সতীশ উপাধ্যায়ৰ সৈতে আফজল, মহম্মদ শ্বাহৰুখ, মহম্মদ আনীশ, মহম্মদ আমিৰ, আৰু মহম্মদ ৱাছিম
নতুন দিল্লী
বিপদ কেতিয়াও ধৰ্ম বা জাতি চাই নাহে আৰু প্ৰকৃত মানৱতাও কোনো সীমাৰেখাত আৱদ্ধ নহয়। দক্ষিণ দিল্লীৰ মালৱীয় নগৰত বুধবাৰে সংঘটিত হোৱা এক ভয়াৱহ অগ্নিকাণ্ডই সমগ্ৰ দেশ কঁপাই তুলিছে। এই দুৰ্ঘটনাত ১৭ গৰাকী বিদেশী নাগৰিকসহ ২১ জন লোকে কৰুণভাৱে প্ৰাণ হেৰুৱাবলগীয়া হয়। কিন্তু এই মৃত্যুৰ বিভীষিকা আৰু হাহাকাৰৰ মাজতে দেখিবলৈ পোৱা গ’ল মানৱতাৰ এক অনন্য নিদৰ্শন। তীব্ৰ উপস্থিত বুদ্ধি আৰু সামাজিক দায়িত্ববোধৰ পৰিচয় দি কেইবাজনো স্থানীয় মুছলমান যুৱকে দিল্লী আৰক্ষীৰ সৈতে হাতে হাত মিলাই হোটেলখনৰ ভিতৰত আৱদ্ধ হৈ থকা অতিথি আৰু আৱাসীসকলৰ প্ৰাণ ৰক্ষাৰ বাবে জঁপিয়াই পৰে।
এই স্থানীয় স্বেচ্ছাসেৱকসকলে হোটেল তথা গেষ্ট হাউচখনৰ ভিতৰত আৱদ্ধ হৈ থকা লোকসকলক বাহিৰলৈ উলিয়াই অনাত আৰক্ষী কৰ্মীসকলৰ সৈতে অহোপুৰুষাৰ্থ কৰে। তেওঁলোকে কেইবাগৰাকীও মূৰ্চ্ছিত ভুক্তভোগীক CPR প্ৰদান কৰে। CPR হৈছে এজন ব্যক্তিৰ উশাহ-নিশাহ বা হৃদস্পন্দন বন্ধ হ’লে প্ৰাণ ৰক্ষাৰ বাবে কৰা এক জৰুৰীকালীন চিকিৎসা পদ্ধতি। তেওঁলোকৰ এই সময়োচিত পদক্ষেপে বহু লোকৰ জীৱন ৰক্ষা কৰিলে আৰু মৃতকৰ সংখ্যা আৰু অধিক বৃদ্ধি হোৱাত বাধা দিলে বুলি ধাৰণা কৰা হৈছে।
আৰক্ষীৰ সূত্ৰ অনুসৰি, জ্বলন্ত অট্টালিকাটোৰ ভিতৰত জীৱন্ত অগ্নিপিণ্ডৰ মাজত আৱদ্ধ হৈ পৰা প্ৰায় ৪০ জন লোকক সুৰক্ষিতভাৱে উদ্ধাৰ কৰা হয়।
এই যুৱকসকলৰ এনে অসাধাৰণ প্ৰচেষ্টাক দিল্লীৰ বিজেপি নেতা সতীশ উপাধ্যায়ে তীব্ৰ প্ৰশংসা কৰে। তেওঁ মহম্মদ আফজল, মহম্মদ শ্বাহৰুখ, মহম্মদ অনীশ, মহম্মদ আমিৰ আৰু মহম্মদ ৱাছিমক তেওঁলোকৰ সাহস আৰু নিঃস্বাৰ্থ জনসেৱাৰ বাবে ৰাজহুৱাভাৱে স্বীকৃতি প্ৰদান কৰে। ইয়াৰ উপৰি তেওঁ উদ্ধাৰ অভিযানত বীৰত্বপূৰ্ণ ভূমিকা পালন কৰা দিল্লী আৰক্ষীৰ পাঁচগৰাকী কৰ্মী ক্ৰমে হেড কনষ্টেবল দীনেশ, কৰতাৰ সিং, দেশৰাজ, অজয় আৰু মীনাক বিশেষভাৱে প্ৰশংসা কৰে।
উপাধ্যায়ে কয় যে তেওঁ এইসকল লোকৰ নাম সন্মানীয় প্ৰশংসাপত্ৰৰ বাবে আৰক্ষী আয়ুক্তক পৰামৰ্শ দিব। স্থানীয় উদ্ধাৰকাৰীসকলৰ সৈতে মত বিনিময় কৰি তেওঁ তেওঁলোকৰ সাহসিকতা আৰু মানৱীয় দৃষ্টিভংগীৰ শলাগ লয়। তেওঁ তেওঁলোকক উদ্দেশ্যি কয়, "মই আপোনালোকক লৈ গৌৰৱান্বিত। আপোনালোকে CPR প্ৰদান কৰি আৰু উদ্ধাৰ কাৰ্যত সহায় কৰি বিদেশী নাগৰিকসহ বহু লোকৰ প্ৰাণ ৰক্ষা কৰিলে।"
উদ্ধাৰকাৰীসকলৰ ভিতৰত অন্যতম আছিল ৱাছিম ৰাজা। তেওঁ আৰু তেওঁৰ বন্ধু শ্বোয়াইব আৰু ইছৰাৰে কেনেকৈ জুয়ে আগুৰি ধৰা লোকসকলক সহায় কৰিবলৈ দৌৰি গৈছিল, সেই কথা বৰ্ণনা কৰি কয়- "আমি ওচৰৰে এখন দোকানৰ পৰা মেট্ৰেচ লৈ আনি মাটিত মেলি দিছিলোঁ যাতে মানুহে দ্বিতীয় আৰু তৃতীয় মহলাৰ পৰা জঁপিয়াব পাৰে। ইয়াৰ বাবেই বহু লোকৰ প্ৰাণ ৰক্ষা পৰিল।"
হাউজ ৰাণী গাঁৱৰ বাসিন্দা এই যুৱকসকলৰ সাহসিকতাক এতিয়া সকলোৱে ভূয়সী প্ৰশংসা কৰিছে। তেওঁলোকৰ এই কাৰ্যই ভাৰতবৰ্ষৰ প্ৰকৃত আদৰ্শক প্ৰতিফলিত কৰিছে, য’ত সংকটৰ সময়ত সকলো ধৰণৰ পাৰ্থক্য বা ভেদাভেদ পাহৰি মানৱতা সকলোৰে ওপৰত উদ্ভাসিত হৈ উঠে।
দক্ষিণ দিল্লীৰ অতি জনবসতিপূৰ্ণ হাউচ ৰাণী অঞ্চলৰ 'ফ্ল’ৰিশ্ব ষ্টে' নামৰ এখন বেড-এণ্ড-ব্ৰেকফাষ্ট হোটেলত এই অগ্নিকাণ্ড সংঘটিত হয়। এই জুইত অতি কমেও ২১ জন লোকৰ মৃত্যু হয়, যাৰ ভিতৰত ১১ গৰাকী বিদেশী নাগৰিক আছিল আৰু ইয়াৰে বেছিভাগেই মধ্য এছিয়া আৰু আফ্ৰিকান দেশৰ বাসিন্দা।
হোটেলখনত মূলতঃ ওচৰৰে বিখ্যাত মেক্স হাস্পতাললৈ চিকিৎসাৰ বাবে অহা ৰোগী আৰু তেওঁলোকৰ সহযোগীসকল আছিল। বিষয়াসকলে জনোৱা মতে, এই ভয়াৱহ ঘটনাত ৩৫ জন লোক গুৰুতৰভাৱে আহত হৈছে আৰু ইয়াৰে ১৯ জনৰ অৱস্থা সংকটজনক হোৱাত দিল্লীৰ বিভিন্ন হাস্পতালত চিকিৎসাধীন হৈ আছে।
প্ৰত্যক্ষদৰ্শীয়ে বৰ্ণনা কৰা মতে, জুইৰ শিখাই বহুমহলীয়া অট্টালিকাটো দ্ৰুতগতিত গ্ৰাস কৰাৰ লগে লগে তাত এক হাহাকাৰ আৰু আতংকময় পৰিৱেশৰ সৃষ্টি হয়। নিজৰ প্ৰাণ ৰক্ষা কৰাৰ বাবে কেইবাগৰাকী লোক ওপৰৰ মহলাৰ পৰা তললৈ জঁপিয়াবলৈ বাধ্য হয়।
স্থানীয় বাসিন্দা শ্বেৰ খানে কয় যে জুইকুৰা প্ৰথমতে সৰু যেন লাগিছিল যদিও চকুৰ প্ৰচাৰতে ই অনিয়ন্ত্ৰিতভাৱে বিয়পি পৰে। খানে সংবাদ সংস্থা ANI-ক জনায়ঃ "মই এখন দোকানলৈ গৈ থকাৰ সময়তে জুই প্ৰত্যক্ষ কৰিছিলোঁ। ই অতি দ্ৰুতগতিত বৃদ্ধি পাবলৈ ধৰিলে আৰু সোনকালেই ভিতৰত আৱদ্ধ হৈ থকা লোকসকলৰ বাবে ওলাই অহাৰ কোনো পথ নোহোৱা হৈ পৰিল। মানুহে মাটিত মেট্ৰেচ মেলি দিছিল আৰু কিছুমান লোকে তৃতীয় মহলাৰ পৰা জঁপিয়াই দিছিল, যাৰ ভিতৰত এজন ব্যক্তিয়ে কোলাত এটা সৰু কেঁচুৱা লৈ জঁপিয়াইছিল। এগৰাকী মহিলাৰ ভৰি ভাঙি যায়। জনসাধাৰণে সহায় কৰিবলৈ সাধ্যনুসৰি চেষ্টা কৰিছিল, কিন্তু পৰিস্থিতি ক্ৰমান্বয়ে অধিক ভয়ংকৰ হৈ পৰিছিল।"
আন এজন বাসিন্দা ওমে সেই ভয়ংকৰ দৃশ্য প্ৰত্যক্ষ কৰাৰ কথা সুঁৱৰি কয়ঃ "পুৱা প্ৰায় ৯:৩০ বজাত আমি এক ভয়াৱহ জুই দেখিবলৈ পাওঁ। মই আৰু মোৰ বন্ধুজন স্কুটীৰে সেইফালেদি পাৰ হৈ গৈ আছিলোঁ। সমগ্ৰ অট্টালিকাটো জুইৰ শিখাই আৱৰি ধৰিছিল আৰু মানুহে বিভিন্ন দিশৰ পৰা জঁপিয়াই আছিল। আমি অতি কমেও পাঁচজন লোকক জঁপিয়াই পৰা দেখিবলৈ পাইছিলোঁ। ইয়াৰে এজনৰ ভৰি ভঙা যেন লাগিছিল। পথটো সম্পূৰ্ণৰূপে বন্ধ হৈ পৰিছিল আৰু তাত এক বৃহৎ লোকে ভিৰ কৰিছিল।"
দিল্লী আৰক্ষীৰ মতে, প্ৰাণ হেৰুওৱা লোকসকলৰ ভিতৰত ১৫ জনতকৈও অধিক বিদেশী নাগৰিক। আৰক্ষী উপ-আযুক্ত (দক্ষিণ) অনন্ত মিট্টালে জনোৱা মতে, পুৱা ৮:৪৮ বজাত ফ্ল’ৰিশ্ব ষ্টে বি এণ্ড বি-ত জুই লগাৰ খবৰ লাভ কৰা হৈছিল, তাৰ পিছতে আৰক্ষীৰ দল আৰু জৰুৰীকালীন অগ্নি নিৰ্বাপক সেৱাৰ গাড়ী ঘটনাস্থলীলৈ ৰাওনা হয়। তেওঁ লগতে কয় যে উদ্ধাৰ আৰু তালাচী অভিযান কেইবা ঘণ্টাধৰি চলি আছিল আৰু আক্ৰান্তসকলক সহায় কৰিবলৈ তথা অগ্নিকাণ্ডৰ প্ৰকৃত কাৰণ অনুসন্ধান কৰিবলৈ সংশ্লিষ্ট সকলো চৰকাৰী সংস্থা ঘটনাস্থলীত নিয়োজিত হৈ আছে।
