নতুন দিল্লী
শেহতীয়াকৈ ইৰানে উপসাগৰীয় দেশসমূহ (যেনে চৌদি আৰৱ, কাটাৰ, বাহৰেইন আদি) আৰু জৰ্ডানৰ ওপৰত কৰা মিছাইল আৰু ড্ৰোন আক্ৰমণক ৰাষ্ট্ৰসংঘৰ নিৰাপত্তা পৰিষদে তীব্ৰ সমালোচনা কৰিছে। ভাৰতেও এই সমালোচনাক পূৰ্ণ সমৰ্থন জনাইছে। ৰাষ্ট্ৰসংঘত এই সন্দৰ্ভত এখন প্ৰস্তাৱ গ্ৰহণ কৰা হৈছে, য’ত ইৰানক এনে আক্ৰমণ লগে লগে বন্ধ কৰিবলৈ নিৰ্দেশ দিয়া হৈছে। ভাৰতসহ মুঠ ১৩৫খন দেশে এই প্ৰস্তাৱটোৰ সহ-পৃষ্ঠপোষকতা কৰিছে।
ৰাষ্ট্ৰসংঘৰ ১৫জনীয়া নিৰাপত্তা পৰিষদত এই প্ৰস্তাৱৰ ওপৰত ভোটদান অনুষ্ঠিত হয়। ইয়াৰে ১৩খন দেশে প্ৰস্তাৱটোৰ সপক্ষে ভোট দিয়ে, আনহাতে চীন আৰু ৰাছিয়াই ভোটদানৰ পৰা বিৰত থাকে। প্ৰস্তাৱটোত কোৱা হৈছে যে ইৰানৰ এই কাৰ্যই আন্তঃৰাষ্ট্ৰীয় আইন উলংঘা কৰিছে আৰু ই বিশ্বৰ শান্তি তথা নিৰাপত্তাৰ বাবে এক ডাঙৰ ভাবুকি হৈ পৰিছে।
প্ৰস্তাৱটোত বিশেষকৈ সাগৰীয় বাণিজ্যৰ ওপৰত গুৰুত্ব দিয়া হৈছে। ইৰানে 'হৰমুজ প্ৰণালী'ৰ দৰে গুৰুত্বপূৰ্ণ সামুদ্ৰিক পথ বন্ধ কৰি দিয়াৰ যি ভাবুকি দিছে, তাক সকলোৱে গৰিহণা দিছে। কাৰণ এই পথেৰে আন্তঃৰাষ্ট্ৰীয় বাণিজ্যিক জাহাজসমূহ চলাচল কৰে। ৰাষ্ট্ৰসংঘই ইৰানক চুবুৰীয়া দেশসমূহৰ বিৰুদ্ধে কোনো ধৰণৰ উচতনিমূলক কাম নকৰিবলৈ সকীয়াই দিছে।
আমেৰিকাৰ প্ৰতিনিধিয়ে এই পদক্ষেপক ইৰানৰ বিৰুদ্ধে এক কঠোৰ বাৰ্তা বুলি অভিহিত কৰিছে। তেওঁ কয় যে নিৰীহ নাগৰিক আৰু চৰকাৰী সা-সম্পত্তিক লক্ষ্য কৰি লোৱাটো কেতিয়াও গ্ৰহণযোগ্য নহয়। আনহাতে, ইৰানে এই সকলো অভিযোগ অস্বীকাৰ কৰিছে। ইৰানৰ মতে, এই প্ৰস্তাৱটো অবৈধ আৰু তেওঁলোকে চুবুৰীয়া দেশৰ লগত বন্ধুত্বপূৰ্ণ সম্পৰ্কহে বিচাৰে। ওলোটাই তেওঁলোকে আমেৰিকা আৰু ইজৰাইলৰ আক্ৰমণতহে বহু লোকৰ মৃত্যু হোৱা বুলি দাবী কৰিছে।
