নতুন দিল্লী
ৰাষ্ট্ৰীয় নিৰাপত্তাৰ ক্ষেত্ৰত ভাৰতে কোনো ধৰণৰ আপোচ নকৰে আৰু চুবুৰীয়া দেশে সন্ত্ৰাসবাদক ‘প্ৰচাৰ’ কৰি থকালৈকে সন্ত্ৰাসবাদীৰ বিৰুদ্ধে আক্ৰমণ চলাবলৈ ভাৰত সাজু থাকিব বুলি প্ৰতিৰক্ষা মন্ত্ৰী ৰাজনাথ সিঙে দেওবাৰে মন্তব্য কৰে।
'এনডিটিভি ডিফেন্স ছামিট ২০২৬'ত ভাষণ দি সিঙে কয় যে, ভাৰতে শান্তি বিচাৰে আৰু যুদ্ধ বা আন কোনো দেশৰ ভূমি দখল কৰাৰ আকাংক্ষা নকৰে। কিন্তু শান্তিৰ প্ৰতি থকা ভাৰতৰ আগ্ৰহক দুৰ্বলতা বুলি ভুল কৰা উচিত নহয় বুলিও তেওঁ সতৰ্ক কৰি দিয়ে।
তেওঁ কয়, “ভাৰতে শান্তিত বিশ্বাস কৰে, যুদ্ধ নিবিচাৰে। আমি আন কোনো দেশৰ ভূমি দখল কৰিব নিবিচাৰোঁ, কাকো ভাবুকি দিব নিবিচাৰোঁ। কিন্তু নীৰৱতা আৰু দুৰ্বলতাৰ মাজত পাৰ্থক্য আছে।"
তেওঁ লগতে কয়, “ভাৰতে শান্তি বিচাৰে, কিন্তু ৰাষ্ট্ৰীয় নিৰাপত্তাৰ ক্ষেত্ৰত কোনো আপোচ নকৰে। যেতিয়ালৈকে আমাৰ চুবুৰীয়া দেশে সন্ত্ৰাসবাদ প্ৰচাৰ কৰি থাকিব, তেতিয়ালৈকে সন্ত্ৰাসবাদীৰ বিৰুদ্ধে যিকোনো আক্ৰমণ চলাবলৈ আমি সাজু থাকিম। এই বাৰ্তা আমি তেওঁলোকক আৰু সমগ্ৰ বিশ্বক দিব বিচাৰোঁ।”
চুবুৰীয়া দেশ বুলি উল্লেখ কৰি প্ৰতিৰক্ষা মন্ত্ৰীগৰাকীয়ে পাকিস্তানৰ প্ৰতি ইংগিত কৰে। দীৰ্ঘদিন ধৰি পাকিস্তানত ভাৰতত আক্ৰমণ সংঘটিত কৰা কেইবাটাও সন্ত্ৰাসবাদী নেটৱৰ্কে আশ্ৰয় লাভ কৰি অহাৰ অভিযোগ উত্থাপিত হৈ আহিছে।
ভাৰতে দীৰ্ঘদিন ধৰি এই স্থিতি প্ৰকাশ কৰি আহিছে যে, পাকিস্তানী বা পাকিস্তানভিত্তিক সন্ত্ৰাসবাদীয়ে দেশখনত একাধিক সন্ত্ৰাসবাদী আক্ৰমণ সংঘটিত কৰিছে। ২০২৫ চনৰ ২২ এপ্ৰিলত জম্মু-কাশ্মীৰৰ জনপ্ৰিয় পৰ্যটনস্থলী পাহেলগামত পাকিস্তানভিত্তিক সন্ত্ৰাসবাদীয়ে আক্ৰমণ চলাইছিল। এই আক্ৰমণত এজন নেপালী নাগৰিকসহ ২৬জন লোক নিহত হৈছিল আৰু কেইবাজনো লোক আহত হৈছিল।
ইয়াৰ প্ৰতিক্ৰিয়াস্বৰূপে ভাৰতে পাকিস্তান আৰু পাকিস্তান অধিকৃত কাশ্মীৰত থকা সন্ত্ৰাসবাদী ঘাটিসমূহত ক্ষেপণাস্ত্ৰ আক্ৰমণ চলাইছিল। এই আক্ৰমণৰ লক্ষ্যস্থানসমূহৰ ভিতৰত মুজাফফৰাবাদ, কোটলী, বাহাৱালপুৰ, ৰাৱালকোট, চকছৱাৰী, ভিম্বৰ, নীলম উপত্যকা, ঝেলম আৰু চকৱাল আছিল।
তেওঁ লগতে কয়, “ভাৰতে আলোচনাত বিশ্বাস কৰে। কিন্তু কোনো দেশে যদি সন্ত্ৰাসবাদ প্ৰচাৰ কৰে, তেন্তে সেই মুহূৰ্ততে আলোচনা শেষ হ’ব। ভাৰতে সহযোগিতা বিচাৰে, কিন্তু ৰাষ্ট্ৰীয় স্বাৰ্থৰ মূল্যত নহয়।”
এদিনীয়াকৈ অনুষ্ঠিত হোৱা এই ডিফেন্স ছামিটত দেশৰ প্ৰতিৰক্ষা সক্ষমতা সম্পৰ্কে আলোচনাৰ বাবে জ্যেষ্ঠ প্ৰতিৰক্ষা বিষয়া, সামৰিক বিষয়া আৰু উদ্যোগ খণ্ডৰ নেতাসকল একত্ৰিত হৈছে।
