গুৱাহাটী
কৰ্কট ৰোগৰ চিকিৎসাত ব্যৱহৃত ১৩৭ বিধ ঔষধৰ দাম হ্ৰাস কৰাৰ নিৰ্দেশ দিছে অসম ঔষধ নিয়ন্ত্ৰণ প্ৰশাসনে। সোমবাৰে, ২ নৱেম্বৰত জাৰি কৰা এক নিৰ্দেশনা অনুসৰি, অহা ৯ নৱেম্বৰৰ পৰা ৰাজ্যখনৰ সকলো ফাৰ্মাচী, ঔষধ বিতৰক, মজুতকাৰী আৰু চিকিৎসালয়ে এই ঔষধসমূহ সংশোধিত তথা হ্ৰাসকৃত সৰ্বোচ্চ খুচুৰা মূল্যত (MRP) বিক্ৰী কৰিব লাগিব। নতুন মূল্যৰ নিয়ম সঠিকভাৱে পালন কৰা হৈছে নে নাই, সেয়া নিশ্চিত কৰিবলৈ সমগ্ৰ অসমত ৯০ দিনীয়া বিশেষ পৰিদৰ্শন অভিযানো চলোৱা হ’ব।
ৰাষ্ট্ৰীয় ঔষধ মূল্য নিৰ্ধাৰণ কৰ্তৃপক্ষই (NPPA) যোৱা ১৭ অক্টোবৰত জাৰি কৰা এখন চৰকাৰী ৰাজপত্ৰৰ অধিসূচনাৰ ভিত্তিত এই পদক্ষেপ গ্ৰহণ কৰা হৈছে। অধিসূচনাখনৰ জৰিয়তে নিৰ্ধাৰিত ১৩৭ বিধ কৰ্কট ৰোগৰ ঔষধৰ ব্যৱসায়িক লাভৰ সীমা সৰ্বোচ্চ খুচুৰা মূল্যৰ ৩০ শতাংশত নিৰ্ধাৰণ কৰা হৈছে। জনস্বাৰ্থৰ প্ৰতি লক্ষ্য ৰাখি ঔষধৰ মূল্য নিয়ন্ত্ৰণ আদেশ, ২০১৩ৰ ১৯ নম্বৰ অনুচ্ছেদৰ অধীনত এই সিদ্ধান্ত গ্ৰহণ কৰা হৈছে।
নতুন মূল্যৰ নিয়ম প্ৰযোজ্য হ’ব নিৰ্ধাৰিত তালিকাত অন্তৰ্ভুক্ত সকলো অসূচীভুক্ত (Non-scheduled) কৰ্কট ৰোগৰ ঔষধৰ ক্ষেত্ৰত। এই ঔষধসমূহ পৃথকভাৱে বিক্ৰী কৰা হওক বা আন ঔষধৰ সৈতে সংমিশ্ৰিত ৰূপত উপলব্ধ হওক, সকলো ক্ষেত্ৰতে সংশোধিত মূল্য মানি চলিব লাগিব। আনকি পেটেণ্টযুক্ত ঔষধসমূহো এই নিয়মৰ আওতাত থাকিব।
অসম ঔষধ নিয়ন্ত্ৰণ প্ৰশাসনে জাৰি কৰা নিৰ্দেশনা অনুসৰি, ৰাজ্যখনৰ প্ৰতিখন খুচুৰা ঔষধৰ দোকান, চিকিৎসালয়ৰ ঔষধ বিতৰণ কেন্দ্ৰ, মজুতকাৰী আৰু বিতৰকে ৯ নৱেম্বৰৰ পৰা নতুন মূল্য কাৰ্যকৰী কৰিব লাগিব। ইয়াৰ লগতে ঔষধৰ সংশোধিত মূল্যৰ তালিকা গ্ৰাহকে সহজে দেখিব পৰাকৈ প্ৰতিষ্ঠানসমূহৰ চৌহদত স্পষ্টভাৱে প্ৰদৰ্শন কৰিব লাগিব। ঔষধৰ মূল্য নিয়ন্ত্ৰণ আদেশ, ২০১৩ৰ ২৫(৩) নম্বৰ অনুচ্ছেদ অনুসৰি এই নিৰ্দেশ দিয়া হৈছে।
নতুন মূল্যৰ নিয়ম যাতে কঠোৰভাৱে পালন কৰা হয়, তাৰ বাবে অসমজুৰি ৯০ দিন ধৰি বিশেষ পৰিদৰ্শন অভিযান চলোৱা হ’ব। এই অভিযানৰ সময়ত ঔষধৰ দোকান, বিতৰণ কেন্দ্ৰ আৰু চিকিৎসালয়সমূহত নিৰ্ধাৰিত মূল্যতকৈ অধিক দামত ঔষধ বিক্ৰী কৰা হৈছে নেকি, সেয়া পৰীক্ষা কৰা হ’ব।
নিৰ্দেশনা উলংঘা কৰি সংশোধিত সৰ্বোচ্চ খুচুৰা মূল্যতকৈ অধিক দামত ঔষধ বিক্ৰী কৰা প্ৰতিষ্ঠানৰ বিৰুদ্ধে ঔষধৰ মূল্য নিয়ন্ত্ৰণ আদেশ আৰু অত্যাৱশ্যকীয় সামগ্ৰী আইন, ১৯৫৫ৰ অধীনত আইনগত ব্যৱস্থা গ্ৰহণ কৰা হ’ব। এই সন্দৰ্ভত অসম ঔষধ নিয়ন্ত্ৰণ প্ৰশাসনে স্পষ্ট কৰি দিছে যে, নতুন নিৰ্দেশনা তাৎক্ষণিকভাৱে আৰু কঠোৰভাৱে মানি চলাটো সকলো সংশ্লিষ্ট প্ৰতিষ্ঠানৰ বাবে বাধ্যতামূলক।
উল্লেখযোগ্য যে, ৰাষ্ট্ৰীয় পৰ্যায়ত চলোৱা এক পৰ্যালোচনাত বহু অসূচীভুক্ত কৰ্কট ৰোগৰ ঔষধৰ ক্ষেত্ৰত গড় ব্যৱসায়িক মূল্যবৃদ্ধি প্ৰায় ১৭০ শতাংশ হোৱা বুলি ধৰা পৰিছিল। আনকি কিছুমান ক্ষেত্ৰত এই পৰিমাণ ৭০০ শতাংশ পৰ্যন্ত বৃদ্ধি পোৱা দেখা গৈছিল। এনে পৰিস্থিতিত NPPA-ই ব্যৱসায়িক লাভৰ সীমা ৩০ শতাংশত নিৰ্ধাৰণ কৰাৰ সিদ্ধান্ত লৈছে। ইয়াৰ ফলত বৰ্তমানৰ মূল্য নিৰ্ধাৰণৰ ওপৰত নিৰ্ভৰ কৰি সংশ্লিষ্ট ঔষধসমূহৰ দাম ৭০ শতাংশ পৰ্যন্ত হ্ৰাস পোৱাৰ সম্ভাৱনা আছে।
এই নতুন নিয়মৰ আওতাত অহা ১৩৭ বিধ ঔষধ বিভিন্ন প্ৰকাৰৰ কৰ্কট ৰোগৰ চিকিৎসাত ব্যৱহাৰ কৰা হয়। ইয়াৰ ভিতৰত ইমিউন’থেৰাপীৰ দৰে আধুনিক চিকিৎসা পদ্ধতিত ব্যৱহৃত ঔষধো অন্তৰ্ভুক্ত আছে। তালিকাখনত নিভ’লুমাব (Nivolumab), অ’লাপাৰিব (Olaparib), ডেন’ছুমাব (Denosumab) আৰু ট’প’টেকান (Topotecan)ৰ দৰে গুৰুত্বপূৰ্ণ ঔষধৰ নামো আছে।
ইয়াৰ পূৰ্বে ২০১৯ চনতো ৰাষ্ট্ৰীয় ঔষধ মূল্য নিৰ্ধাৰণ কৰ্তৃপক্ষই কৰ্কট ৰোগৰ চিকিৎসাত ব্যৱহৃত ৪২ বিধ ঔষধৰ ব্যৱসায়িক লাভৰ সীমা ৩০ শতাংশত নিৰ্ধাৰণ কৰিছিল। সেই পদক্ষেপৰ ফলত ৫২৬টা ব্ৰেণ্ডৰ ঔষধৰ দাম ৯০ শতাংশ পৰ্যন্ত হ্ৰাস পাইছিল। কৰ্কট ৰোগৰ চিকিৎসা যথেষ্ট ব্যয়বহুল হোৱাৰ পৰিপ্ৰেক্ষিতত এই নতুন সিদ্ধান্তই ৰোগী আৰু তেওঁলোকৰ পৰিয়ালক কিছু পৰিমাণে আৰ্থিক সকাহ দিব বুলি আশা কৰা হৈছে।
ইফালে, সংশ্লিষ্ট অধিসূচনা, চৰকাৰী নিৰ্দেশনা আৰু ঔষধৰ সংশোধিত মূল্যৰ সম্পূৰ্ণ তালিকা ৰাষ্ট্ৰীয় ঔষধ মূল্য নিৰ্ধাৰণ কৰ্তৃপক্ষৰ (NPPA) চৰকাৰী ৱেবছাইটত উপলব্ধ কৰা হৈছে।
