গুৱাহাটী
গুৱাহাটী আৰক্ষীয়ে চহৰখনৰ ভিতৰত ৰেলী, শোভাযাত্ৰা, মাৰাথন, ৱাকাথন, আৰু অনুৰূপ অনুষ্ঠানৰ ওপৰত সম্পূৰ্ণ নিষেধাজ্ঞা ঘোষণা কৰিছে। যানজঁট ৰোধ কৰাৰ লগতে যান-বাহনৰ নিৰৱচ্ছিন্ন গতিবিধি নিশ্চিত কৰাৰ বাবে এই পদক্ষেপ গ্ৰহণ কৰা হৈছে বুলি কোৱা হৈছে।
ভাৰতীয় নাগাৰিক সুৰক্ষা সংহিতা, ২০২৩ৰ ১৬৩ নং ধাৰা অধীনত আৰক্ষী উপ আয়ুক্ত (প্ৰশাসন) ইমদাদ আলীৰ স্বাক্ষৰিত এই নিৰ্দেশ তাৎক্ষণিকভাৱে কাৰ্যকৰী হয়।
"গুৱাহাটীত যান-বাহনৰ সুচল প্ৰবাহৰ বাবে পথৰ ব্যৱহাৰ দক্ষতাৰে পৰিচালনা কৰাটো অতি প্ৰয়োজনীয়। শোভাযাত্ৰা আৰু ৰেলীৰ ফলত প্ৰায়ে যাতায়তৰ তীব্ৰ যানজঁট সৃষ্টি হয়, যাৰ ফলত যাতায়তৰ বাবে অসুবিধাৰ সৃষ্টি হয় আৰু জৰুৰীকালীন সেৱাত পলম হয়।" - নিৰ্দেশনাটোত কোৱা হৈছে।
জনসাধাৰণৰ সুৰক্ষাৰ ওপৰত উদ্বেগ প্ৰকাশ কৰি আৰক্ষীয়ে জোৰ দি কয় যে বৃহৎ সমাৱেশে ভিৰ আৰু যানজঁটৰ সূচনা কৰে, যাৰ ফলত নিয়মীয়া যাতায়ত আৰু জৰুৰীকালীন সঁহাৰি ব্যৱস্থা দুয়োটাৰে বাবে বাধাৰ সৃষ্টি কৰে।
নিৰ্দেশনাটোত আৰু সকীয়াই দিয়া হৈছে যে উলংঘা কৰিলে ভাৰতীয় ন্যায় সংহিতা, ২০২৩ৰ ২২৩ নং ধাৰাত শাস্তি বিহা হ’ব। কিন্তু এই আদেশত আপীলৰ বাবে স্থান প্ৰদান কৰা হৈছে, যাৰ ফলত ক্ষতিগ্ৰস্ত ব্যক্তিয়ে নিষেধাজ্ঞা বাতিল বা পৰিৱৰ্তনৰ বাবে লিখিত আপত্তি দাখিল কৰিব পাৰে।
