ছানিয়া আঞ্জুম / বেংগালুৰু
কৰ্ণাটকৰ কোলাৰ জিলাৰ এখন সৰু চহৰ বাংগাৰপেটত এটা ৰক্ষণশীল মুছলমান পৰিয়ালত ১৯৮৭ চনৰ ২৫ জানুৱাৰীত জন্মগ্ৰহণ কৰিছিল খুড়ছিয়া নাজীৰে। সকলোৱে মৰমেৰে খুছি বুলি সম্বোধন কৰা খুড়ছিয়াক ভাৰতৰ 'আইৰন লেডী' বুলিও অভিহিত কৰা হয়। খুড়ছিয়াই সম্প্ৰতি বিশ্ব অভিলেখ গঢ়া ভাৰোত্তোলনকাৰী আৰু আন্তঃৰাষ্ট্ৰীয় মাষ্টাৰছ ভাৰোত্তোলন চেম্পিয়ন আৰু মহিলা সবলীকৰণৰ ক্ষেত্ৰত এগৰাকী আইকন হৈ পৰিছে। পিতৃৰ অবিহনে ডাঙৰ হোৱাৰ পৰা আৰম্ভ কৰি চিজাৰিয়ান প্ৰসৱৰ পিছত ৩০০ কিলোগ্ৰাম ওজন তুলি বিশ্বজুৰি কৃতিত্ব অৰ্জন কৰালৈকে খুড়ছিয়াৰ জীৱনে তেওঁৰ বিশ্বাসক প্ৰতিফলিত কৰিছে।
তেওঁৰ সাহস, বিশ্বাস আৰু ক্ৰীড়াৰ প্ৰতি থকা প্ৰেমৰ কাহিনীয়ে মহিলাসকলক সামাজিক প্ৰত্যাহ্বানসমূহৰ সৈতে মোকাবিলা কৰিবলৈ আৰু শক্তিক পুনৰ সংজ্ঞায়িত কৰিবলৈ উৎসাহিত কৰে। তেওঁৰ মতে, সমাজৰ মূল্যবোধক সন্মান জনাই, আমি আমাৰ নিজৰ জীৱনৰ গন্তব্যস্থান নিৰ্ণয় কৰা উচিত।
খুড়ছিয়াৰ শৈশৱ বেদনাৰে ভৰা আছিল। মাত্ৰ দুবছৰ বয়সতে তেওঁ নিজৰ পিতৃ মল্লযুঁজাৰু মহম্মদ খাছিমক হেৰুৱাইছিল। তেওঁৰ উত্তৰাধিকাৰটোৱে পিছত তেওঁৰ ক্ৰীড়া সপোনক অনুপ্ৰাণিত কৰিছিল। তেওঁক তেওঁৰ মাতৃয়ে ডাঙৰ-দীঘল কৰিছিল। যিগৰাকীক খুড়ছিয়াই নিৰীহ আৰু সংসাৰিক বিষয়ৰ কোনো জ্ঞান নথকা বুলি উল্লেখ কৰিছে। সৰুৰে পৰা খুড়ছিয়াই আন শিশুৰ তুলনাত ব্যতিক্ৰম হ'ব বিচাৰিছিল। তেওঁ কয় যে, মই সদায়েই কিবা এটা পৃথক কাম কৰিব বিচাৰিছিলো।
প্ৰতিযোগিতাত জয়ী হৈ জাতীয় পতাকাৰ সৈতে খুড়ছিয়া নাজীৰ
পিতৃৰ অনুপস্থিতিয়ে দীৰ্ঘসময়লৈ হতাশাৰ সৃষ্টি কৰিছিল। কিয়নো এখন সংৰক্ষণবাদী মুছলমান সমাজত ডাঙৰ-দীঘল হোৱা, তেওঁ লিংগ বৈষম্য আৰু স্বামীৰ সৈতে ঘৰুৱা সমস্যাৰো সন্মুখীন হৈছিল। তেওঁ প্ৰায়ে ভাবিছিল যে, "যদি মোৰ পিতৃ জীয়াই থাকিল হয়, তেন্তে আজি মই আই এ এছ অথবা এগৰাকী অলিম্পিয়ান হব পাৰিলো হয়।"
তথাপিও তেওঁ কেতিয়াও হতাশ হৈ পৰা নাছিল। তেওঁ কয় যে, সংগ্ৰামে মানুহক ধ্বংস কৰাৰ পৰিৱৰ্তে নিজকে উন্নিত কৰাত সহায় কৰে। এগৰাকী মুছলমান হিচাপে তেওঁ পুৱা ৪ বজাত নামাজ পঢ়ি দিনটোৰ আৰম্ভ কৰে। কিয়নো খুড়ছিয়াই আল্লাহ আৰু কঠোৰ পৰিশ্ৰমৰ ওপৰত বিশ্বাস কৰে। তেওঁ কয় যে, প্ৰতিজন ব্যক্তিয়ে নিজৰ যত্ন ল'ব লাগে আৰু কাৰো ওপৰত নিৰ্ভৰশীল হ'ব নালাগে। তেওঁৰ পিতৃৰ মল্লযুঁজৰ পটভূমিয়ে তেওঁক ক্ৰীড়াত প্ৰৱেশ কৰিবলৈ, তেওঁৰ স্মৃতিক সন্মান কৰিবলৈ আৰু নিজৰ ভৱিষ্যত গঢ়িবলৈ অনুপ্ৰাণিত কৰিছিল।
বাংগাৰপেটত খুড়ছিয়াই সমাজৰ পৰা নিৰন্তৰ সমালোচনাৰ সন্মুখীন হৈ আহিছিল। শাৰীৰিক ক্ৰিয়া-কলাপ কৰিব বিচৰা মহিলাসকলক বহু পুৰুষে ঠাট্টা-বিদ্ৰূপ কৰিছিল আৰু এনে কাৰ্যক নিষিদ্ধ বা হাৰাম বুলিও অভিহিত কৰিছিল। তেওঁ কয় যে, বোৰ্খা পৰিধান কৰি গৰ্ভধাৰণৰ পিছত ওজন হ্ৰাস কৰিবলৈ ষ্টেডিয়ামত খোজকাঢ়াৰ কথা খুড়ছিয়াৰ মনত আছে। তেতিয়া মানুহবোৰে তেওঁক ঠাট্টা-বিদ্ৰূপ আৰু উপহাস কৰিছিল। কিন্তু তেওঁৰ দৃঢ়তা অধিক শক্তিশালী আছিল। তেওঁলোকে আচলতে বোৰ্খা পৰিধান কৰা মহিলাক দুৰ্বল বুলি ভাবিছিল।
'আইৰণ লেডী' অফ ইণ্ডিয়া ২০২৩ বঁটাৰ বাবে মনোনীত হোৱা মুহূৰ্তত
তেওঁ এই উপহাসৰ বিষয়ে এছপি দিব্য গোপীনাথক অৱগত কৰিছিল আৰু তেওঁ তৎক্ষণাৎ ব্যৱস্থা গ্ৰহণ কৰিছিল। তেওঁ দুগৰাকী বোৰ্খা পিন্ধা মহিলাসহ ২০জন কনিষ্টবলক খুড়ছিয়াৰ সৈতে যাবলৈ নিযুক্তি দিয়া হৈছিল। তেওঁ কয় যে, যিসকলে তেওঁক ঠাট্টা কৰিছিল, সেই মানুহবোৰে বুজি পাইছিল যে মহিলাগৰাকী তেওঁলোকে ধাৰণা কৰাৰ দৰে দুৰ্বল নহয়। এই মুহূৰ্ততে তেওঁৰ বেদনা শক্তিত পৰিণত হৈছিল। তেওঁ কয়, "মই মোৰ যন্ত্ৰণাক মোৰ শক্তি হিচাপে গ্ৰহণ কৰিছিলো।"
এই ঘটনাই এক ডাঙৰ পৰিৱৰ্তন ঘটাইছিল, আৰু এই ঘটনাই তেওঁৰ বিশ্বাসক শক্তিশালী কৰি তুলিছিল যে, প্ৰত্যাহ্বানৰ সৈতে প্ৰত্যক্ষভাৱে মোকাবিলা কৰিব পাৰি।
পিতৃৰ অনুপ্ৰেৰণাত তেওঁ হতাশা আৰু কষ্টৰ সৈতে যুঁজিবলৈ আটাইতকৈ কঠিন ক্ৰীড়া ভাৰোত্তোলনক বাছি লৈছিল। ক্ৰীড়াই তেওঁৰ একমাত্ৰ পথ হৈ পৰিছিল, যি প্ৰত্যাহ্বানসমূহ অতিক্ৰম কৰাৰ আৰু সমাজে তেওঁৰ ওপৰত আৰোপ কৰা সীমাবদ্ধতাবোৰ ভাঙি পেলোৱাৰ এক উপায় আছিল। তেওঁ কয় যে, তেওঁৰ আৱেগিক সংগ্ৰাম যিকোনো বাৰবেলতকৈও বেছি গধুৰ আছিল, যদিও ভাৰোত্তোলনে তেওঁক সেই বোজা হ্ৰাস কৰাত সহায় কৰিছিল আৰু দেখুৱাইছিল যে, শক্তিয়ে দুখ-কষ্টৰ দূৰ কৰিব পাৰে।
খুড়ছিয়া নাজীৰ
খুড়ছিয়াই প্ৰয়োজনত ভাৰোত্তোলন আৰম্ভ কৰিছিল। চিজাৰিয়ান প্ৰসৱৰ পিছত তেওঁ ওজন বৃদ্ধি আৰু হতাশাৰ সৈতে যুঁজিবলগীয়া হৈছিল। তেওঁৰ আশে-পাশে থকা বহুলোকে বিশ্বাস কৰিছিল যে, প্ৰসৱৰ পিছত, বিশেষকৈ চি-ছেকশ্যনৰ পিছত, মহিলাসকলে বিশেষ একো কৰিব নোৱাৰে। তেওঁ এই কথা অস্বীকাৰ কৰিছিল কিয়নো তেওঁৰ মতে, মাতৃ হোৱাৰ পিছত এগৰাকী মহিলাৰ শক্তিহে বৃদ্ধি পায়।
২০১৩ চনত ২৫ বছৰ বয়সত তেওঁ ওজন হ্ৰাস কৰিবলৈ আৰু মানসিক স্বাস্থ্য উন্নত কৰিবলৈ এটা জিমত যোগদান কৰিছিল। তেওঁ কয় যে, "মই সুখী আৰু লঘু অনুভৱ কৰিছিলো।" অধিকাংশ নবীনসকলে ৫ কিলোগ্ৰামৰ ডাম্বেলৰ সৈতে যুঁজ দি থকাৰ সময়তে তেওঁ ১০ কিলোগ্ৰাম সহজে তুলি নিজৰ প্ৰাকৃতিক শক্তি প্ৰদৰ্শন কৰিছিল।
খুড়ছিয়াৰ জীৱনলৈ এটি জীৱন সলনি কৰা মুহূৰ্ত আহিছিল, যেতিয়া তেওঁ ১১০ কেজি ডেডলিফ্ট কৰিছিল। এগৰাকী বন্ধুৱে তাইক পাৱাৰলিফটিং প্ৰতিযোগিতাত যোগদান কৰিবলৈ উৎসাহিত কৰিছিল। তেওঁ কয় যে, "সেইটোৱে মোৰ জীৱন সলনি কৰি দিছিল।"
খুড়ছিয়া নাজীৰক সম্বৰ্ধনা জনোৱা মুহূৰ্তত
তেওঁৰ প্ৰশিক্ষক মহম্মদ আমানুল্লাই তেওঁক ২০২২ চনৰ পৰা বিনামূলীয়াকৈ প্ৰশিক্ষণ প্ৰদান কৰি আহিছে। আমানে কয় যে, "খুড়ছিয়া সদায়েই কঠোৰ পৰিশ্ৰমী আছিল আৰু তেওঁক প্ৰশিক্ষণৰ লক্ষ্য অতি স্পষ্ট আছিল, তেওঁক প্ৰশিক্ষণ দিয়াটো গৌৰৱৰ কথা।"
প্ৰশিক্ষণৰ লগতে ২০০৫ চনৰ পৰা কেএছআৰটিচি (KSRTC)ত প্ৰথম বিভাগীয় সহকাৰী হিচাপে পূৰ্ণকালীনভাৱে কাম কৰিছিল। তেওঁ পুৱা ৫ৰ পৰা ৮ বজা আৰু পুনৰ নিশা ৯ বজালৈকে প্ৰশিক্ষণ গ্ৰহণ কৰিছিল। তেওঁক নমনীয় কৰ্মৰ বাবে সময় দিয়াৰ বাবে প্ৰাক্তন এম ডি আনবু কুমাৰকে ধৰি কেএছআৰটিচিৰ তত্বাৱধায়কসকলক তেওঁ ধন্যবাদ জ্ঞাপন কৰিছে।
খুড়ছিয়াই সতৰ্ক কৰি দিছে যে, ভাৰোত্তোলন এক অতি বিপজ্জনক ক্ৰীড়া। তেওঁ দায়িত্বশীল আৰু অসাৱধানতাপূৰ্ণ উত্তোলনৰ মাজৰ পাৰ্থক্য ব্যাখ্যা কৰে। তেওঁ কয় যে, জীৱনক বিপদত পেলোৱাটোক 'ইগো লিফটিং' বুলি কোৱা হয়, যিটো আচলতে এক প্ৰকাৰৰ মূৰ্খতা। তেওঁ বিশ্বাস কৰে যে, কাৰিকৰী জ্ঞানেই সকলো। এজন ব্যক্তিয়ে জানিব লাগিব যে, তেওঁলোকে হাতত কি তুলি ধৰিছে।
খুড়ছিয়াই সদায়ে নিজকে চমু পথৰ পৰা আঁতৰি থাকে। তেওঁ প্ৰাকৃতিক, প্ৰ'টিন সমৃদ্ধ আহাৰ অনুসৰণ কৰি আহিছে, বিশেষকৈ নিৰামিষভোজী। তেওঁৰ তীব্ৰ প্ৰশিক্ষণৰ সমৰ্থন কৰিবলৈ দৈনিক ছয় বাৰ আহাৰ গ্ৰহণ কৰি আহিছে। তেওঁ কয়, "কোনো ষ্টেৰ'ইড, কোনো পৰিপূৰক গ্ৰহণ কৰিব নালাগে, চমু পথবোৰ মাৰাত্মক হ'ব পাৰে। শাৰীৰিক সক্ৰিয়তাই কঁকালৰ বিষৰ দৰে সমস্যাবোৰ নিৰাময় কৰে।"
২০২২ চনৰ ৬ ডিচেম্বত তেওঁ চিজাৰিয়ান প্ৰসৱৰ পিছত ৩০০ কিলোগ্ৰাম (১১০ কিলোগ্ৰাম স্কোৱাট, ১২০ কিলোগ্ৰাম ডেডলিফ্ট, ৭০ কিলোগ্ৰাম বেঞ্চ প্ৰেছ) উত্তোলন কৰা প্ৰথমগৰাকী মহিলা হিচাপে পৰিগণিত হয়। এই বিশ্ব অভিলেখক মেজিক বুক অফ ৰেকৰ্ড আৰু ৱৰ্ল্ডৱাইড ৰেকৰ্ডছৰ দ্বাৰা স্বীকৃত হৈছিল। তেওঁৰ এই সাফল্যই মাতৃত্ব আৰু অস্ত্ৰোপচাৰৰ দ্বাৰা আৰোগ্য লাভৰ বিষয়ে থকা পৌৰাণিক ভূল ধাৰণাবোৰ আতঁৰাবলৈ সক্ষম হৈছিল। তেওঁ জিলা পৰ্যায়ৰ প্ৰতিযোগিতাৰ পৰা ৰাজ্যিক আৰু ৰাষ্ট্ৰীয় স্বৰ্ণ পদকলৈ দ্ৰুতগতিত আগবাঢ়িছিল। কিন্তু কোভিড-১৯ৰ বাবে তেওঁ ২০২০ জাপান চেম্পিয়নশ্বিপত প্ৰতিদ্বন্দ্বিতা কৰিব পৰা নাছিল।
২০২৩ চনৰ মে’ মাহত দক্ষিণ কোৰিয়াৰ জেওনবুকত অনুষ্ঠিত এছিয়া পেচিফিক মাষ্টাৰ্ছ গেমছত খুড়ছিয়াৰ আন্তঃৰাষ্ট্ৰীয় যাত্ৰা আৰম্ভ হৈছিল। তেওঁ তিনিটা স্বৰ্ণ পদক লাভ কৰাৰ লগতে আন্তঃৰাষ্ট্ৰীয় ভাৰোত্তোলনত পদক লাভ কৰা ভাৰতৰ প্ৰথমগৰাকী মুছলমান মহিলা হিচাপে পৰিগণিত হৈছিল। ২০২৩ চনৰ ৪ নৱেম্বৰত তেওঁ এথেন্সত মাষ্টাৰ্ছ ৱেটলিফটিং মেডিটেৰেনিয়ান ইন্টাৰনেশ্যনেল অ'পেনত ৰূপৰ পদক লাভ কৰিছিল। তেওঁ ২০২৪ চনত ফিনলেণ্ডত ইউৰোপিয়ান মাষ্টাৰ্ছ গেমছ, জাৰ্মান মাষ্টাৰ্ছ ভাৰোত্তোলন চেম্পিয়নশ্বিপ আৰু অষ্ট্ৰেলিয়াত কমনৱেলথ মাষ্টাৰ্ছত অংশগ্ৰহণ কৰিছিল, য'ত তেওঁ ৩৫ বয়সৰ উৰ্দ্ধৰ মহিলা শাখাত স্বৰ্ণ পদক লাভ কৰিছিল।
তেওঁক কৰ্ণাটকৰ প্ৰাক্তন মুখ্যমন্ত্ৰী বাসৱৰাজ বোম্মাইয়ে সন্মানিত কৰাৰ লগতে ৰাজ্যিক সংখ্যালঘু উন্নয়ন নিগমৰ পৰা ২.৫ লাখ টকাৰ পুৰস্কাৰ লাভ কৰিছিল। যি তেওঁ আন্তঃৰাষ্ট্ৰীয় ভ্ৰমণৰ বাবে ব্যৱহাৰ কৰিছিল। মনোজ জৈন আৰু ৰৌফুদ্দিন কচেৰৱালাৰ দৰে ব্যক্তিয়ে তেওঁক চিনি পাইছিল। তেওঁ পাৱাৰ ৱমেন (২০১৯), স্প'ৰ্টছ এচিভাৰ (২০২২), ভাৰতৰ আয়ৰন লেডী (২০২৩) আদি বঁটা লাভ কৰাৰ লগতে মহিলা সৱলীকৰণৰ ওপৰত হাৰ্ভাৰ্ড বিশ্ববিদ্যালয়ত বক্তৃতা দিবলৈ আমন্ত্ৰণ জনোৱা হৈছিল।
তেওঁ মানৱ সম্পদ বিষয়ত এমবিএ আৰু ছফ্টৱেৰ এপ্লিকেচনত ডিপ্লমা লাভ কৰিছে। তেওঁ আন্তঃৰাষ্ট্ৰীয় দুৰ্নীতি বিৰোধী মঞ্চৰ মহিলা শাখাৰ ৰাষ্ট্ৰীয় সাংগঠনিক সম্পাদিকা, ভাৰতীয় মাষ্টাৰছ গেমছ ফেডাৰেচনৰ ডিজিটেল মাৰ্কেটিং মুৰব্বী আৰু কৰ্ণাটক মাষ্টাৰছ গেমছ এছ’চিয়েশ্যনৰ সাধাৰণ সম্পাদিকা হিচাপেও কৰ্মৰত এগৰাকী সমাজকৰ্মী।
খুড়ছিয়া নাজীৰক সম্বৰ্ধনা জনোৱা মুহূৰ্তত
খুড়ছিয়াই দৃঢ়তাৰে বিশ্বাস কৰে যে, শিক্ষা হৈছে সকলো সমস্যাৰ একমাত্ৰ সমাধান। জীৱনৰ উদ্দেশ্যক স্বীকৃতি দিয়াটো হৈছে আৰ্থিক স্বতন্ত্ৰতাৰ মূল আৰু প্ৰত্যেক মহিলাৰ বাবে এটি মৌলিক প্ৰয়োজন। তেওঁ কয় যে, সকলোৱে অন্ততঃ এটা খেল খেলিব লাগে বিশেষকৈ মহিলাসকলে, কাৰণ ই তেওঁলোকৰ স্থিতিস্থাপকতা আৰু আত্ম-জ্ঞান বৃদ্ধি কৰে।
নিউজ আউটলেট আৰু ইউটিউব চেনেলত তেওঁৰ কাহিনী প্ৰকাশ পাইছে। তেওঁ ইনষ্টাগ্ৰামত সক্ৰিয় ( khudsiya nazee rofficial) য'ত তেওঁ নিজৰ প্ৰশিক্ষণ আৰু প্ৰেৰণাদায়ক ভিডিঅ'ৰ দ্বাৰা হাজাৰ হাজাৰ লোকক অনুপ্ৰাণিত কৰি আহিছে।
তেওঁৰ এই যাত্ৰাই দেখুৱাইছে যে, এগৰাকী মাতৃ আৰু এগৰাকী ক্ৰীড়াবিদ একেলগে আগুৱাই যাব পাৰে। ডালাছ টেক্সাছৰ আইআইএম বেংগালুৰুৰ ষ্টাফ ৰিক্ৰিয়েচন ক্লাব আৰু ডালাস টেক্সাছৰ ক্ৰছৰোডা ষ্টুডিঅ'ৰ দৰে অনুষ্ঠানত তেওঁক সন্মানিত কৰা হৈছে। তেওঁ সদায় মহিলাৰ অধিকাৰ আৰু ক্ৰীড়াৰ বাবে মাত মাতি আহিছে। তেওঁ মহিলাসকলক পৰামৰ্শ দি উৎসাহিত কৰি আহিছে যে, নেতিবাচক চিন্তাৰ দ্বাৰা নিমজ্জিত হোৱাৰ পৰিৱৰ্তে সপোনবোৰক সাহসেৰে অনুসৰণ কৰিব লাগে।
খুড়ছিয়া নাজিৰৰ জীৱনযাত্ৰাই প্ৰমাণ কৰি দেখুৱাইছে যে, কেনেকৈ কষ্টবোৰক শক্তিলৈ ৰূপান্তৰিত কৰিব পাৰি। বাংগাৰপেটৰ এগৰাকী পিতৃহীন কন্যাৰ পৰা এগৰাকী আন্তঃৰাষ্ট্ৰীয় চেম্পিয়নলৈ তেওঁৰ আৱেগিক সংগ্ৰামক তেওঁ শাৰীৰিক বিজয়লৈ ৰূপান্তৰিত কৰিছে। তেওঁৰ কাহিনীয়ে প্ৰমাণ কৰিছে যে, বিশ্বাস, শৃংখলা আৰু সাহসে ভাগ্য সলনি কৰিব পাৰে। তেওঁৰ প্ৰকৃত উত্তৰাধিকাৰ কেৱল তেওঁ তুলি লোৱা ওজনতে নহয়, তেওঁ প্ৰেৰণা দিয়া সপোনতো নিহিত হৈ আছে। নিজৰ কেৰিয়াৰ আৰু সক্ৰিয়তা অব্যাহত ৰাখি তেওঁ কয় যে, তেওঁৰ যাত্ৰা এতিয়াও শেষ হোৱা নাই, এই আয়ৰন লেডীগৰাকীয়ে মাত্ৰ আৰম্ভণিহে কৰিছে।
