গুৱাহাটী
মণিপুৰৰ মুখ্যমন্ত্ৰী ৱাই. খেতচান্দ সিঙে কৈছে যে ইম্ফলক ৰাষ্ট্ৰীয় ৰে’ল নেটৱৰ্কৰ সৈতে সংযোগ কৰিবলগীয়া ৰে’ল প্ৰকল্পটো নিৰ্ধাৰিত সময়ত সম্পূৰ্ণ কৰাটো নিশ্চিত কৰিবলৈ ৰাজ্য চৰকাৰে সকলো প্ৰয়োজনীয় সহযোগিতা আগবঢ়াব।
অসমৰ কাছাৰ জিলাৰ সীমান্তত অৱস্থিত জিৰিবাম চহৰৰ সৈতে ইম্ফলক সংযোগ কৰিবলগীয়া এই প্ৰস্তাৱিত ৰে’ল পথটো ১১১ কিলোমিটাৰ দৈৰ্ঘ্যৰ এক গুৰুত্বপূৰ্ণ আন্তঃগাঁথনি প্ৰকল্প, যাৰ আনুমানিক ব্যয় ২২,০০০ কোটি টকাতকৈও অধিক। এই ৰে’ল পথটো ২০২৮ চনৰ ভিতৰত সম্পূৰ্ণৰূপে কাৰ্যক্ষম হোৱাৰ আশা কৰা হৈছে।
শুকুৰবাৰে নিশা মুখ্যমন্ত্ৰীৰ সচিবালয়ত উত্তৰ-পূব সীমান্ত ৰে’লৱেৰ বিষয়াৰ সৈতে এখন বৈঠক অনুষ্ঠিত কৰাৰ পিছত মুখ্যমন্ত্ৰীগৰাকীয়ে এই মন্তব্য কৰে। এই বৈঠকত উত্তৰ-পূব সীমান্ত ৰে’লৱেৰ জেনেৰেল মেনেজাৰ (নিৰ্মাণ, মালিগাঁও) আশীষ বানচালো উপস্থিত আছিল।
ছ’চিয়েল মিডিয়াত বৈঠকৰ সবিশেষ শ্বেয়াৰ কৰি সিঙে কয় যে প্ৰতিনিধি দলটোৱে তেওঁক ইম্ফল সংযোগী ৰে’ল পথটোৰ শেহতীয়া অগ্ৰগতিৰ বিষয়ে অৱগত কৰিছে। তেওঁ এই প্ৰকল্পটোক ৰাজ্যখনৰ বাবে এক মাইলৰ খুঁটি স্বৰূপ আন্তঃগাঁথনি প্ৰকল্প বুলি অভিহিত কৰে।
তেওঁ কয় যে এই ৰে’ল পথটো মুকলি হ’লে মণিপুৰৰ পৰিবহণ আন্তঃগাঁথনি উল্লেখযোগ্যভাৱে শক্তিশালী হ’ব, দেশৰ বাকী অংশৰ সৈতে যোগাযোগ উন্নত হ’ব আৰু এক অধিক দক্ষ তথা সুৰক্ষিত যোগান শৃংখল নিশ্চিত হ’ব।
সিঙে কয়, "মণিপুৰৰ প্ৰগতি আৰু সমৃদ্ধিৰ বাবে এই অতি গুৰুত্বপূৰ্ণ প্ৰকল্পটো নিৰ্ধাৰিত সময়ত সম্পূৰ্ণ হোৱাটো নিশ্চিত কৰিবলৈ চৰকাৰে সকলো প্ৰয়োজনীয় সহযোগিতা আগবঢ়াবলৈ সম্পূৰ্ণৰূপে অংগীকাৰবদ্ধ।"
তেওঁ লগতে কয় যে প্ৰধানমন্ত্ৰী নৰেন্দ্ৰ মোদীৰ উন্নয়নমূলক দৃষ্টিভংগীৰ সৈতে সংগতি ৰাখি এই প্ৰকল্পটোৱে ৰাজ্যখনৰ মানুহৰ জীৱন ধাৰণৰ মান উন্নত কৰাত সহায় কৰিব।
ইম্ফল-জিৰিবাম ৰে’ল প্ৰকল্পটো সম্পূৰ্ণ হোৱাৰ পিছত এই অঞ্চলটোৰ যাতায়ত ব্যৱস্থা আৰু অৰ্থনৈতিক উন্নয়নত এক বিশেষ গতি লাভ কৰিব বুলি আশা কৰা হৈছে।
.webp "ভাতৃত্ববোধৰ অনন্য নিদৰ্শন")
