গুৱাহাটী
ৰবিবাৰে হোৱা প্ৰবল বৰষুণে পুনৰ গুৱাহাটীৰ স্বাভাৱিক জীৱনযাত্ৰা ব্যাহত কৰে। বিশেষকৈ ৯ মাইল আৰু ১০ মাইল অঞ্চল প্লাৱিত হোৱাত যান-বাহন চলাচলত বিঘিনি ঘটে। পৰিস্থিতি নিয়ন্ত্ৰণত ৰাখিবলৈ যানজঁট হ্ৰাস কৰাৰ লগতে যাত্ৰীসকলৰ সুৰক্ষা নিশ্চিত কৰিবলৈ প্ৰশাসনে বিকল্প পথৰ ব্যৱস্থা কৰিছে।
কৰ্তৃপক্ষই জনোৱা মতে, গুৱাহাটীৰ দিশে অহা লঘু বাহন (LMV)সমূহ ডিগাৰুৰ পৰা বিকল্প পথলৈ ঘূৰাই দিয়া হৈছে। আনহাতে, গুৱাহাটীৰ পৰা ওলাই যোৱা যান-বাহনসমূহক কইনাধৰা পইণ্টৰ পৰা অন্য পথলৈ প্ৰেৰণ কৰা হৈছে। গুৱাহাটীৰ পৰা বাহিৰলৈ যাত্ৰা কৰা লোকসকলক জলমগ্ন পথ আৰু যানজঁট এৰিবলৈ নাৰেংগী পথ ব্যৱহাৰ কৰিবলৈ পৰামৰ্শ দিয়া হৈছে।
দেওবাৰে হোৱা মুষলধাৰ বৰষুণৰ পিছত প্লাৱিত হোৱা আন আন স্থানসমূহৰ ভিতৰত আছে খানাপাৰা, ছয়মাইল, ৰুক্মিনিগাঁও, ৱায়াৰলেছ, হাতীগাঁও, মালিগাঁও, বৰাগাঁও ইত্যাদি।
ইয়াৰ পূৰ্বে শনিবাৰে সন্ধিয়া হোৱা প্ৰবল বৰষুণতো কৃত্ৰিম বানৰ ফলত মহানগৰীৰ বহু অঞ্চল জলমগ্ন হৈ পৰিছিল। বৰ্ষাকালত প্ৰায়ে দেখা দিয়া এই সমস্যাই পুনৰ নিম্নাঞ্চলসমূহক অধিক ক্ষতিগ্ৰস্ত কৰিছে। ইয়াৰ ফলত বাসিন্দাসকলে যথেষ্ট অসুবিধাৰ সন্মুখীন হোৱাৰ লগতে মহানগৰীৰ একাধিক গুৰুত্বপূৰ্ণ পথত যান-বাহন চলাচল ব্যাহত হৈছে।
আগন্তুক কেইঘণ্টামানৰ ভিতৰত পৰিস্থিতি অধিক জটিল হোৱাৰ আশংকা প্ৰকাশ কৰিছে ভাৰতীয় বতৰ বিজ্ঞান বিভাগে (IMD)। বিভাগটোৱে প্ৰবল বৰষুণৰ সম্ভাৱনাৰ প্ৰতি লক্ষ্য ৰাখি অ'ৰেঞ্জ এলাৰ্ত জাৰি কৰিছে। বতৰৰ পূৰ্বাভাস অনুসৰি, অহা কেইঘণ্টামানত ৫০ শতাংশতকৈ অধিক সম্ভাৱনাৰে পুনৰ বৰষুণ হ'ব পাৰে। ফলত অধিক জলমগ্ন হ'ব পাৰে আৰু যান-বাহন চলাচলত নতুনকৈ বিঘিনি সৃষ্টিৰ আশংকা বৃদ্ধি পাইছে।
কৰ্তৃপক্ষই পৰিস্থিতিৰ ওপৰত চোকা নজৰ ৰাখিছে আৰু যাত্ৰাৰ সময়ত সাৱধানতা অৱলম্বন কৰিবলৈ সাধাৰণ লোকক আহ্বান জনাইছে। জলমগ্ন এলেকা এৰাই চলা, যাত্ৰাৰ পূৰ্বে পথৰ অৱস্থা নিশ্চিত কৰা আৰু স্বাভাৱিক পৰিস্থিতি ঘূৰি অহালৈকে চৰকাৰী যান-বাহন চলাচল সম্পৰ্কীয় নিৰ্দেশনা অনুসৰণ কৰিবলৈ জনসাধাৰণক পৰামৰ্শ দিয়া হৈছে।
