এছিয়ান গেমছ ২০২৬: শ্বাসৰুদ্ধকৰ ফাইনেলত ইৰাণক পৰাস্ত কৰি ভাৰতীয় মহিলা কাবাডী দলৰ স্বৰ্ণ জয়
নতুন দিল্লী
জাপানৰ মাটিত অনুষ্ঠিত হৈ থকা ২০২৬ বৰ্ষৰ এছিয়ান গেমছত ভাৰতীয় ক্ৰীড়াবিদৰ দুৰ্দান্ত প্ৰদৰ্শন অব্যাহত আছে। শনিবাৰে প্ৰতিযোগিতাখনত ভাৰতলৈ আহিছে আন এক গৌৰৱোজ্জ্বল সাফল্য। এক উত্তেজনাময় ফাইনেল মেচত শক্তিশালী ইৰাণক পৰাস্ত কৰি ভাৰতীয় মহিলা কাবাডী দলে দেশলৈ কঢ়িয়াই আনিছে সন্মানীয় স্বৰ্ণ পদক।
শনিবাৰে অনুষ্ঠিত হোৱা এই মেগা ফাইনেলত ভাৰতীয় দলটোৱে আৰম্ভণিৰে পৰাই অত্যন্ত আক্ৰমণাত্মক কৌশল অৱলম্বন কৰে। খেলপথাৰত দপদপনি চলাই গোটেই মেচখনতে ভাৰতে নিজৰ আধিপত্য বজাই ৰাখিবলৈ সক্ষম হয়। প্ৰথমাৰ্ধৰ খেল সমাপ্ত হোৱাৰ সময়ত অৰ্থাৎ হাফটাইমত ভাৰতীয় দলটোৱে ২২ পইণ্ট সংগ্ৰহ কৰি এক শক্তিশালী অগ্ৰগতি লাভ কৰে। ইয়াৰ বিপৰীতে প্ৰতিদ্বন্দ্বী ইৰাণে লাভ কৰিবলৈ সক্ষম হয় ১৬ পইণ্ট।
খেলৰ দ্বিতীয়ার্ধত এক তীব্ৰ প্ৰতিদ্বন্দ্বিতা দেখিবলৈ পোৱা যায়। মেচখনৰ একেবাৰে অন্তিম মুহূৰ্তত ইৰাণৰ দলটোৱে এক শক্তিশালী প্ৰত্যাৱৰ্তনৰ চেষ্টা চলাই মেচখনলৈ ঘূৰি অহাৰ ইংগিত দিছিল। খেলখনৰ উত্তেজনা চৰম পৰ্যায় পাইছিলগৈ, কিন্তু ভাৰতীয় মহিলা দলটোৱে অলপো বিচলিত নহৈ নিজৰ মানসিক স্থিৰতা আৰু দক্ষতা অটুট ৰাখে। অৱশেষত সকলো জল্পনা-কল্পনাৰ অন্ত পেলাই ভাৰতীয় দলটোৱে সুন্দৰ প্ৰদৰ্শনৰ জৰিয়তে ৩৭-৩৪ পইণ্টৰ ব্যৱধানত ইৰাণক পৰাস্ত কৰি এছিয়ান গেমছৰ ইতিহাসত নিজৰ নাম সোণোৱালী আখৰেৰে খোদিত কৰে।
উল্লেখযোগ্য যে, মহিলা কাবাডী দলৰ এই অভূতপূৰ্ব সাফল্যই সমগ্ৰ দেশবাসীক গৌৰৱান্বিত কৰিছে। উল্লেখযোগ্য যে, মহিলা কাবাডী দলটোৱে অৰ্জন কৰা এইটো স্বৰ্ণ পদকৰ লগে লগে চলিত এছিয়ান গেমছত ভাৰতে লাভ কৰা মুঠ স্বৰ্ণ পদকৰ সংখ্যা তিনিটালৈ বৃদ্ধি পালে।
