উল্লেখযোগ্য যে, শিৱসাগৰ গুৰুদ্বাৰা চাহেবৰ এই তৎপৰতা দেখি অন্য বহু লোক আগবাঢ়ি আহিছে। মাৰৱাৰী সমাজ, বিভিন্ন দল-সংগঠন আৰু ব্যক্তিগত ভাবে বহু লোকে গুৰুদ্বাৰাৰ এই মহান কামটোত সহায় আগবঢ়াইছে। গুৰুদ্বাৰটোত থকা বানপীড়িতসকলৰ স্বাস্থ্যৰ ওপৰত লক্ষ্য ৰাখি দুজন চিকিৎসক উপলব্ধ কৰিবলৈ চৰকাৰক আহ্বান জনাইছে গুৰুদ্বাৰ কৰ্তৃপক্ষই। "আমাক ইয়াত দুজন চিকিৎসক আৰু এটা চিকিৎসা দল দিলে হৈ যাব। ঔষধৰ ব্যৱস্থা আমি নিজেই কৰি লম", মনিন্দৰ সিঙে কয়।
শিৱসাগৰ চহৰত ৫০ ঘৰ শিখ সম্প্ৰদায়ৰ পৰিয়াল আছে। এই গুৰুদ্বাৰটো এই ৫০ ঘৰ মানুহে চোৱাচিতা কৰে। কিন্তু আজিৰ এই কঠিন পৰিস্থিতিত তেওঁলোকে এক বৃহৎ সংখ্যক লোকৰ আশ্ৰয় আৰু খাদ্যৰ যোগান ধৰিবলৈ সক্ষম হৈছে। তেওঁলোকৰ এই মহানুভৱতাই প্ৰমাণ কৰিছে যে মানৱ সেৱাই শ্ৰেষ্ঠ ধৰ্ম।
তথ্য অনুসৰি বৰ্তমান ৰাজ্যৰ ২৫ খনকৈ জিলাৰ প্ৰায় ১৮০০০ ৰো অধিক গাঁও বানৰ কবলত পৰিছে ৷ প্ৰভাৱিত হৈছে কমেও ৯ লাখ লোক ৷ এই বলিয়া বানত চৰকাৰী তথ্য মতে প্ৰাণ হেৰুৱাইছে ৪১ গৰাকী লোকে৷ আনহাতে সন্ধানহীন হৈ আছে কমেও ৭০ গৰাকী লোক। হাজাৰ হাজাৰ পশুধন বানে উটুৱাই নিয়ে৷ এয়া অৱশ্যে চৰকাৰী তথ্য৷ কিন্তু বহুতেই দাবী কৰা মতে বানত প্ৰাণ হেৰুওৱা আৰু সন্ধানহীন হোৱা লোকৰ সংখ্যাই শতকৰ ঘৰ অতিক্ৰম কৰিছে ৷
অসম চৰকাৰে এই প্ৰাকৃতিক দুৰ্যোগৰ সৈতে মোকাবিলা কৰাৰ উদ্দেশ্যে যাৱতীয় ব্যৱস্থা গ্ৰহণ কৰিছে যদিও সকলোকে স্পৰ্শ কৰিব পৰা নাই৷ বহু স্থানত বানৰ মাজত ককবকাই থাকিবলগীয়া হৈছে জনতাই ৷ উদ্ধাৰকাৰী দলে বিভিন্ন কাৰণত তেওঁলোকক উদ্ধাৰ কৰিব পৰা নাই ৷ শিৱসাগৰৰ বিহুবৰত প্ৰায় শতাধিক লোকক বানে উটুৱাই নিয়া বুলি মন্তব্য কৰিছে বিধায়ক অখিল গগৈয়ে ৷ অৱশ্যে চৰকাৰী তথ্যত তেনে কোনো উল্লেখ কৰা হোৱা নাই ৷
বানপানীৰ এক দৃশ্য
মুখ্যমন্ত্ৰী হিমন্ত বিশ্ব শৰ্মাই বুধবাৰৰ পৰা উজনিত বাহৰ পাতি তিনিওখন জিলাৰ বান পৰিস্থিতি পৰ্যবেক্ষণ কৰিছে ৷ লগতে বিভিন্ন আশ্ৰয় শিবিৰ পৰিদৰ্শন কৰি জনতাৰ দুখৰ বুজ লোৱাৰ যত্ন কৰা দেখা গৈছে ৷ তদুপৰি চাৰিগৰাকীকৈ মন্ত্ৰীক তেওঁ এই দুৰ্যোগৰ সময়ত সকলো দিশ নিৰীক্ষণৰ বাবে দায়িত্ব প্ৰদান কৰিছে৷ সেই অনুসৰি শিৱসাগৰ আৰু চৰাইদেউ জিলাত মন্ত্ৰী সুশান্ত বৰগোহাঁই, কেশৱ মহন্ত আৰু বিমল বড়াই উদ্ধাৰ অভিযান, সাহাৰ্য প্ৰদান আদি দিশসমূহ তদাৰক কৰিছে ৷ যোৰহাটত এই সকলোখিনি পৰ্যবেক্ষণ কৰিছে মন্ত্ৰী অজন্তা নেওগে ৷
