গুৱাহাটী
সকলোৰে মৰমৰ কণ্ঠশিল্পী তথা অভিনেতা জুবিন গাৰ্গক চূড়ান্ত শ্ৰদ্ধাঞ্জলি জনোৱাৰ উদ্দেশ্যে সমগ্ৰ অসমৰ অনুৰাগীসকলে 'ৰৈ ৰৈ বিনালে'ক এখন ঐতিহাসিক ব্লকবাষ্টাৰ ছবিলৈ ৰূপান্তৰিত কৰাৰ বাবে এক অভূতপূৰ্ব অভিযান চলাইছে।
BookMyShow ত ইতিমধ্যে সকলো শ্ব'তে হালধীয়া ৰং দেখা গৈছে। ইয়াৰ পৰা বুজা গৈছে যে, সকলো ছিট ইতিমধ্যে ভৰি পৰিছে। ৩১ অক্টোবৰত মুক্তি পাবলগীয়া ছবিখনৰ প্ৰি-বুকিং বৃহস্পতিবাৰে সন্ধিয়া মুকলি কৰা হৈছিল আৰু প্ৰি-বুকিং আৰম্ভ কৰাৰ এঘণ্টাৰ ভিতৰতে ৭ হাজাৰৰো অধিক টিকট বিক্ৰী হৈছিল আৰু এতিয়াও বুকিং চলি আছে।
শুকুৰবাৰে পুৱালৈকে কেৱল সিঁচৰতি হৈ থকা টিকটসমূহেহে উপলব্ধ হৈ আছিল, কিয়নো সমগ্ৰ ৰাজ্যৰ দৰ্শকে, সমৰ্থকসকলে আমাৰ প্ৰিয় জুবিন দাৰ শেষৰখন ছবি বুলি কোৱা ছবিখনক সন্মান জনোৱাৰ বাবে সাজু হৈছে।
জুবিন গাৰ্গে সদায় অসমীয়া ছবিয়ে ডাঙৰ ডাঙৰ চিনেমাহলত সফলতা লাভ কৰি বিস্তৃত পৰিসৰৰ দৰ্শকৰ মাজলৈ যোৱাৰ সপোন দেখিছিল। তেওঁ বিচাৰিছিল প্ৰতিখন অসমীয়া চিনেমাই বক্স অফিচত ভাল প্ৰদৰ্শন কৰক৷ ছবি নিৰ্মাণৰ বাবে আগবাঢ়ি অহাসকলে মানুহৰ কল্পনাশক্তিক সঁচা অৰ্থত আকৰ্ষণ কৰিব পৰা চিনেমা সৃষ্টি কৰক তাৰ বাবে তেওঁ সকলোকে উৎসাহ যোগাইছিল।
নিজে কেৱল তিনিখন ছবি নিৰ্মাণ কৰিলেও জুবিনে আন ছবি নিৰ্মাতা, প্ৰযোজক, শিল্পীসকলক সদায় ডাঙৰ সপোন দেখিবলৈ আৰু মানসম্পন্ন ছবি নিৰ্মাণ কৰিবলৈ উৎসাহিত কৰিছিল। বহু যুৱ চলচ্চিত্ৰ নিৰ্মাতাৰ বাবে তেওঁৰ সমৰ্থন আৰু উৎসাহ সাহসৰ উৎস হৈ পৰিছিল।
তেওঁৰ ছবি 'ৰৈ ৰৈ বিনালে'ৰ আগতীয়া বুকিঙে অসমীয়া ছবিজগতত অভূতপূৰ্ব ধাৰা গঢ়ি তুলিছে। গুৱাহাটীত চিনেমাগৃহসমূহে প্ৰায় সকলো স্ক্ৰীণ 'ৰৈ ৰৈ বিনালে'ৰ নামত উছৰ্গা কৰিছে৷ লক্ষণীয় কথা যে, আন চিনেমাৰ শ্ব’ বাতিল কৰিছে ছবিগৃহসমূহে৷ 'ৰৈ ৰৈ বিনালে'ৰ শ্ব’ পুৱা ৬ বজাৰ পৰাই আৰম্ভ হব।
থিয়েটাৰ আৰু মাল্টিপ্লেক্সসমূহে জুবিন গাৰ্গৰ শেষৰখন ছবিৰ সৈতে অনুৰাগীৰ আৱেগিক সংযোগ আৰু ইয়াৰ ব্যৱসায়িক সম্ভাৱনা দুয়োটাই স্পষ্টভাৱে বুজি উঠিছে। চিনেপলিছত ১৯ টা শ্ব’, পি ভি আৰ চিটি চেণ্টাৰ আৰু আইনক্সত (অৰাছ)ৰ ১৬টা শ্ব’, মেট্ৰিক্স চিনেমাত ১২ টা শ্ব’ আৰু গ্ৰেণ্ড ৰয়েল চিনেছত ১১টাকৈ শ্ব’ চলোৱা হ’ব 'ৰৈ ৰৈ বিনালে'ৰ। গুৱাহাটীৰ আন আন ছবিগৃহতো 'ৰৈ ৰৈ বিনালে'ৰ বাবে অধিক শ্ব’ নিৰ্ধাৰণ কৰা হৈছে। সমগ্ৰ অসমৰ আন আন চহৰতো একেই ধাৰা দেখিবলৈ পোৱা গৈছে।
আমাৰ লগত কায়িকভাৱে নাথাকিলেও জুবিনে অসমীয়া চিনেমা জগতলৈ এনে এখন ছবি উপহাৰ দি গৈছে যিখন ছবি সম্ভাৱনাময়ভাৱে ব্লকবাষ্টাৰ হোৱাৰ দিশে গতি কৰিছে৷ ডাঙৰ পৰ্দাত অন্তিমবাৰৰ বাবে জুবিন এই কথাই নিশ্চয় সকলোকে আৱেগিক কৰি তুলিছে।
