অনিকা মহেশ্বৰী / নতুন দিল্লী
ঝাঁছীৰ ২৮ বছৰীয়া বক্সাৰ ইমৰোজ খানে (Imroz Khan) বিশ্ব আৰক্ষী গেমছ (World Police Games)ত সোণৰ পদক অৰ্জন কৰি সমগ্ৰ দেশলৈ গৌৰৱ কঢ়িয়াই আনিছে। বক্সিঙৰ ৭০ কেজি ইভেণ্টৰ ফাইনেলত তেওঁ আমেৰিকান বক্সাৰ জ্যানেট জনছনৰ বিৰুদ্ধে ৫-০ৰ ব্যৱধানত জয়ী হয়।
এক ছ'চিয়েল মিডিয়া পোষ্টত তেওঁ লিখিছে, 'দেশৰ হৈ স্বৰ্ণ পদক জয় কৰিবলৈ পাই মই অতিশয় সুখী। মই অলিম্পিকত খেলাৰ সপোন পুহি ৰাখিছো। মোৰ পিতৃ-মাতৃও বৰ সুখী, আৰু তেওঁলোকৰ সুখৰ বাবেই মই খেলিবলৈ আৰম্ভ কৰিছিলো।'
উল্লেখ্য যে, ইমৰোজ খান ঝাঁছী (Jhansi)ৰ পুৰণি চহৰ চানিয়ানপুৰাৰ বাসিন্দা। তেওঁৰ পিতৃ এজন টিভি মেকানিক আৰু মাতৃ এগৰাকী গৃহিনী। তেওঁ হকীৰে তেওঁৰ ক্ৰীড়া যাত্ৰা আৰম্ভ কৰিছিল আৰু পিছত বক্সিঙৰ জগতত প্ৰৱেশ কৰে। নিজৰ জন্মস্থানত তেওঁ হকীৰ প্ৰশিক্ষণ গ্ৰহণ কৰিছিল।
তেওঁক ক্ৰীড়া কোটাৰ জৰিয়তে কেন্দ্ৰীয় ঔদ্যোগিক সুৰক্ষা বাহিনী (চিআইএছএফ) ৰ বাবে নিৰ্বাচিত কৰা হৈছিল আৰু বৰ্তমান তেওঁক বেংগালুৰু বিমানবন্দৰত নিযুক্তি দিয়া হৈছে। বক্সিং দক্ষতা আৰু অধিক উন্নত কৰিবলৈ তেওঁ হৰিদ্বাৰৰ কেন্দ্ৰীয় বক্সিং দলৰ সৈতে প্ৰশিক্ষণ লয়।
ঝাঁছীৰ আঞ্চলিক ক্ৰীড়া বিষয়া সুৰেশ বোনকাৰে কয় যে চিআইএছএফৰ দ্বাৰা নিৰ্বাচিত নোহোৱা পৰ্যন্ত ইমৰোজ খানে ঝাঁছীৰ ধ্যান চান্দ ষ্টেডিয়ামত নিয়মিতভাৱে প্ৰশিক্ষণ লৈছিল। তেওঁ ৰাষ্ট্ৰীয় পৰ্যায়ৰ বহু প্ৰতিযোগিতাত নিজৰ চহৰ আৰু ৰাজ্য উভয়কে প্ৰতিনিধিত্ব কৰিছে আৰু এগৰাকী শৃংখলাবদ্ধ আৰু নিষ্ঠাৱান এথলীট হিচাপে জনাজাত।
উল্লেখ্য যে, বিশ্ব আৰক্ষী গেমছ ২৭ জুনৰ পৰা ৬ জুলাইলৈ আমেৰিকাৰ বাৰ্মিংহামত অনুষ্ঠিত হৈছিল।
