গুৱাহাটী
ষোড়শ অসম বিধানসভাৰ শীতকালীন অধিৱেশন ১৪ ডিচেম্বৰৰ পৰা আৰম্ভ হ’ব। অসম বিধানসভা সচিবালয়ে জাৰি কৰা এক অধিসূচনা অনুসৰি, ৰাজ্যপাল লক্ষ্মণ প্ৰসাদ আচাৰ্যই ১৪ ডিচেম্বৰৰ পুৱা ৯.৩০ বজাত দিছপুৰৰ বিধানসভা কক্ষত ষোড়শ অসম বিধানসভাৰ শীতকালীন অধিৱেশন আহ্বান কৰিছে।
অধিসূচনাখনত কোৱা হৈছে, “এতিয়ালৈকে সংশোধিত ভাৰতৰ সংবিধানৰ ১৭৪ নং অনুচ্ছেদৰ দফা (১)-এ প্ৰদান কৰা ক্ষমতা প্ৰয়োগ কৰি মই, অসমৰ ৰাজ্যপাল শ্ৰী লক্ষ্মণ প্ৰসাদ আচাৰ্যই, ইয়াৰ দ্বাৰা ২০২৬ চনৰ ১৪ ডিচেম্বৰ, সোমবাৰে পুৱা ৯.৩০ বজাত দিছপুৰৰ বিধানসভা কক্ষত মিলিত হ’বলৈ ষোড়শ অসম বিধানসভাৰ শীতকালীন অধিৱেশন আহ্বান কৰিছোঁ।”
আগন্তুক অধিৱেশনখন হ’ব ষোড়শ অসম বিধানসভাৰ তৃতীয়খন অধিৱেশন। এই অধিৱেশনত কেইবাখনো গুৰুত্বপূৰ্ণ বিধেয়কৰ লগতে ২০২৬-২৭ বিত্তীয় বৰ্ষৰ পৰিপূৰক বাজেট উত্থাপন কৰাৰ সম্ভাৱনা আছে।
ইফালে, মঙলবাৰে অসমৰ মুখ্যমন্ত্ৰী হিমন্ত বিশ্ব শৰ্মাই ৰাজ্যিক কেবিনেটৰ বৈঠকত গ্ৰহণ কৰা একাধিক সিদ্ধান্ত ঘোষণা কৰে। ইয়াৰ ভিতৰত আয়ুষ্মান অসম যোজনা অব্যাহত ৰখাৰ বাবে ২০০ কোটি টকা আৰু প্ৰজ্ঞান ভাৰতী আঁচনিৰ অধীনত শিক্ষাৰ্থীসকলৰ মহাবিদ্যালয়ত বিনামূলীয়া নামভৰ্তিৰ বাবে ১০৮.৮১ কোটি টকা আবণ্টনৰ সিদ্ধান্তও আছে।
এক্সত প্ৰকাশ কৰা এটা পোষ্টত মুখ্যমন্ত্ৰীয়ে জনায় যে কেবিনেটে সমগ্ৰ শিক্ষা অভিযানৰ (এছএছএ) কৰ্মচাৰীসকলৰ পৰিয়ালৰ বাবে এককালীন অনুদান বৃদ্ধি, বিদ্যালয়ৰ শিকন-শিক্ষণ সামগ্ৰী ক্ৰয় ব্যৱস্থাৰ উন্নতি আৰু ৰাজ্যত সংস্কৃত অধ্যয়ন অধিক শক্তিশালী কৰাৰ ব্যৱস্থাতো অনুমোদন জনাইছে।
তেওঁ লিখিছে, “আজিৰ #AssamCabinet বৈঠকত আমি আয়ুষ্মান অসম যোজনা অব্যাহত ৰখাৰ বাবে ২০০ কোটি টকা, মহাবিদ্যালয়ত বিনামূলীয়া নামভৰ্তিৰ বাবে ১০৮ কোটি টকা, এছএছএৰ কৰ্মচাৰীসকলৰ বাবে এককালীন অনুদান বৃদ্ধি, বিদ্যালয়ৰ শিকন-শিক্ষণ সামগ্ৰী ক্ৰয়ৰ উন্নত ব্যৱস্থা আৰু সংস্কৃত অধ্যয়নত অধিক প্ৰসাৰ দিয়াৰ সিদ্ধান্তত অনুমোদন জনাইছোঁ।”
কেবিনেটৰ সিদ্ধান্তসমূহ ঘোষণা কৰি মুখ্যমন্ত্ৰী হিমন্ত বিশ্ব শৰ্মাই কয় যে অসমৰ ৪০ লাখৰো অধিক পৰিয়ালৰ বাবে সহজলভ্য স্বাস্থ্যসেৱা নিশ্চিত কৰাৰ দিশত এক গুৰুত্বপূৰ্ণ পদক্ষেপ হিচাপে ৰাজ্যিক কেবিনেটে আয়ুষ্মান অসম আঁচনি ৰূপায়ণৰ বাবে ২০০ কোটি টকা আবণ্টনত অনুমোদন জনাইছে। এই পদক্ষেপৰ লক্ষ্য হৈছে স্বাস্থ্যসেৱাৰ সুবিধাসমূহ অব্যাহত ৰখা আৰু ৰাজ্যৰ স্বাস্থ্য সুৰক্ষা ব্যৱস্থা অধিক শক্তিশালী কৰা।
