নতুন দিল্লী
জাপানৰ আইচি নাগোয়াত অনুষ্ঠিত হৈ থকা এছিয়ান গেমছ ২০২৬ত ভাৰতীয় খেলুৱৈসকলে নিজৰ চমকপ্ৰদ প্ৰদৰ্শন অব্যাহত ৰাখিছে আৰু দেশলৈ গৌৰৱ কঢ়িয়াই আনিছে। বুধবাৰে ভাৰতে সোণৰ পদক জয় কৰি উল্লাসিত হোৱাৰ পিছত, বৃহস্পতিবাৰৰ দিনটোতো দেশৰ বাবে দুটাকৈ পদক জয়েৰে এক সুন্দৰ আৰু আশাৰ সঞ্চাৰ কৰা আৰম্ভণি ঘটে।
ক্ৰীড়াৰ ক্ষেত্ৰখনত মণিপুৰৰ আধিপত্য আৰু অৱদান পুনৰবাৰ প্ৰতিপন্ন হৈছে। বুধবাৰে মণিপুৰৰ সুযোগ্যা কন্যা তথা প্ৰসিদ্ধ ভাৰোত্তোলক মীৰাবাঈ চানুৱে দেশৰ হৈ স্বৰ্ণ পদক জয় কৰি ইতিহাস ৰচনা কৰাৰ পিছত, বৃহস্পতিবাৰে আন এগৰাকী মণিপুৰী কন্যাই দেশলৈ সুনাম কঢ়িয়াই আনিছে। তেওঁ হৈছে ভাৰতীয় তাৰকা উশ্বু এথলীট ৰোছিবিনা দেৱী। মহিলাৰ ৬০ কিলোগ্ৰাম শাখাৰ উশ্বু প্ৰতিযোগিতাৰ ফাইনেলত প্ৰৱেশ কৰি ৰোছিবিনাই ৰূপৰ পদক অৰ্জন কৰিবলৈ সক্ষম হয়।
ফাইনেলৰ তীব্ৰ প্ৰতিদ্বন্দ্বিতাপূৰ্ণ মেচখনত ২৫ বছৰীয়া ভাৰতীয় এথলীটগৰাকীয়ে চীনৰ শক্তিশালী প্ৰতিদ্বন্দ্বী জাং জিয়াওয়ুৰ মুখামুখি হয়। এই মেচখনত তেওঁ ০-২ ব্যৱধানত পৰাজয় বৰণ কৰে যদিও তেওঁৰ ৰূপৰ পদক জয়ে এক সুকীয়া অভিলেখ গঢ়িছে। উল্লেখযোগ্য যে, এছিয়ান গেমছৰ ইতিহাসত ৰোছিবিনাৰ এয়া হৈছে ক্ৰমাগত তৃতীয়টো পদক। ইয়াৰ পূৰ্বে তেওঁ ২০২৩ চনৰ এছিয়ান গেমছত ৰূপৰ পদক আৰু ২০১৮ চনৰ জাকাৰ্টা এছিয়ান গেমছত ব্ৰঞ্জৰ পদক জয় কৰিছিল। বিশেষভাৱে মন কৰিবলগীয়া যে, চলিত এছিয়ান গেমছত উশ্বু শাখাত পদক লাভ কৰা ৰোছিবিনাই হৈছে একমাত্ৰ ভাৰতীয় এথলীট।
ৰোছিবিনা দেৱীৰ এই পদক জয়ৰ লগে লগে চলিত বৰ্ষৰ এছিয়ান গেমছত ভাৰতৰ সামগ্ৰিক পদকৰ সংখ্যা ১৪টালৈ বৃদ্ধি পালে। বৰ্তমানলৈকে ভাৰতীয় দলে প্ৰদৰ্শন কৰা সুন্দৰ খেলৰ জৰিয়তে ১টা সোণ, ৬টা ৰূপ আৰু ৭টা ব্ৰঞ্জৰ পদক নিজৰ দখললৈ আনিবলৈ সক্ষম হৈছে।
খেলুৱৈসকলৰ এই ধাৰাবাহিক সাফল্য আৰু অদম্য স্পৃহাক সমগ্ৰ দেশে প্ৰশংসা কৰিছে। প্ৰধানমন্ত্ৰী নৰেন্দ্ৰ মোদীৰ কাৰ্যালয়ৰ পৰা এই সফলতাত খেলুৱৈসকললৈ বিশেষভাৱে অভিনন্দন জ্ঞাপন কৰা হৈছে। লগতে, কেন্দ্ৰীয় মন্ত্ৰী কিৰেণ ৰিজিজুৱেও খেলুৱৈসকলৰ এই গৌৰৱোজ্জ্বল প্ৰদৰ্শনৰ বাবে আন্তৰিক শুভেচ্ছা আৰু অভিনন্দন জনাইছে।
