দেৱকিশোৰ চক্ৰৱৰ্তী
মুৰ্ছিদাবাদ জিলাৰ লালগোলা বিধানসভা সমষ্টিত নিৰ্বাচনী বতাহ ক্ৰমাৎ গৰম হৈ উঠিছে। আৰু সেই বতাহৰ কেন্দ্ৰবিন্দুত এতিয়া এটাই নাম- ডাঃ আব্দুল আজিজ। প্ৰচাৰ চলাবলৈ তেওঁ য’লৈকে গৈছে, সাধাৰণ মানুহৰ ভিৰত তেওঁ প্ৰায় হেৰাই গৈছে। গাঁৱৰ পৰা বজাৰলৈ, চাহ-দোকানৰ পৰা চুবুৰীলৈ, সকলো ঠাইতে তেওঁৰ উপস্থিতিক লৈ প্ৰবল উছাহ পৰিলক্ষিত হৈছে।
কিন্তু প্ৰশ্ন উঠিছে, কোন এই আব্দুল আজিজ? ৰাজনীতিৰ মূল সোঁতত ইমান দিনে যাৰ নাম বৰকৈ শুনিবলৈ পোৱা নগৈছিল, তেওঁ হঠাতে কেনেকৈ আলোচনাৰ কেন্দ্ৰবিন্দু হৈ পৰিল?
মুৰ্ছিদাবাদৰ এখন অখ্যাত গাঁৱৰ যুৱ চিকিৎসক আব্দুল আজিজ পেছাত এজন ডাক্তৰ। দীৰ্ঘদিন ধৰি তেওঁ সাধাৰণ মানুহৰ চিকিৎসা সেৱাৰ সৈতে জড়িত হৈ আছে। অঞ্চলটোৰ মানুহৰ মাজত তেওঁ ‘ডাক্তৰবাবু’ হিচাপেই বেছি পৰিচিত। ৰাজনৈতিক মঞ্চত তেওঁৰ সক্ৰিয় উপস্থিতি আগতে নাছিল বুলিয়েই ক’ব পাৰি।
ডাঃ আব্দুল আজিজ
পিছে এইবাৰৰ বিধানসভা নিৰ্বাচনত তেওঁৰ ভাগ্য সলনি হৈ পৰে। তৃণমূল কংগ্ৰেছৰ সৰ্বভাৰতীয় সাধাৰণ সম্পাদক অভিষেক বেনাৰ্জীয়ে তেওঁক লালগোলা সমষ্টিৰ প্ৰাৰ্থী হিচাপে ঘোষণা কৰে। ৰাজনৈতিক মহলৰ মতে, এয়া আছিল এক সাহসী আৰু কৌশলগত সিদ্ধান্ত। কাৰণ, প্ৰচলিত ৰাজনীতিৰ বাহিৰত থকা এখন ‘নতুন মুখ’ক সন্মুখলৈ আনি দলে একপ্ৰকাৰে জনসংযোগৰ এক নতুন পথ মুকলি কৰিছে।
দলৰ ভিতৰচ'ৰাৰ পৰাও জানিব পৰা গৈছে যে, আব্দুল আজিজ কাৰ্যতঃ অভিষেক বেনাৰ্জীৰ পছন্দৰ প্ৰাৰ্থী। তেওঁৰ ব্যক্তিত্ব, শিক্ষাগত পটভূমি আৰু জনসংযোগৰ দক্ষতা- এই সকলোবোৰ মিলি তেওঁক এই সমষ্টিটোৰ বাবে উপযুক্ত বুলি গণ্য কৰা হৈছে।
প্ৰচাৰ অভিযানত নামি তেওঁ যেন সেই বিশ্বাসৰ প্ৰতিদানো দিবলৈ আৰম্ভ কৰিছে। পৰিপাটি স্মাৰ্ট চেহেৰা, মাৰ্জিত আচৰণ আৰু সহজ-সৰল ভাষাত মানুহৰ সৈতে কথা পতাৰ ক্ষমতা- এই তিনিটা কাৰকে অতি সোনকালেই তেওঁক জনপ্ৰিয় কৰি তুলিছে। বহুতেই কৈছে, “ৰাজনীতিবিদ হিচাপে নহয়, এজন মানুহ হিচাপে তেওঁ অধিক গ্ৰহণযোগ্য” আৰু সেয়াই তেওঁৰ আটাইতকৈ ডাঙৰ শক্তি।
অৱশ্যে তেওঁৰ নামটোক লৈ যে একেবাৰে বিতৰ্ক নাই, তেনে নহয়। তৃণমূলৰ বিতৰ্কিত নেতা এনামুল হকৰ জোঁৱায়েক হিচাপে তেওঁৰ পৰিচয় ৰাজনৈতিক মহলত চৰ্চাৰ বিষয় হৈ পৰিছে। বিৰোধীয়ে এই কথাটোকেই ইছ্যু কৰিব বিচাৰিছে। যদিও সমৰ্থকসকলৰ দাবী- ব্যক্তিগত সম্পৰ্কৰে এজন প্ৰাৰ্থীৰ যোগ্যতা বিচাৰ কৰাটো কেতিয়াও উচিত নহয়।
ৰাজনৈতিক বিশ্লেষকসকলৰ মতে, এই বিতৰ্কৰ পাছতো আব্দুল আজিজ তেওঁৰ নিকটতম প্ৰতিদ্বন্দ্বীসকলতকৈ কিছু পৰিমাণে আগবাঢ়ি আছে। কাৰণ, তেওঁৰ ‘আউটছাইডাৰ’ (বাহিৰৰ মানুহ) ভাৱমূৰ্তি আৰু চিকিৎসক হিচাপে জনসাধাৰণৰ সৈতে থকা দীৰ্ঘদিনীয়া সম্পৰ্কই নিৰ্বাচনী পথাৰত এক ইতিবাচক প্ৰভাৱ পেলাইছে।
ইয়াৰ উপৰি, স্থানীয় ৰাইজৰ মাজত এক প্ৰত্যাশাও গঢ় লৈ উঠিছে যে, এজন শিক্ষিত আৰু পেছাদাৰী ব্যক্তি ৰাজনীতিলৈ আহিলে হয়তো অঞ্চলটোৰ উন্নয়নৰ ক্ষেত্ৰত নতুন দৃষ্টিভংগী আহিব পাৰে। বিশেষকৈ স্বাস্থ্য সেৱা, গ্ৰাম্য আন্তঃগাঁথনি আৰু নিয়োগৰ দৰে বিষয়বোৰত তেওঁৰ ভূমিকা গুৰুত্বপূৰ্ণ হ’ব পাৰে বুলি বহুতে ধাৰণা কৰিছে।
লালগোলাৰ বিভিন্ন প্ৰান্ত ঘূৰিলে দেখা যায় যে, যুৱ ভোটাৰসকলৰ মাজতো তেওঁৰ জনপ্ৰিয়তা বৃদ্ধি পাইছে। তেওঁলোকে ভাবে যে, পুৰণি ৰাজনৈতিক ধ্যান-ধাৰণাৰ পৰা ওলাই আহি নতুন প্ৰজন্মক প্ৰতিনিধিত্ব কৰিব পাৰিব আব্দুল আজিজে।
আনহাতে, বিৰোধী শিবিৰো বহি থকা নাই। তেওঁলোকেও নিজৰ সাংগঠনিক শক্তি আৰু পুৰণি ভোটবেংকৰ ওপৰত ভৰসা ৰাখি যুঁজ চলাই গৈছে। ফলস্বৰূপে, নিৰ্বাচনৰ ফলাফল কি হ’ব, সেয়া এতিয়াই নিশ্চিতভাৱে কোৱা টান।
অৱশ্যে এটা কথা স্পষ্ট যে, এই নিৰ্বাচনত লালগোলা সমষ্টিৰ অন্যতম চৰ্চিত মুখ হৈ পৰিছে ডাঃ আব্দুল আজিজ। এজন সাধাৰণ চিকিৎসকৰ পৰা জনতাৰ প্ৰাৰ্থী হৈ উঠাৰ এই যাত্ৰাই ইতিমধ্যে ৰাজনৈতিক মহলৰ দৃষ্টি আকৰ্ষণ কৰিছে।
এতিয়া লক্ষ্য কৰিবলগীয়া কথাটো হ'ল, এই উছাহ বেলট বাকচত কিমান দূৰ প্ৰতিফলিত হয়। কাৰণ শেষ পৰ্যায়ত গণতন্ত্ৰৰ আচল বিচাৰ নিৰ্বাচনৰ ফলাফলৰ জৰিয়তেহে হয়।
