৱতা যে এতিয়াও জীয়াই আছে তাৰ সোঁৱৰণী।
আন কিছুমানে কৈছে যে, দৰ্শক হিচাপে থিয় দিয়াৰ বিপৰীতে ফৈজলে কাৰোবাৰ জীৱন ৰক্ষা কৰাৰ দৰে সেই কামটো কৰিলে, যিটো কেৱল এজন প্ৰকৃত মানুহেহে কৰিব পাৰে। সম্প্ৰতি পিলিভীটৰ এই ঘটনাটোৱে সমগ্ৰ দেশবাসীৰ বাবে এক প্ৰেৰণা হৈ পৰিছে, সময় আহিলে এজন ব্যক্তিয়েও যে, এক উল্লেখযোগ্য পৰিৱৰ্তন আনিব পাৰে, সেই কথা প্ৰমাণ কৰিছে।
