বাছিত জাৰগাৰ / শ্ৰীনগৰ
এইকেইদিনত শ্ৰীনগৰৰ বিশ্ববিখ্যাত ডাল হ্ৰদখন যেন এখন চিনেমাৰ ছেটত পৰিণত হৈছে। এই উপলক্ষে জম্মু-কাশ্মীৰত প্ৰথমবাৰৰ বাবে চাৰিদিনীয়াকৈ অনুষ্ঠিত হোৱা আন্তঃৰাষ্ট্ৰীয় চলচ্চিত্ৰ মহোৎসৱে (IFFJK) উপত্যকাখনত এক অভূতপূৰ্ব চিনেমাৰ অভিজ্ঞতা কঢ়িয়াই আনিছে।
শ্বেৰ-ই-কাশ্মীৰ আন্তঃৰাষ্ট্ৰীয় কনভেনচন চেণ্টাৰৰ ওচৰত ডাল হ্ৰদৰ শান্ত পানীৰ ওপৰত এটা বৃহৎ ভাসমান পৰ্দা স্থাপন কৰা হৈছে। এই অনন্য মুক্ত আকাশৰ চিনেমা হলত দৰ্শকে শ্বিকাৰাত বহি চিনেমা উপভোগ কৰিছে। অৰ্থাৎ, এইবাৰ ডাল হ্ৰদখনেই যেন এখন বিশাল চিনেমা হলত পৰিণত হৈছে।
এই অভিজ্ঞতা কেৱল চিনেমা চোৱাৰ এক নতুন পদ্ধতি নহয়। ইয়াৰ সৈতে কাশ্মীৰ আৰু হিন্দী চিনেমাৰ মাজত থকা দীঘলীয়া আৰু গভীৰ সম্পৰ্কৰ স্মৃতিও জড়িত হৈ আছে। পানীৰ মাজত থকা শ্বিকাৰাত বহি দৰ্শকে পুৰণি চিনেমাৰ চিনাকি গান আৰু দৃশ্য উপভোগ কৰাৰ সময়ত পৰিৱেশটোৱে এক বিশেষ মায়াময় ৰূপ ধাৰণ কৰিছে।
সোমবাৰে ১৯৬১ চনৰ জনপ্ৰিয় ছবি ‘জংলী’ প্ৰদৰ্শনেৰে মহোৎসৱৰ আৰম্ভণি হয়। ডাল হ্ৰদৰ পাৰত বৃহৎ সংখ্যক লোক সমবেত হয়। পানীৰ ওপৰত পোহৰেৰে জিলিকি থকা বিশাল পৰ্দাখন আৰু তাৰ পিছফালে থকা সুন্দৰ হাউচবোটসমূহে পৰিৱেশটোক আৰু অধিক মনোমোহা কৰি তুলিছিল।
মঙলবাৰে ‘অৰ্জুন’ প্ৰদৰ্শন কৰা হয়। তাৰ পিছত বুধবাৰে দেখুওৱা হয় শম্মী কাপুৰ আৰু শৰ্মিলা ঠাকুৰ অভিনীত চিৰসেউজ ছবি ‘কাশ্মীৰ কি কলি’। ছবিখনৰ গান আৰু সংগীত আজিও কেইবাটাও প্ৰজন্মৰ লোকৰ মনত সমানে জনপ্ৰিয় হৈ আছে। ডালহ্ৰদৰ মনোমোহা পৰিৱেশত সেই গানবোৰে যেন নতুন এক সৌন্দৰ্য লাভ কৰিলে।
ডাল হ্ৰদৰ পানীৰ ওপৰত পোহৰেৰে উজলি থকা বিশাল পৰ্দাত ছবি প্ৰদৰ্শন
মহোৎসৱৰ অন্তিম দিনা অৰ্থাৎ ১০ ছেপ্টেম্বৰত প্ৰদৰ্শন কৰা হয় যশ চোপ্ৰাৰ কালজয়ী ছবি ‘কভি কভি’। স্থানীয় বাসিন্দা মুনীৰ আহমেদ লোনৰ বাবে এই অভিজ্ঞতা সম্পূৰ্ণ নতুন আৰু ব্যতিক্ৰমী আছিল।
তেওঁ কয়, "মই জীৱনত বহু চিনেমা চাইছোঁ। কিন্তু ডাল হ্ৰদৰ কাষত, চাৰিওফালে পানীৰ মাজত বহি চিনেমা চোৱাৰ অভিজ্ঞতা সম্পূৰ্ণ বেলেগ।" তেওঁৰ মতে, এইবাৰ হ্ৰদখনো চিনেমা চোৱাৰ অভিজ্ঞতাৰ এক অবিচ্ছেদ্য অংশ হৈ পৰিছে।
আন এগৰাকী স্থানীয় বাসিন্দা ইউছুফ আলীয়ে বিশ্বাস কৰে যে, এনে অনুষ্ঠানে পৰ্যটন ক্ষেত্ৰতো ইতিবাচক প্ৰভাৱ পেলাব পাৰে। সাধাৰণতে মানুহে শ্বিকাৰা ভ্ৰমণৰ বাবে ডাল হ্ৰদলৈ আহে। কিন্তু এইবাৰ হ্ৰদখনেই চিনেমা হলত পৰিণত হোৱাটো পৰিয়াল আৰু যুৱ প্ৰজন্ম উভয়ৰে মাজত বিশেষ আকৰ্ষণৰ সৃষ্টি কৰিছে।
সন্ধিয়া নামি অহাৰ লগে লগে হ্ৰদখনক আগুৰি থকা পাহাৰ আৰু হাউচবোটসমূহৰ পোহৰ জিলিকি উঠিবলৈ ধৰে। সেই দৃশ্যই চিনেমা প্ৰদৰ্শনৰ পৰিৱেশটোক আৰু অধিক আকৰ্ষণীয় কৰি তোলে। এই মহোৎসৱৰ এক আন্তঃৰাষ্ট্ৰীয় পৰিসৰো আছে, কিয়নো এইবাৰ এই মহোৎসৱত ৪১খন দেশৰ ১৩৫খন ছবি ইয়াত প্ৰদৰ্শিত কৰা হৈছে।
সেয়েহে, এই অনুষ্ঠানটোৱে আন্তঃৰাষ্ট্ৰীয় পৰ্যায়ত দৃষ্টি আকৰ্ষণ কৰাৰ লগতে স্থানীয় লোকসকলৰ সৈতেও এক বিশেষ সাংস্কৃতিক সংযোগ গঢ়ি তুলিছে। উপত্যকাৰ ইতিহাসত এইটোৱেই প্ৰথমবাৰৰ বাবে কোনো আন্তঃৰাষ্ট্ৰীয় চলচ্চিত্ৰ মহোৎসৱে ইমান মুকলি আৰু ব্যতিক্ৰমী পৰিৱেশত সাধাৰণ দৰ্শকৰ ওচৰলৈ চিনেমা লৈ আহিছে।
ডাল হ্ৰদৰ পানীৰ ওপৰত পোহৰেৰে উজলি থকা বিশাল পৰ্দাত ছবি প্ৰদৰ্শন
চিনেমা এইবাৰ পৰম্পৰাগত প্ৰেক্ষাগৃহৰ চাৰিবেৰৰ সীমাৰ পৰা ওলাই আহি পোনপটীয়াকৈ মানুহৰ মাজলৈ আহিছে। সাধাৰণতে পৰ্যটন আৰু অৱসৰৰ সৈতে জড়িত শ্বিকাৰাসমূহ এইবাৰ চিনেমাৰ আসনত পৰিণত হৈছে। ইয়াৰ জৰিয়তে প্ৰমাণ হৈছে যে শিল্প, সংস্কৃতি আৰু কাশ্মীৰৰ প্ৰাকৃতিক সৌন্দৰ্য কিমান স্বাভাৱিকভাৱে ইজনে সিজনৰ সৈতে মিলি যাব পাৰে।
এই অনুষ্ঠান কেৱল কেইখনমান ছবি প্ৰদৰ্শনৰ মাজতে সীমাবদ্ধ নাছিল। ই হৈ পৰিছিল কাশ্মীৰৰ চিনেমাৰ সৈতে থকা গভীৰ আৰু চিৰন্তন সম্পৰ্কৰ লগতে ইয়াৰ সমৃদ্ধ সাংস্কৃতিক পৰিৱেশৰ এক উদযাপন।
ডাল হ্ৰদৰ পানীৰ ওপৰত পোহৰেৰে উজলি থকা বিশাল পৰ্দা আৰু তাৰ সন্মুখত শাৰী পাতি থকা অসংখ্য শ্বিকাৰাৰ দৃশ্যই এই মহোৎসৱৰ সাক্ষী হোৱা লোকসকলৰ মনত এই দৃশ্য বহুদিনলৈ সজীৱ হৈ থাকিব।
আকৌ এবাৰ ডাল হ্ৰদে প্ৰমাণ কৰিলে যে, ই কেৱল এখন পৰ্যটনস্থলী নহয়। ই নিজেই এক জীৱন্ত কাহিনী, এনে এক কাহিনী, যিয়ে আজিও চিনেমা, সংস্কৃতি আৰু কল্পনাক অনুপ্ৰাণিত কৰি আহিছে।
