গুৱাহাটী
অসম চৰকাৰে ঘোষণা কৰিছে যে, অহা শিক্ষাবৰ্ষৰ পৰা ড° বাণীকান্ত কাকতি মেধা বঁটা আঁচনিৰ অধীনত মেধাৱী শিক্ষাৰ্থীসকলক স্কুটী প্ৰদানৰ ব্যৱস্থা বন্ধ কৰা হ'ব।
শুকুৰবাৰে (১০ জুলাই) ২০২৬–২৭ বৰ্ষৰ ৰাজ্যিক বাজেট দাখিল কৰি বিত্তমন্ত্ৰী জয়ন্ত মল্ল বৰুৱাই কয় যে, চলিত বৰ্ষত প্ৰায় ১৮ হাজাৰ শিক্ষাৰ্থীক স্কুটী প্ৰদান কৰা হ'ব। ইয়াৰ পিছতেই এই আঁচনি সমাপ্ত কৰা হ'ব। এই আঁচনিৰ বাবে ব্যয় হোৱা ধন শিক্ষাৰ্থী কল্যাণমূলক আন কেইবাটাও আঁচনি অধিক বিস্তৃত কৰাৰ ক্ষেত্ৰত ব্যৱহাৰ কৰা হ'ব।
বাজেটত লগতে ঘোষণা কৰা হৈছে যে, নিজুত মইনা আৰু নিজুত বাবু আঁচনি অহা আগষ্ট মাহৰ পৰা পুনৰ আৰম্ভ কৰা হ'ব। এতিয়ালৈকে এই দুয়োটা আঁচনিৰ জৰিয়তে ৫.৪৪ লাখতকৈ অধিক ছাত্ৰী উপকৃত হৈছে আৰু ইতিমধ্যে ৩৭৪ কোটি টকা বিতৰণ কৰা হৈছে। চলিত বিত্তীয় বৰ্ষত প্ৰায় ৫.৩০ লাখ শিক্ষাৰ্থীক এই আঁচনিৰ অধীনত আৰ্থিক সহায় আগবঢ়োৱাৰ লক্ষ্য কৰা হৈছে।
ইয়াৰোপৰিও, ৰাজ্যৰ সত্ৰসমূহৰ সৈতে জড়িত ৬২১ জন উদাসীন ভকতক পুনৰ মাহিলী ১,৫০০ টকাকৈ আৰ্থিক সহায় প্ৰদান কৰা হ'ব বুলি ঘোষণা কৰা হৈছে।
আনহাতে, ক্ষুদ্ৰ আৰু প্ৰান্তীয় কৃষকসকলৰ বাবে মুখ্যমন্ত্ৰী কৃষি সা-সঁজুলি যোজনা অব্যাহত থাকিব। এই আঁচনিৰ অধীনত যোগ্য হিতাধিকাৰীক বছৰি ১১ হাজাৰ টকা আৰ্থিক সহায় আগবঢ়োৱা হ'ব।
চৰকাৰৰ মতে, স্কুটী বিতৰণ আঁচনি বন্ধ কৰাৰ সিদ্ধান্তৰ মূল উদ্দেশ্য হৈছে ৰাজ্যৰ অধিক সংখ্যক শিক্ষাৰ্থীক সামৰি অধিক বিস্তৃত আৰু সুষম শিক্ষামূলক সহায় আগবঢ়োৱা।
