লক্ষ্ণৌ
উত্তৰ প্ৰদেশৰ ৰাজধানী লক্ষ্ণৌৰ আলীগঞ্জ অঞ্চলত সোমবাৰে সংঘটিত এক ভয়ংকৰ অগ্নিকাণ্ডত কমেও ১৫ জন শিক্ষাৰ্থীৰ মৃত্যু হৈছে। ঘটনাটোত কেইবাজনো লোক আহত হয় আৰু উদ্ধাৰ অভিযান বহু ঘণ্টা ধৰি চলি থাকে।
দুপৰীয়া প্ৰায় ৩ বজাত পুৰানিয়া অঞ্চলৰ উষা মেহতা মাৰ্গস্থিত তিনিমহলীয়া বাণিজ্যিক ভৱনটোত জুই লাগে। জুইৰ ফলত সমগ্ৰ এলেকাত আতংকৰ সৃষ্টি হয় আৰু আকাশলৈ ঘন ধোঁৱা উঠিবলৈ ধৰে।
কর্তৃপক্ষৰ মতে, ভৱনটোৰ তলমহলত এখন পেট শ্বপ আৰু পেট ক্লিনিক চলি আছিল। ওপৰৰ মহলসমূহত গেমিং আৰু এনিমেচন সম্পৰ্কীয় ছফ্টৱেৰ ডেভেলপমেণ্টৰ প্ৰশিক্ষণ কেন্দ্ৰ আছিল, য’ত বহু ছাত্ৰ-ছাত্ৰী উপস্থিত আছিল। প্ৰাথমিক তদন্তত ছৰ্ট চাৰ্কিটৰ ফলত জুই লগাৰ সম্ভাৱনা প্ৰকাশ কৰা হৈছে যদিও সঠিক কাৰণ এতিয়াও নিশ্চিত হোৱা নাই।
অগ্নিনিৰ্বাপক বাহিনী, আৰক্ষী, এনডিআৰএফ, এছডিআৰএফ আৰু চিভিল ডিফেন্সৰ দলসমূহে বৃহৎ পৰিসৰত উদ্ধাৰ অভিযান চলায়। ঘন ধোঁৱাৰ বাবে উদ্ধাৰকাৰীসকলে ভৱনৰ পিছফালৰ দেৱাল ভাঙি ভিতৰত প্ৰৱেশ কৰিবলগীয়া হয়। বহু ছাত্ৰ-ছাত্ৰী ধোঁৱা আৰু জুইৰ পৰা বাচিবলৈ জানলাৰে বা ওপৰৰ মহলৰ পৰা জঁপিয়াই ওলাই আহিবলৈ চেষ্টা কৰিছিল।
উত্তৰ প্ৰদেশৰ উপ-মুখ্যমন্ত্ৰী ব্ৰজেশ পাঠকে ঘটনাস্থল পৰিদৰ্শন কৰি কয় যে অধিকাংশ নিহতৰ বয়স ২০ৰ পৰা ২৪ বছৰৰ ভিতৰত। তেওঁ সংবাদমাধ্যমৰ আগত ঘটনাটোৰ বৰ্ণনা দিবলৈ গৈ আবেগিক হৈ পৰে।
লক্ষ্ণৌৰ কিং জৰ্জ মেডিকেল ইউনিভাৰ্চিটি (KGMU)ৰ ট্ৰমা চেণ্টাৰৰ চিকিৎসা অধীক্ষক ডাঃ অমিয় আগৰৱালৰ মতে, ২১-২২ জন লোকক চিকিৎসালয়লৈ অনা হয়। ইয়াৰে পাঁচজন আহত লোক চিকিৎসাধীন হৈ আছে। দুজনৰ মেৰুদণ্ডত আঘাত পোৱাৰ তথ্যও প্ৰকাশ কৰা হৈছে। ১৫ জনক মৃত অৱস্থাত অনা হয় আৰু মৰণোত্তৰ পৰীক্ষাৰ বাবে প্ৰেৰণ কৰা হয়।
ঘটনাৰ খবৰ পাই মুখ্যমন্ত্ৰী যোগী আদিত্যনাথে আলিগড় ভ্ৰমণ চুটি কৰি তৎক্ষণাত লক্ষ্ণৌলৈ উভতি আহে। তেওঁ ঘটনাটোৰ উচ্চস্তৰীয় তদন্তৰ নিৰ্দেশ দিয়াৰ লগতে দোষীসকলৰ বিৰুদ্ধে কঠোৰ ব্যৱস্থা গ্ৰহণৰ নিৰ্দেশ দিয়ে।
প্ৰধানমন্ত্ৰী নৰেন্দ্ৰ মোদীয়েও এই দুৰ্ভাগ্যজনক ঘটনাত শোক প্ৰকাশ কৰি নিহতসকলৰ পৰিয়ালবৰ্গলৈ সমবেদনা জ্ঞাপন কৰে আৰু আহতসকলৰ আশু আৰোগ্য কামনা কৰে।
