লক্ষ্ণৌ
অবৈধ ধৰ্মান্তৰকৰণৰ বিস্তৃত নেটৱৰ্ক আৰু অবৈধ ধনৰ ব্যাপক সঞ্চয়ৰ তথ্য প্ৰকাশ পোৱাৰ পিছত কৰিমুল্লা শ্বাহ নামেৰেও পৰিচিত ছাংগুৰ বাবাৰ বিৰুদ্ধে ধন সৰবৰাহৰ তদন্ত আৰম্ভ কৰিছে প্ৰৱর্তনকাৰী সঞ্চালকালয়ে।
বিষয়াসকলে জনোৱা মতে, বিশেষকৈ অনুসূচিত জাতি আৰু অৰ্থনৈতিকভাৱে দুৰ্বল শ্ৰেণীক লক্ষ্য কৰি বিদেশী পুঁজি আৰু প্ৰৱঞ্চনামূলক উপায় ব্যৱহাৰ কৰি গণ ধৰ্মান্তৰকৰণৰ প্ৰচাৰৰ কৰি ছাংগুৰ বাবাই ১০০ কোটিৰো অধিক মূল্যৰ সম্পত্তি সংগ্ৰহ কৰিছিল।
উত্তৰ প্ৰদেশ সন্ত্ৰাসবাদ বিৰোধী দলে (এটিএছ) বিতং অভিযোগৰ পিছত ৯ জুলাইত প্ৰৱর্তনকাৰী সঞ্চালকালয়ে বলবৎকাৰী গোচৰৰ তথ্য প্ৰতিবেদন (ইচিআইআৰ) পঞ্জীয়ন কৰে।
ইয়াৰ পিছতে সংস্থাটোৱে চান্দ আউলিয়া দৰগাহৰ চৌহদৰ পৰাই আয়োজন কৰা বুলি কোৱা ধৰ্মান্তৰকৰণ ৰেকেটৰ সৈতে জড়িত ধন সৰবৰাহৰ অপৰাধৰ তদন্ত আৰম্ভ কৰিছে।
কেছ ফাইলত উল্লেখ কৰা অনুসৰি ছাংগুৰ বাবাই ধৰ্মীয় আলোচনা, মানসিক নিয়ন্ত্রণ, শিজৰা-ই-তৈয়াবা নামৰ কিতাপ এখন প্ৰকাশ কৰি মানুহক প্ৰভাৱিত কৰাৰ লগতে বিশেষকৈ হিন্দু আৰু অসুবিধাগ্ৰস্ত সম্প্ৰদায়ৰ মাজত ইছলাম প্ৰচাৰৰ বাবে ব্যৱহাৰ কৰে।
প্ৰৱর্তনকাৰী সঞ্চালকালয়ে দেখিছে যে ছাংগুৰ বাবাই ভাৰতীয় আৰু বিদেশী নাগৰিকক জড়িত কৰি এক বিস্তৃত নেটৱৰ্ক গঢ়ি তুলিছিল। খবৰ অনুসৰি তেওঁ দৰগাহত বৃহৎ সমাৱেশৰ আয়োজন কৰে আৰু বিদেশী অৱদান -- মূলতঃ মধ্যপ্ৰাচ্যৰ পৰা -- নিজৰ কাৰ্য্যকলাপ সম্প্ৰসাৰণৰ বাবে ব্যৱহাৰ কৰে।
যোৱা ৫ জুলাইত লক্ষ্ণৌৰ এখন হোটেলৰ পৰা এ টি এছে তেওঁক আৰু তেওঁৰ সহযোগী নীতু ওৰফে নাছৰিনক গ্ৰেপ্তাৰ কৰিছিল। বৰ্তমান দুয়োজনেই ১৬ জুলাইলৈকে জিম্মাত আছে।
বিষয়াসকলৰ মতে, ছাংগুৰ বাবাই ১০৬ কোটি টকা থকা ৪০টা বেংক একাউণ্ট চলাই আছে, ইয়াৰে অধিকাংশ ধন উপসাগৰীয় ৰাষ্ট্ৰৰ পৰাই আহে।
প্ৰৱর্তনকাৰী সঞ্চালকালয়ে এটিএছ আৰু বলৰামপুৰৰ জিলা দণ্ডাধীশৰ পৰা বিতং তথ্য বিচাৰিছে, চাৰ্তিফাইদ এফআইআৰ কপি, সংশ্লিষ্ট সত্তাৰ তালিকা, বেংক একাউণ্টৰ তথ্য, আৰু স্থাৱৰ আৰু অস্থাৱৰ সম্পত্তিৰ ৰেকৰ্ড বিচাৰিছে। সংশ্লিষ্ট বেংকৰ এণ্টি মানি লণ্ডৰিং (এএমএল) কোষলৈও একাউণ্ট ষ্টেটমেণ্ট সংগ্ৰহৰ বাবে ইমেইল প্ৰেৰণ কৰা হৈছে।
মধুপুৰৰ বাসগৃহৰ কিছু অংশ আৰু অন্যান্য সম্পত্তিকে ধৰি ছাংগুৰ বাবা আৰু তেওঁৰ সহযোগীসকলৰ সৈতে জড়িত অবৈধভাৱে নিৰ্মিত সম্পত্তিৰ বিৰুদ্ধে জিলা প্ৰশাসনে ভাঙি পেলোৱাৰ কাৰ্য আৰম্ভ কৰিছে।
তদন্তত দেখা গ’ল যে তেওঁ বাহৰেইচ-বালৰামপুৰ অঞ্চলত মাটি ক্ৰয় কৰি প্ৰয়োজনীয় ভূমি ব্যৱহাৰ ৰূপান্তৰ অনুমোদন অবিহনে আৱাসিক, বাণিজ্যিক, আৰু প্ৰতিষ্ঠানিক অট্টালিকা নিৰ্মাণ কৰিছিল।
ইয়াৰ পূৰ্বে উত্তৰ প্ৰদেশৰ এটিএছে বৃহৎ পৰিসৰৰ অবৈধ ধৰ্মান্তৰকৰণ ৰেকেট বুলি কোৱা কথাটো উন্মোচন কৰিছিল। আৰক্ষী সূত্ৰইন জনোৱা মতে, ছাংগুৰ বাবাই ১৫০০ৰো অধিক হিন্দু মহিলা আৰু আন হাজাৰ হাজাৰ অমুছলমানক জোৰ-জবৰদস্তি আৰু প্ৰৰোচনাৰ জৰিয়তে ইছলাম ধৰ্মলৈ ধৰ্মান্তৰিত কৰাৰ অভিযোগ উত্থাপন হৈছে।
বলৰামপুৰ জিলাৰ মাধপুৰ গাঁৱৰ ছাংগুৰ বাবাই ভাবুকি আৰু প্ৰলোভনৰ সংমিশ্ৰণ ব্যৱহাৰ কৰি দৰিদ্ৰ, বিধৱা, আৰু দুৰ্বল ব্যক্তিক লক্ষ্য কৰি লোৱা বুলি অভিযোগ উঠিছে।
তেওঁৰ কাৰ্য্যকলাপৰ বিষয়ে বিশ্বাসযোগ্য চোৰাংচোৱাৰ তথ্যই এটিএছৰ তদন্তৰ সূচনা কৰিছিল। বহু কথিত ভুক্তভোগীয়ে আগবাঢ়ি আহিবলৈ দ্বিধাবোধ কৰি আছে। বিষয়াসকলে কয় যে তেওঁৰ নেটৱৰ্ক ভাৰতৰ ৰাজ্যসমূহত সম্প্ৰসাৰিত হৈ ডুবাইকে ধৰি আন্তঃৰাষ্ট্ৰীয় স্থানসমূহত উপনীত হৈছে।
মহাৰাষ্ট্ৰৰ বিশেষকৈ মুম্বাইৰ আশে-পাশে থকা দৰগাহৰ পৰাও তেওঁ আঙঠি বিক্ৰীক ব্যৱহাৰ কৰি ধৰ্মান্তৰকৰণৰ সৈতে জড়িত কাৰ্য্যকলাপ চলাইছিল বুলি জানিব পৰা গৈছে।
চান্দ আউলিয়া দৰগাহত বাৰ্ষিক উৰুছৰ সমাৱেশৰ সময়ত তেওঁ বিদেশী অতিথিক আতিথ্য প্ৰদান কৰে আৰু উপস্থিতসকলক ধৰ্মান্তৰকৰণ কাৰ্যসূচীত প্ৰলোভিত কৰে বুলি অভিযোগ উঠিছে।
তদন্তকাৰীয়ে কয় যে তেওঁ বলৰামপুৰ আৰু ইয়াৰ আশে-পাশে থকা অঞ্চলত ইছলামিক ডাৱাহ কেন্দ্ৰ আৰু মাদ্ৰাছা স্থাপন কৰি অঞ্চলটোৰ জনগাঁথনিগত প্ৰফাইল সলনি কৰাৰ লক্ষ্য লৈছিল। কৰ্তৃপক্ষই আৰু দাবী কৰে যে তেওঁ স্থানীয় আৰক্ষী আৰু চোৰাংচোৱা বিষয়াক উৎকোচ দিছিল যাতে তদন্তৰ পৰা হাত সাৰিব পাৰে আৰু বিৰোধীসকলক নীৰৱ কৰিবলৈ ভুৱা গোচৰ ব্যৱহাৰ কৰিছিল।
ইতিমধ্যে ছাংগুৰ বাবাৰ পুত্ৰ নবীন ওৰফে জামালুদ্দিন আৰু আন এজন সহযোগী মেহবুব গ্ৰেপ্তাৰ হৈ লক্ষ্ণৌ জিলা কাৰাগাৰত আছে। অভিযোগ অনুসৰি নবীনে ডুবাইৰ পৰা ধন ব্যৱহাৰ কৰি মাটি ক্ৰয় কৰাৰ লগতে চুইজাৰলেণ্ডৰ বেংকত একাউণ্ট ৰাখিছিল।
বিদেশী পুঁজিৰ পথ বিচাৰি উলিয়াবলৈ চোৰাংচোৱা ব্যুৰো (আই বি) আৰু ৰাষ্ট্ৰীয় অনুসন্ধান সংস্থাই তদন্তত যোগদান কৰাৰ সম্ভাৱনা আছে। আন্তঃৰাষ্ট্ৰীয় লেনদেনৰ ৰেকৰ্ড আৰু তেওঁৰ বহল নেটৱৰ্কৰ সবিশেষ উন্মোচন কৰিবলৈ ছাংগুৰ বাবাৰ পৰা জব্দ কৰা ডিজিটেল ডিভাইচসমূহ পৰীক্ষা কৰি আছে এটিএছৰ বিষয়াসকলে।
মুখ্যমন্ত্রী যোগী আদিত্যনাথে ছাংগুৰ বাবাৰ কার্যকলাপক কেৱল অসামাজিক নহয়, জাতিবিৰোধী বুলি অভিহিত কৰিছে৷ ইতিমধ্যে ৰাজ্য চৰকাৰে বুলডজাৰ ব্যৱহাৰ কৰি তেওঁৰ বলৰামপুৰৰ বাসগৃহ ভাঙি পেলাইছে।
বিষয়াসকলে লগতে কয় যে ডুবাইত এগৰাকী নাবালিকা ছোৱালী -- নবীন আৰু নিতুৰ কন্যাক -- ধৰ্মান্তৰিত হোৱাৰ অভিযোগ উঠিছে যদিও চৰকাৰী ৰেকৰ্ডত সম্ভৱতঃ আইনী পৰিণতিৰ পৰা হাত সাৰিবলৈ এতিয়াও তেওঁক হিন্দু বুলি দেখুওৱা হৈছে।
