শান্তিপ্ৰিয় ৰায়চৌধুৰী
অপেছাদাৰী বক্সিঙৰ প্ৰায় আটাইবোৰ গুৰুত্বপূৰ্ণ পদকেই লাভ কৰা এগৰাকী খেলুৱৈৰ বাবে কমনৱেলথ গেমছত পদক লাভ নকৰাটো নিশ্চয়কৈ বেদনাদায়ক। অলিম্পিকত ব্ৰঞ্জৰ পদক জয় কৰি ইতিহাস ৰচা অসম কন্যা লাভলীনা বৰগোহাঁয়ে এইবাৰ সেই আধৰুৱা সপোন পূৰণৰ লক্ষ্যৰে কঁকালত টঙালি বান্ধিছে। অহা জুলাই-আগষ্ট মাহত স্কটলেণ্ডৰ গ্লাছগোত অনুষ্ঠিত হ’বলগীয়া কমনৱেলথ গেমছত নিজৰ শ্ৰেষ্ঠত্ব প্ৰতিপন্ন কৰিবলৈ সাজু হৈছে লাভলীনা।
লাভলীনাই কয় যে, এই বছৰ কমনৱেলথ গেমছত পদক জয় কৰাটো তেওঁৰ অন্যতম “প্ৰধান লক্ষ্য”। ইয়াৰ বাবে তেওঁ নিজৰ খেলৰ কৌশল আৰু দৃষ্টিভংগীতো কিছু গুৰুত্বপূৰ্ণ পৰিৱৰ্তন আনিছে। “প্ৰতিটো পদকৰে নিজা এক সুকীয়া মূল্য আছে আৰু নিশ্চিতভাৱে মই মোৰ সাফল্যৰ তালিকাত কমনৱেলথ গেমছৰ এটি পদক সন্নিৱিষ্ট কৰিব বিচাৰো। এই বছৰ এয়া মোৰ অন্যতম প্ৰধান লক্ষ্য,” লাভলীনাই কয়।
লাভলীনা বৰগোহাঁই
একে সময়তে, তেওঁৰ লক্ষ্য কেৱল পদকৰ কথা ভবাটোৱেই নহয়, বৰং নিজৰ সৰ্বশ্ৰেষ্ঠ প্ৰদৰ্শন আগবঢ়োৱাটোহে। তেওঁৰ মতে, "মই যদি মোৰ সামৰ্থ্য অনুযায়ী খেলিব পাৰো, তেন্তে ফলাফল আপোনা-আপুনি আহিব।" ২৮ বছৰীয়া এই মিডল-ৱেট (৭৫ কেজি) বক্সাৰগৰাকীয়ে বক্সিঙৰ প্ৰায় প্ৰতিখন বৃহৎ প্ৰতিযোগিতাতেই পদক জয় কৰিবলৈ সক্ষম হৈছে। অলিম্পিক, বিশ্ব চেম্পিয়নশ্বিপ, এছিয়ান গেমছ, এছিয়ান চেম্পিয়নশ্বিপ আৰু মৰ্যাদাপূৰ্ণ ষ্ট্ৰেণ্ডজা মেম'ৰিয়েল টুৰ্নামেণ্টকে ধৰি আন বহুতো প্ৰতিযোগিতাত তেওঁ পদক অৰ্জন কৰিছে।
অৱশ্যে কমনৱেলথ গেমছৰ পদক জয়ৰ বাবে কৰা এই প্ৰচেষ্টা তেওঁৰ কেৰিয়াৰৰ এক অত্যন্ত গুৰুত্বপূৰ্ণ পৰ্যায়ত আহি পৰিছেহি। এসময়ত ধাৰাবাহিকভাৱে উন্নত প্ৰদৰ্শন কৰা লাভলীনাৰ ফলাফল ২০২৩ চনত বিশ্ব চেম্পিয়ন হোৱাৰ পিছৰে পৰা আন্তঃৰাষ্ট্ৰীয় পৰ্যায়ত কিছু অনিয়মীয়া হৈ পৰা দেখা গৈছে।
পেৰিছ অলিম্পিকত নিৰাশাজনক প্ৰদৰ্শনৰ পিছত তেওঁ প্ৰতিযোগিতামূলক বক্সিঙৰ পৰা এবছৰৰ বিৰতি লৈছিল। কিন্তু যোৱা বছৰৰ বিশ্ব চেম্পিয়নশ্বিপত প্ৰত্যাৱৰ্তন কৰি তেওঁ পুনৰ পদক জয় কৰিবলৈ ব্যৰ্থ হয়। চলিত বৰ্ষত স্পেইনত অনুষ্ঠিত বক্সাম এলিট ইণ্টাৰনেচনেল টুৰ্নামেণ্টত স্বৰ্ণ পদক জয় কৰাৰ পিছত তেওঁ এছিয়ান চেম্পিয়নশ্বিপৰ পৰা অতি সোনকালেই বিদায় ল'বলগীয়া হয়।
লাভলীনা বৰগোহাঁই
অসমৰ এইগৰাকী তাৰকা বক্সাৰে স্বীকাৰ কৰিছে যে তেওঁৰ শেহতীয়া ফলাফল নিজৰ প্ৰত্যাশাতকৈ বহু গুণে কম আছিল। কিন্তু এই ফলাফলে তেওঁক নিজৰ ক্ৰীড়া কৌশল পুংখানুপুংখভাৱে পুনৰ্মূল্যায়ন কৰিবলৈ এক প্ৰয়োজনীয় শিক্ষা প্ৰদান কৰিছে।
“মই কেইটামান কাৰিকৰী আৰু কৌশলগত দিশ চিহ্নিত কৰিছো, বিশেষকৈ সমগ্ৰ খেলখনত ধাৰাবাহিকতা বজাই ৰখাৰ বিষয়টো। সেই অভিজ্ঞতাবোৰে মোক বুজাত সহায় কৰিছে যে মই কোনবোৰ দিশত উন্নতি কৰা প্ৰয়োজন, আৰু বৰ্তমান প্ৰশিক্ষণৰ সময়ত সেই ক্ষেত্ৰবোৰৰ ওপৰতেই মই অধিক গুৰুত্ব আৰোপ কৰিছো,” তেওঁ এইদৰে বৰ্ণনা কৰে।
সেই পুনৰ্গঠন প্ৰক্ৰিয়াৰ এক উল্লেখযোগ্য অংশ নতুন মুখ্য প্ৰশিক্ষক ছাণ্টিয়াগো নিয়েভাৰ তত্ত্বাৱধানত সম্পন্ন হৈছে। লাভলীনাৰ মতে, নিয়েভাই এক নতুন দৃষ্টিভংগী কঢ়িয়াই আনিছে। “বৰ্তমান মোৰ সম্পূৰ্ণ মনোযোগ ফুটৱৰ্ক, টাইমিং, ডিফেঞ্চ আৰু কম্বিনেচন পাঞ্চিং উন্নত কৰাৰ ওপৰত নিবদ্ধ। চাপৰ মুহূৰ্তত অধিক সঠিক সিদ্ধান্ত গ্ৰহণ কৰিব পৰাকৈয়ো মই কাম কৰি আছো, যাতে মই বিভিন্ন প্ৰতিদ্বন্দ্বীৰ বিৰুদ্ধে অধিক কাৰ্যকৰীভাৱে নিজকে খাপ খুৱাই ল'ব পাৰো।”
লাভলীনা বৰগোহাঁই
ৱেল্টাৰৱেট (৬৯ কেজি) বিভাগৰ পৰা ৭৫ কেজি বিভাগলৈ অহা এই পৰিৱৰ্তনতো উল্লেখযোগ্য সালসলনিৰ প্ৰয়োজন হৈছিল, যিটো বিভাগত তেওঁ আটাইতকৈ বেছি সফলতা অৰ্জন কৰিছিল। ২০২২ চনত লাভলীনাই তেওঁৰ শাৰীৰিক গঠন আৰু খেলত শক্তি বৃদ্ধি কৰিছিল, আৰু লগতে এইটোও নিশ্চিত কৰিবলৈ চেষ্টা কৰিছিল যে তেওঁৰ গতি আৰু সঞ্চালন (যিটো দীৰ্ঘদিন ধৰি তেওঁৰ মূল শক্তি আছিল), সেয়া যাতে কোনো কাৰণতে প্ৰভাৱিত নহয়।
লাভলীনাই কয়, "মোৰ বাবে আটাইতকৈ ডাঙৰ প্ৰত্যাহ্বান আছিল শক্তি আৰু গতিৰ মাজত ভাৰসাম্য ৰক্ষা কৰা। গধুৰ ওজনৰ বিভাগত অধিক শক্তিৰ প্ৰয়োজন হয়, কিন্তু মই মোৰ সেই গতি আৰু সঞ্চালন শক্তি হেৰুৱাব বিচৰা নাছিলো, যিটো সদায়েই মোৰ প্ৰধান অস্ত্ৰ হৈ আহিছে।" তেওঁ লগতে কয়, “সেই ভাৰসাম্য বজাই ৰখাৰ বাবে মই গতি-কেন্দ্ৰিক প্ৰশিক্ষণৰ সমান্তৰালভাৱে শক্তি আৰু শাৰীৰিক সক্ষমতা বৃদ্ধিৰ ওপৰতো যথেষ্ট কাম কৰিছো।”
ভাৰতৰ অন্যতম শ্ৰেষ্ঠ বক্সাৰ হোৱাৰ সুবাদত, প্ৰত্যাশাৰ চাপে তেওঁক প্ৰতিখন প্ৰতিযোগিতাতেই অনুসৰণ কৰে। গ্লাছগো কমনৱেলথ গেমছো ইয়াৰ ব্যতিক্ৰম নহ’ব, য’ত ইংলেণ্ড, অষ্ট্ৰেলিয়া, কানাডা আৰু আয়োজক স্কটলেণ্ডৰ বক্সাৰসকলে কঠিন প্ৰতিদ্বন্দ্বিতা গঢ়ি তুলিব বুলি আশা কৰা হৈছে। কিন্তু লাভলীনাই কয়, "অভিজ্ঞতাই মোক চাপৰ সৈতে মোকাবিলা কৰিবলৈ শিকাইছে। এগৰাকী শীৰ্ষস্থানীয় ক্ৰীড়াবিদ হোৱাৰ এটা অংশই হ’ল চাপ আৰু মই তাক আঁকোৱালি ল'বলৈ শিকিছো। মই প্ৰত্যাশাৰ পৰিৱৰ্তে প্ৰক্ৰিয়াটোৰ ওপৰত মনোযোগ দিয়াৰ চেষ্টা কৰো।"
শেষত লাভলীনাই এক যোগাত্মক দৃষ্টিভংগীৰে কয়, "মোৰ মূল লক্ষ্য হ’ল প্ৰতিদিনে সুন্দৰভাৱে প্ৰস্তুতি চলোৱা, নিজৰ প্ৰশিক্ষণৰ ওপৰত আস্থা ৰখা আৰু মানসিকভাৱে শান্ত হৈ থকা। মোৰ প্ৰশিক্ষক, পৰিয়াল আৰু সতীৰ্থসকলৰ অটুট সমৰ্থন আৰু মৰমে মোক সদায় অনুপ্ৰাণিত আৰু আত্মবিশ্বাসী হৈ থকাত সহায় কৰে।" আশা কৰা হৈছে যে অসম গৌৰৱ লাভলীনাৰ এই অদম্য জেদ আৰু একাগ্ৰতাই গ্লাছগোৰ ৰিঙত নতুন ইতিহাস ৰচিব আৰু কমনৱেলথৰ পদকৰে তেওঁ সমগ্ৰ দেশবাসীৰ লগতে অসমবাসীক পুনৰবাৰ গৌৰৱান্বিত কৰিব।
.webp)