আই আই এম বাংগালোৰৰ প্ৰাক্তন ছাত্ৰী ছফিয়া ফিৰদৌছ এতিয়া ওড়িশাৰ প্ৰথমগৰাকী মুছলমান বিধায়িকা

Story by  atv | Posted by  [email protected] • 1 Months ago
ছফিয়া ফিৰদৌছ
ছফিয়া ফিৰদৌছ
 
ভূৱনেশ্বৰ

কংগ্ৰেছৰ ৩২ বছৰীয়া প্ৰাৰ্থী ছফিয়া ফিৰদৌছে ওড়িশাৰ বাৰাৱতি-কটক আসনৰ পৰা ৰাজ্যৰ প্ৰথমগৰাকী বিধায়িকা নিৰ্বাচিত হৈ ইতিহাস ৰচনা কৰিছে। তেওঁ বিজেপিৰ প্ৰাৰ্থী তথা বিশিষ্ট স্ত্ৰীৰোগ বিশেষজ্ঞ ডাঃ পূৰ্ণচন্দ্ৰ মহাপাত্ৰ (৬৯)ক ৮,০০১ ভোটৰ ব্যৱধানত পৰাস্ত কৰিবলৈ সক্ষম হৈছে।১৯৩৭ চনৰ পৰা ওড়িশাত এতিয়ালৈকে ১৪১ গৰাকী মহিলা বিধায়িকা হিচাপে নিৰ্বাচিত হ’লেও বাৰাৱতি-কটকৰ প্ৰাক্তন বিধায়ক মহম্মদ মকিমৰ কন্যা ছফিয়াৰ পূৰ্বে কোনো মুছলমান মহিলাই ৰাজ্যখনৰ বিধানসভাৰ আসনত জয়ী হোৱা নাছিল।
 
"এগৰাকী মুছলমান মহিলা হিচাপে মই বুজো যে মই ইতিহাস ৰচনা কৰিলোঁ। কিন্তু বিধানসভাত মহিলাৰ প্ৰতিনিধিত্ব আকৰ্ষণীয় নহয়। ১৪৭ গৰাকী বিধায়িকাৰ ভিতৰত এইবাৰ আমাৰ মাত্ৰ ১১ গৰাকী মহিলা সদস্য নিৰ্বাচিত হৈছে। এই সংখ্যা বাঢ়িব লাগে। ৰাজনীতিকে ধৰি প্ৰতিটো ক্ষেত্ৰতে নাৰী আগবাঢ়ি অহা উচিত। মহিলাসকলে মোক আদৰ্শ হিচাপে গ্ৰহণ কৰিব পাৰে। মোৰ আদৰ্শ ৰাজনীতিবিদ হৈছে প্ৰাক্তন মুখ্যমন্ত্ৰী নন্দিনী সাতপাথী।"- আই আই এম বাংগালুৰুৰ প্ৰাক্তন ছাত্ৰী ছফিয়াই এইদৰে কয়।
৩.৬৪ কোটি টকাৰ ঘোষিত সম্পত্তিৰে ছফিয়া এটা ৰিয়েল এষ্টেট কোম্পানীৰ পৰিচালক আৰু কনফেডাৰেচন অৱ ৰিয়েল এষ্টেট ডেভেলপাৰ্ছ এছ’চিয়েশ্যন অৱ ইণ্ডিয়া (ক্ৰেডাই)ৰ ভুৱনেশ্বৰ চেপ্টাৰৰ সভানেত্ৰী। ক্ৰেডাই চেপ্টাৰৰ মুৰব্বী হোৱা তেওঁ হৈছে প্ৰথমগৰাকী মহিলা। কে আই আই টি বিশ্ববিদ্যালয়ৰ পৰা চিভিল ইঞ্জিনিয়াৰিঙৰ বিটেক সম্পূৰ্ণ কৰাৰ পিছত ২৪ বছৰ বয়সত ছফিয়াই ৰিয়েল এষ্টেট খণ্ডত প্ৰৱেশ কৰে।
 
"মই ২৪ এপ্ৰিলত বিধানসভা নিৰ্বাচনত যুঁজিবলৈ টিকট পাইছিলো, আৰু ২৫ মে'ত ভোটগ্ৰহণ অনুষ্ঠিত হৈছিল। মই প্ৰতিটো স্থানীয় অঞ্চল আৰু ৱাৰ্ড ভ্ৰমণ কৰি ভোটাৰক লগ ধৰিছিলো। মানুহে মোৰ দেউতাকক ভালদৰে চিনি পায়। তেওঁৰ সুনামে মোক ভোটাৰসকলৰ পৰা ভাল সঁহাৰি লাভ কৰাত সহায় কৰিছিল।"-ছফিয়াই লগতে কয়।
 
ছফিয়াই কয় যে মানুহে তেওঁক ‘হাঁহি থকা বিধায়িকা’ৰ উপাধি দিছে। "মই অতি আনন্দ আৰু হাঁহিমুখেৰে মানুহক লগ পাওঁ। মোৰ টেগলাইন 'কটকৰ কন্যা, কটকৰ বোৱাৰী'-এ নিৰ্বাচনী প্ৰচাৰৰ সময়ত ভোটাৰৰ দৃষ্টি আকৰ্ষণ কৰিছিল। মই মোৰ বিৰোধীৰ বিৰুদ্ধে এটা শব্দও উচ্চাৰণ কৰা নাছিলো। আচলতে মহাপাত্ৰৰ প্ৰতি মোৰ অপৰিসীম সন্মান আছে কাৰণ তেওঁ মোৰো ব্যক্তিগত ডাক্তৰ।"-মহিলাগৰাকীয়ে লগতে কয়।
উল্লেখ্য যে, ২০১৪ আৰু ২০১৯ চনৰ বিধানসভা নিৰ্বাচনত দলীয় কৰ্মী হিচাপে পিতৃৰ হৈ ছফিয়াই কাম কৰিছিল। "মই পিতৃৰ পৰা নিৰ্বাচনী প্ৰচাৰ আৰু পৰিচালনাৰ কলা শিকিছিলো। সেই সময়ত মই কংগ্ৰেছ কৰ্মীসকলৰ সৈতে ঘনিষ্ঠভাৱে কাম কৰিছিলোঁ। সেয়েহে তেওঁলোকে মোক সহজে গ্ৰহণ কৰিব পাৰিছিল। ইয়াৰ বাবেই দলে হয়তো মোক টিকট দিছিল।”-ছফিয়াই কয়।
 
নিজৰ পৰিকল্পনা সন্দৰ্ভত ছফিয়াই কয় যে পিতৃৰ কাৰ্যকালত আৰম্ভ কৰা প্ৰকল্পসমূহ এতিয়া তেওঁ সম্পূৰ্ণ কৰিব। "কটকক এখন বহনক্ষম চহৰ হিচাপে গঢ়ি তোলাৰ বাবে মই আৰু আমাৰ দলে প্ৰচেষ্টা চলাম। আমি কটকক ফিলিগ্ৰি হাব হিচাপে গঢ়ি তোলাৰ উদ্যোগ লম। আমি যুৱক-যুৱতীসকলৰ বাবে নিয়োগ সৃষ্টিৰ কাম কৰিম। ইতিমধ্যে মোৰ সমষ্টিটোক উন্নয়নৰ বাবে মানুহৰ পৰা পৰামৰ্শ বিচাৰিছো।" নৱনিৰ্বাচিত বিধায়িকাগৰাকীয়ে আৰু কয়।