এজবাষ্টন
ইংলেণ্ডৰ বিৰুদ্ধে দ্বিতীয় টেষ্টত দুৰ্দান্ত বলিঙেৰে ভাৰতৰ জয় সুনিশ্চিত কৰা উদীয়মান বেগী বলাৰ আকাশ দ্বীপে তেওঁৰ এই প্ৰদৰ্শন বিগত দুমাহ ধৰি কৰ্কট ৰোগত আক্ৰান্ত হোৱা ভগ্নীৰ নামত উৎসৰ্গা কৰিছে।
"যিমানবাৰ মই বলটো হাতত লৈছিলো, তেতিয়াই মোৰ ভগ্নীৰ চিন্তা মনলৈ আহিছিল। মই এই বিষয়ে কাৰো লগত কথা কোৱা নাই। প্ৰকৃতাৰ্থত দুমাহ পূৰ্বে মোৰ ভনীৰ কেন্সাৰ হোৱা বুলি চিনাক্ত হৈছিল। তেওঁ মোৰ প্ৰদৰ্শনৰ কথা জানি অতিশয় সুখী হ'ব আৰু ই তেওঁৰ মুখলৈ অলপ হ'লেও হাঁহি ঘূৰাই আনিব।"-আকাশ দ্বীপে কয়।
এজবাষ্টনত ভাৰতৰ ৩৩৬ ৰাণৰ বিজয়ত মুখ্য ভূমিকা গ্ৰহণ কৰি আকাশে দুয়োটা ইনিংছ মিলাই মুঠ ১০টা উইকেট দখল কৰিবলৈ সক্ষম হয়। বংগৰ ২৮ বছৰীয়া তাৰকাগৰাকীয়ে মূলতঃ বলাৰৰ বাবে বধ্যভূমি হৈ পৰা ট্ৰেকত জীৱনৰ শ্ৰেষ্ঠ প্ৰদৰ্শন দাঙি ধৰি ভাৰতৰ এক ঐতিহাসক জয়ৰ সোৱাদ দিয়ে।
"মেচখনত মই যেতিয়াই বল হাতত তুলি লৈছিলো, তেতিয়াই ভণ্টীৰ কথা মোৰ মনলৈ আহিছিল। বিদেশৰ মাটিত মোৰ এই প্ৰদৰ্শন ভণ্টীৰ নামত উৎসৰ্গা কৰিব বিচাৰিছো। মই তেওঁক ক'ব বিচাৰো, "ভণ্টী আমি সকলো তোমাৰ সৈতে আছো।"-জিঅ' হটষ্টাৰত চেতেশ্বৰ পূজাৰাৰ সৈতে কথা পাতি থাকোতে আকাশে এইদৰে কৈ নিজৰ আবেগ নিয়ন্ত্ৰণ কৰিছিল।
মেচখনত তেওঁ নিজৰ সকলো পৰিকল্পনা আৰু প্ৰক্ৰিয়াবোৰ সুন্দৰভাৱে কাৰ্যকৰী কৰিব পাৰিছে বাবে সুখী বুলি উল্লেখ কৰে। "মোৰ মূল লক্ষ্য আছিল বলৰ ছিম হাৰ্ড লেনথত পেলোৱা আৰু বলটো ভিতৰলৈ যাবলৈ দিয়া। জ' ৰুটৰ ক্ষেত্ৰত মোৰ লক্ষ্য আছিল ক্ৰিজৰ পৰা কিছু আঁতৰি গৈ বলটো ইনছুইং কৰা। হেৰী ব্ৰুকৰ ক্ষেত্ৰত, মই জানিছিলো যে তেওঁ বেকফুটত শক্তিশালী। সেয়ে বলৰ ছিম জোৰকৈ ক্ৰিজত পেলাই ইনছুইং কৰিব বিচাৰিছিলো।", তেওঁ ব্যাখ্যা কৰে।
অহা ১০-১৪ জুলাইৰ পৰা ঐতিহাসিক লৰ্ডছ ক্ৰিকেট গ্ৰাউণ্ডত অনুষ্ঠিত হ'বলগীয়া তৃতীয় টেষ্টক লৈ পৰিকল্পনাৰ কথা সোধাত আকাশ দ্বীপে কয় যে তেওঁ এই মুহূৰ্তত দ্বিতীয় টেষ্টৰ প্ৰদৰ্শনৰ সোৱাদ ল'ব বিচাৰে আৰু লৰ্ডছ ক্ৰিকেট গ্ৰাউণ্ডত খেলাৰ কথা একো চিন্তা কৰা নাই।
"মই লৰ্ডছৰ বাবে মোৰ পৰিকল্পনাৰ বিষয়ে এতিয়াই একো চিন্তা কৰা নাই। ইয়াতকৈ লৰ্ডছৰ উইকেট বৰ বেছি পৃথক নহ'ব। কেতিয়াবা ভবা মতে হয় আৰু কেতিয়াবা নহয়। আমাৰ কাম হ'ল আমাৰ শক্তি আৰু প্ৰক্ৰিয়াৰ ওপৰত গুৰুত্ব দিয়া আৰু নিজৰ ওপৰত বিশ্বাস ৰখা", তেওঁ কয়।
