এনে এক জটিল পৰিস্থিতি আৰু প্ৰাকৃতিক দূৰ্যোগৰ মাজতে এগৰাকী মহিলাই অদম্য সাহস আৰু দৃঢ়তাৰে ডিমা হাচাও জিলাৰ স্বাভাৱিক অৱস্থা ঘূৰাই অনাৰ অবিৰত প্ৰচেষ্টা চলাই আছে। পাহাৰীয়া জিলাখনত সন্মুখীন হোৱা সকলো প্ৰত্যাহ্বান নেওচি তেওঁ জনসাধাৰণৰ খাদ্য আৰু চিকিৎসা সুবিধা নিশ্চিত কৰিছে। গাড়ী-মটৰ যাব নোৱাৰা দূৰ্গম স্থানলৈ খোজকাঢ়ি গৈ হলেও পুনৰুদ্ধাৰৰ কাম ব্যক্তিগতভাৱে তদাৰক কৰা এইগৰাকী সাহসী মহিলা হ’ল জিলাখনৰ উপায়ুক্ত নাজৰীন আহমেদ। বতৰ উন্নত হোৱাৰ লগে লগে ডিমা হাচাও জিলালৈ স্বাভাৱিক অৱস্থালৈ ঘূৰি আহিব বুলি তেওঁ আশাবাদী। 

ৰে’ল আৰু পথ সংযোগ বন্ধ হোৱাৰ বাবে জিলাখনে খাদ্য শস্যৰ সংকটৰ সন্মুখীন হৈছে নেকি বুলি সোধাত নাজৰীন আহমেদে কয়, “একেবাৰে সংকট হোৱা নাই। দুৰ্যোগৰ পৰিস্থিতি পৰিচালনাৰ ক্ষেত্ৰত তৎকালীন সঁহাৰি জনোৱাৰ বাবে অসম চৰকাৰলৈ মই কৃতজ্ঞতা জ্ঞাপন কৰিছো। আমি যেতিয়াই প্ৰয়োজনীয় খাদ্যশস্য আৰু অন্যান্য সামগ্ৰীৰ বাবে আবেদন জনাও, সংশ্লিষ্ট চৰকাৰী সংস্থাসমূহে তেতিয়াই তৎপৰতা প্ৰদৰ্শন কৰিছে আৰু কোনো বিলম্ব নকৰাকৈ সামগ্ৰীসমূহ এয়াৰড্ৰপ কৰা হৈছে। আমাৰ হাতত এতিয়া পৰ্যাপ্ত পৰিমাণৰ খাদ্যশস্য আৰু অন্যান্য প্ৰয়োজনীয় সামগ্ৰী মজুত আছে।”

মনকৰিবলগীয়া যে, জিলাখনৰ কেইবাটাও স্থানত ৰে’লপথ উটি যোৱাৰ লগতে কাষৰীয়া পাহাৰৰ পৰা খহি পৰা বোকা-মাটিয়ে নিউ হাফলং ষ্টেচন আৰু কেইটামান সুৰংগ পথ সম্পূৰ্ণৰূপে পোত খাই গৈছে। শেহতীয়াকৈ এন এফ ৰে’লৱেই জনাইছে যে জিলাখনৰ সৈতে ৰে’ল সংযোগ পুনৰ স্থাপন কৰিবলৈ কেইমাহমান সময় লাগিব৷