গুৱাহাটী
গুৱাহাটীৰ এখন হোটেলত সংঘটিত ভয়ংকৰ গুলীচালনাৰ ঘটনাত ৫জন লোক নিহত আৰু ১ জন আহত হোৱাৰ পাছত সোমবাৰে পুৱা আৰক্ষীয়ে অভিযুক্ত ঘনকান্ত গগৈক ঘটনাস্থলীলৈ নি সমগ্ৰ ঘটনাৰ অনুসন্ধান কৰে। কটকটীয়া নিৰাপত্তা ব্যৱস্থাৰ মাজত আৰক্ষীয়ে এই প্ৰক্ৰিয়া সম্পন্ন কৰিছে।
আৰক্ষী সূত্ৰই জনোৱা অনুসৰি, বৰ্তমান আৰক্ষীৰ জিম্মাত থকা অভিযুক্ত ঘনকান্ত গগৈক সোমবাৰে পুৱাই গুৱাহাটীৰ বৰা ছাৰ্ভিচ অঞ্চলত অৱস্থিত হোটেল বিলাস ইনলৈ লৈ যোৱা হয়।
প্ৰথমে অভিযুক্তগৰাকীক হোটেলখনৰ ভিতৰলৈ নিয়া হয়, য’ত তেওঁ চাৰিজন লোকক গুলীয়াই হত্যা কৰাৰ অভিযোগ উত্থাপন হৈছে। ইয়াৰ পাছত তেওঁক হোটেলখনলৈ যোৱা ঠেক গলিটোলৈ উলিয়াই অনা হয়। অভিযোগ অনুসৰি, এই গলিটোতে গগৈয়ে আন দুজন লোকৰ ওপৰত গুলীচালনা কৰিছিল। ইয়াৰে এজনৰ মৃত্যু হোৱাৰ বিপৰীতে আনজন আহত অৱস্থাত প্ৰাণৰক্ষা কৰিবলৈ সক্ষম হৈছিল।
ঘটনাৰ অনুসন্ধানৰ সময়ত অভিযুক্ত গগৈয়ে গলিটোৰ বিভিন্ন স্থানলৈ আঙুলিয়াই আৰক্ষীক ঘটনাৰ বিৱৰণ দিয়া দেখা যায়। এই প্ৰক্ৰিয়াত ঘটনাৰ দৃশ্য পুনৰ সৃষ্টি কৰিবলৈ মানুহৰ আকাৰৰ পুতলাও ব্যৱহাৰ কৰা হয়।
আৰক্ষীয়ে একাধিক কেমেৰাৰ সহায়ত সমগ্ৰ প্ৰক্ৰিয়াৰ ভিডিঅ’ ৰেকৰ্ডিং কৰে। এই সময়ছোৱাত ঘটনাস্থলীৰ আশে-পাশে নিৰাপত্তা ব্যৱস্থা অধিক কটকটীয়া কৰি তোলা হয়। হোটেলখন অথবা ইয়াৰ কাষৰ গলিটোলৈ সাধাৰণ লোকৰ লগতে সংবাদ মাধ্যমৰ প্ৰতিনিধিসকলকো যাবলৈ দিয়া হোৱা নাছিল।
উল্লেখযোগ্য যে, যোৱা ২৬ অক্টোবৰত হোটেল বিলাস ইনত সংঘটিত গুলীচালনাৰ ঘটনাৰ মূল অভিযুক্ত হৈছে ৩৪ বছৰীয়া ব্যৱসায়ী ঘনকান্ত গগৈ। হোটেলখনৰ মালিকপক্ষ আৰু লীজত লোৱা পক্ষৰ মাজত হোটেল পৰিচালনাক কেন্দ্ৰ কৰি সৃষ্টি হোৱা বিবাদৰ পৰিণতিতে এই ঘটনা সংঘটিত হোৱা বুলি অভিযোগ উত্থাপন হৈছে।
হোটেলখন লীজত লোৱা গগৈক ঘটনাৰ কিছু সময়ৰ পাছতেই আৰক্ষীয়ে গ্ৰেপ্তাৰ কৰিছিল। তেওঁৰ পৰা অপৰাধ সংঘটিত কৰাত ব্যৱহাৰ কৰা বুলি সন্দেহ কৰা অনুজ্ঞাপত্ৰপ্ৰাপ্ত .৩২ ব’ৰৰ এটা পিষ্টলো জব্দ কৰা হৈছিল।
ইতিমধ্যে অসম আৰক্ষীয়ে এই গুলীচালনাৰ ঘটনাৰ তদন্তৰ বাবে এখন বিশেষ তদন্তকাৰী দল (এছআইটি) গঠন কৰিছে। আনহাতে, নিহতসকলৰ পৰিয়ালে এই আক্ৰমণ পূৰ্বপৰিকল্পিত বুলি অভিযোগ উত্থাপন কৰি অভিযুক্তক দৃষ্টান্তমূলক শাস্তি প্ৰদানৰ দাবী জনাইছে।
অৱশ্যে বিশেষ তদন্তকাৰী দলখনৰ ছয়জন জ্যেষ্ঠ আৰক্ষী বিষয়াৰ ভিতৰত তিনিজনক পৰৱৰ্তী সময়ত বদলি কৰা হয়। ইয়াৰ লগতে হোটেলখন অৱস্থিত গুৱাহাটী মধ্য আৰক্ষী জিলাৰ আন এগৰাকী জ্যেষ্ঠ বিষয়াকো বদলি কৰা হয়।
ইফালে, গুৱাহাটীৰ এখন স্থানীয় আদালতে অভিযুক্ত ঘনকান্ত গগৈক সাত দিনৰ বাবে আৰক্ষীৰ জিম্মালৈ প্ৰেৰণ কৰিছে। অহা ৩ নৱেম্বৰত তেওঁক পুনৰ আদালতত হাজিৰ কৰোৱাৰ কথা আছে।
এই গুলীচালনাৰ ঘটনাত নিহত লোকসকল হৈছে ভূদেৱ ভৰালী (৬৫), তেওঁৰ ভগ্নী হেলেনা (৫৮), হেলেনাৰ পুত্ৰ দেৱৰ্ষি কাশ্যপ (৩৯), বোৱাৰী ৰিণিকা কাশ্যপ (৩০) আৰু পৰিয়ালটোৰ কৰ্মচাৰী নাৰায়ণ দাস (৪৮)। আনহাতে, গুলীচালনাত ভৰালী পৰিয়ালৰ গাড়ীচালক সত্যেন্দ্ৰ পাঠক (৪৩) আহত হয়।
ঘটনাৰ পাছত আৰক্ষীয়ে প্ৰকাশ কৰা এক বিবৃতি অনুসৰি, ভৰালী পৰিয়ালে ২০২৫ চনৰ ১০ ছেপ্টেম্বৰত অভিযুক্ত ঘনকান্ত গগৈৰ সৈতে পাঁচ বছৰীয়া এক লীজ চুক্তি সম্পাদন কৰিছিল। এই চুক্তি অনুসৰি হোটেলখনৰ মাহিলি ভাড়া আছিল প্ৰায় ১ লাখ ৮০ হাজাৰ টকা।
আৰক্ষীৰ বিবৃতিত লগতে উল্লেখ কৰা হয় যে, অভিযুক্ত গগৈয়ে হোটেলখনৰ সংস্কাৰৰ কাম সম্পন্ন কৰাৰ পাছত চৌহদটোৰ ব্যৱহাৰ আৰু কেতবোৰ সা-সুবিধা প্ৰদানক লৈ দুয়োপক্ষৰ মাজত মতানৈক্যৰ সৃষ্টি হৈছিল।
এই সমস্যাসমূহৰ সমাধানৰ উদ্দেশ্যে হোটেলখনত সোমবাৰে এখন বৈঠকৰ আয়োজন কৰা হৈছিল। কিন্তু বৈঠক আৰম্ভ হোৱাৰ পূৰ্বেই দুয়োপক্ষৰ মাজত তৰ্ক-বিতৰ্কৰ সূত্ৰপাত হয়। পৰৱৰ্তী সময়ত সেই তৰ্কই হতাহতিৰ ৰূপ লয় আৰু তাৰ পাছতেই অভিযুক্ত ঘনকান্ত গগৈয়ে ছয়জন লোকৰ ওপৰত গুলীচালনা কৰে বুলি আৰক্ষীৰ বিবৃতিত উল্লেখ কৰা হৈছে।
