গুৱাহাটী
সমগ্ৰ উত্তৰ-পূব অঞ্চলত অৰ্থনৈতিক সহযোগিতা শক্তিশালী কৰা আৰু বিনিয়োগৰ সুযোগ বিচাৰি উলিওৱাৰ লক্ষ্যৰে দুদিনীয়া ভ্ৰমণসূচীৰে ৮ জুনত হাৰ্ভে ডেলফিনৰ নেতৃত্বত ইউৰোপীয় সংঘৰ উচ্চ পৰ্যায়ৰ প্ৰতিনিধি দল অসমত উপস্থিত হয়।
গুৱাহাটীত উপস্থিত হোৱাৰ পাছত সংবাদ মাধ্যমৰ সৈতে হোৱা বাৰ্তালাপত ডেলফিনে অসমৰ আতিথ্যৰ বাবে কৃতজ্ঞতা প্ৰকাশ কৰি কয় যে, এই ভ্ৰমণকালত অনুষ্ঠিত হ’বলগীয়া বিভিন্ন বৈঠক আৰু আলোচনা সম্পৰ্কে তেওঁ অত্যন্ত আগ্ৰহী।
তেওঁ কয়, “শ্লোগানত কোৱাৰ দৰে ‘গেটৱে টু গুডনেছ’ৰ দৰেই এই ৰাজ্যখন সঁচাকৈয়ে মনোমোহা। মুখ্যমন্ত্ৰীৰ সৈতে হ’বলগীয়া বৈঠকসমূহৰ বাবে মই আগ্ৰহেৰে অপেক্ষা কৰি আছোঁ।”
‘টিম ইউৰোপ’ নামেৰে পৰিচিত এই প্ৰতিনিধি দলটোত ইউৰোপীয় সংঘৰ সদস্য ৰাষ্ট্ৰসমূহৰ ৰাষ্ট্ৰদূত, জ্যেষ্ঠ বিষয়ববীয়া আৰু ইউৰোপীয় ব্যৱসায়িক নেতা অন্তৰ্ভুক্ত আছে। এই ভ্ৰমণৰ মূল লক্ষ্য হৈছে ইউৰোপীয় সংঘ আৰু উত্তৰ-পূব ভাৰতৰ ৰাজ্যসমূহ অসম, অৰুণাচল প্ৰদেশ, মণিপুৰ, মেঘালয়, মিজোৰাম, নাগালেণ্ড, ছিকিম আৰু ত্ৰিপুৰাৰ মাজত সহযোগিতা অধিক সুদৃঢ় কৰা।
ইউৰোপীয় সংঘৰ তথ্য অনুসৰি, এই ভ্ৰমণৰ সময়ছোৱাত ইউৰোপ আৰু উত্তৰ-পূবৰ সহযোগিতাৰ শক্তিশালী সম্ভাৱনা থকা খণ্ডসমূহৰ ওপৰত গুৰুত্ব আৰোপ কৰা হ’ব, য'ত নবীকৰণযোগ্য আৰু সেউজ শক্তি, বহনক্ষম নগৰীয়া আন্তঃগাঁথনি, স্বাস্থ্যসেৱা আৰু ঔষধ উদ্যোগ, অৰ্ধপৰিবাহী (Semiconductor) আৰু ইলেক্ট্ৰনিকছ উৎপাদন, চাহ আৰু কৃষিভিত্তিক খাদ্য প্ৰক্ৰিয়াকৰণ, সোৱাদ আৰু সুগন্ধি উদ্যোগ তথা আয়ুষ খণ্ডকে ধৰি সহযোগিতাৰ শক্তিশালী সম্ভাৱনা আছে।
প্ৰতিনিধি দলটোৱে অসমৰ মুখ্যমন্ত্ৰী হিমন্ত বিশ্ব শৰ্মাৰ সৈতে বৈঠকত মিলিত হ’ব। ইয়াৰ উপৰিও, ফেডাৰেচন অৱ ইউৰোপিয়ান বিজনেছ ইন ইণ্ডিয়াৰ নেতৃত্বত অহা ব্যৱসায়িক প্ৰতিনিধি দলটোৱে ৰাজ্য চৰকাৰৰ বিষয়াসকলৰ সৈতে মত-বিনিময় কৰি বাণিজ্য আৰু বিনিয়োগৰ সম্ভাৱনা পৰ্যালোচনা কৰিব।
এই ভ্ৰমণৰ অন্যতম আকৰ্ষণ হ’ব “ব্লু ভেলী: ভাৰত আৰু ইউৰোপৰ মাজত পৰিৱেশ তন্ত্ৰ আৰু মূল্য শৃংখল গঢ়ি তোলা” শীৰ্ষক কৰ্মশালা। এই কৰ্মশালাত ইউৰোপীয় আৰু ভাৰতীয় উদ্যোগপতি তথা ব্যৱসায়ীসকলে বহনক্ষম উদ্যোগ, উদ্ভাৱন আৰু মূল্য শৃংখলভিত্তিক অংশীদাৰিত্বৰ বিষয়ে আলোচনা কৰিব।
এই ভ্ৰমণৰ সময়ছোৱাত অসমৰ প্ৰথম ব্লু ভেলী ক্লাষ্টাৰ উদ্বোধন কৰা হ’ব, যিটো সুগন্ধি, সোৱাদ, খাদ্য প্ৰক্ৰিয়াকৰণ আৰু আয়ুষ সামগ্ৰীৰ ওপৰত কেন্দ্ৰিত এক বিশেষ উদ্যোগিক কেন্দ্ৰ। এই পদক্ষেপৰ জৰিয়তে ইউৰোপ, উত্তৰ-পূব ভাৰত আৰু ভূটানৰ মাজত গৱেষণা, উদ্ভাৱন আৰু বহনক্ষম উৎপাদনভিত্তিক অংশীদাৰিত্ব গঢ়ি তোলাৰ লক্ষ্য গ্ৰহণ কৰা হৈছে।
ইয়াৰ উপৰিও, প্ৰতিনিধি দলটোৱে টাটা ইলেক্ট্ৰনিকছৰ অৰ্ধপৰিবাহী উৎপাদন সুবিধা পৰিদৰ্শন কৰাৰ সম্ভাৱনা আছে। ইয়াৰ জৰিয়তে ভাৰতৰ উচ্চ-প্ৰযুক্তি উৎপাদন খণ্ডত অসমৰ ক্ৰমবৰ্ধমান ভূমিকা প্ৰদৰ্শিত হ’ব।
বিষয়াসকলৰ মতে, এই ভ্ৰমণে ইউৰোপীয় বিনিয়োগকাৰীসকলক অসমৰ উদ্যোগিক পৰিৱেশ, আন্তঃগাঁথনিৰ সক্ষমতা আৰু দ্ৰুতগতিত বৃদ্ধি পোৱা অৰ্থনৈতিক সম্ভাৱনাৰ বিষয়ে প্ৰত্যক্ষভাৱে জানিবলৈ এক গুৰুত্বপূৰ্ণ সুযোগ প্ৰদান কৰিব।
