শ্ৰীনগৰ
জম্মু-কাশ্মীৰৰ ওমৰ আব্দুল্লা নেতৃত্বাধীন চৰকাৰৰ ভিতৰচ’ৰাত তীব্ৰ সংকটৰ সৃষ্টি হোৱাৰ খবৰ পোৱা গৈছে। নেচনেল কনফাৰেন্সৰ (এনচি) ২৫ গৰাকী অসন্তুষ্ট বিধায়কে দলীয় নেতৃত্বক দাবী পূৰণৰ বাবে ১৪ দিনৰ সময়সীমা বান্ধি দিছে। নিৰ্ধাৰিত সময়ৰ ভিতৰত দাবীসমূহৰ ক্ষেত্ৰত সুনিৰ্দিষ্ট পদক্ষেপ গ্ৰহণ নকৰিলে ৰাজভৱনলৈ গৈ চৰকাৰৰ প্ৰতি আনুষ্ঠানিকভাৱে সমৰ্থন প্ৰত্যাহাৰ কৰিব বুলি তেওঁলোকে সকীয়াই দিয়া বুলি সূত্ৰই প্ৰকাশ কৰিছে।
অসন্তুষ্ট বিধায়কসকলৰ এই স্থিতিয়ে আব্দুল্লা নেতৃত্বৰ ওপৰত চাপ বৃদ্ধি কৰাৰ লগতে দলৰ বিধায়িনী গোটত বৃহৎ বিভাজনৰ আশংকা সৃষ্টি কৰিছে। তেওঁলোকৰ দাবী কেৱল মন্ত্ৰীৰ দপ্তৰ সালসলনিতে সীমাবদ্ধ নহয়; চৰকাৰ আৰু মন্ত্ৰী পৰিষদৰ সম্পূৰ্ণ পুনৰ্গঠন বিচাৰিছে এই গোটটোৱে।
অসন্তুষ্ট বিধায়কসকলৰ মুখ্য দাবী হৈছে ১৪ দিনৰ ভিতৰত বৰ্তমানৰ সকলো মন্ত্ৰীক তেওঁলোকৰ দপ্তৰৰ দায়িত্বৰ পৰা অব্যাহতি দিয়া আৰু মুখ্যমন্ত্ৰীৰ উপদেষ্টাক তাৎক্ষণিকভাৱে অপসাৰণ কৰা। সংকট সমাধানৰ বাবে তেওঁলোকে এই দাবীসমূহকে ধৰি কেইবাটাও চৰ্ত দলীয় নেতৃত্বৰ সন্মুখত উত্থাপন কৰিছে।
বিধায়কসকলে স্বচ্ছ আৰু যোগ্যতাভিত্তিক প্ৰক্ৰিয়াৰে সম্পূৰ্ণ নতুন মন্ত্ৰী পৰিষদ গঠনৰ দাবীও জনাইছে। তেওঁলোকৰ মতে, মন্ত্ৰী নিযুক্তিৰ সিদ্ধান্ত লোৱাৰ পূৰ্বে সমগ্ৰ বিধায়িনী দলৰ সৈতে আলোচনা কৰিব লাগিব। নিৰ্বাচিত কেইজনমান ব্যক্তিয়ে এই প্ৰক্ৰিয়াত একপক্ষীয় নিয়ন্ত্ৰণ চলোৱাত তেওঁলোকে আপত্তি প্ৰকাশ কৰিছে।
ইয়াৰ লগতে দলৰ আদৰ্শগত অংগীকাৰ আৰু নিৰ্বাচনী ইস্তাহাৰত দিয়া প্ৰতিশ্ৰুতিৰ প্ৰসংগও উত্থাপন কৰিছে অসন্তুষ্ট বিধায়কসকলে। সংবিধানৰ ৩৭০ অনুচ্ছেদ, ৩৫এ অনুচ্ছেদ আৰু সংশ্লিষ্ট অন্যান্য সাংবিধানিক সুৰক্ষা পুনৰুদ্ধাৰৰ বাবে অধিক জোৰদাৰ পদক্ষেপ গ্ৰহণৰ দাবী জনাইছে তেওঁলোকে। এই বিষয়সমূহত আপোচ কৰা হৈছে বুলি তেওঁলোকে যি অভিযোগ তুলিছে, তাৰো বিৰোধিতা কৰিছে।
অসন্তুষ্ট গোটটোৱে বিচাৰিছে যে ৰাজ্য চৰকাৰে বিজেপি নেতৃত্বাধীন কেন্দ্ৰীয় চৰকাৰৰ সন্মুখত এই দাবীসমূহ দৃঢ়তাৰে উত্থাপন কৰক। সময়সীমা উকলাৰ আগতে নেতৃত্বই কাৰ্যকৰী পদক্ষেপ গ্ৰহণ নকৰিলে ৰাজভৱনত সমৰ্থন প্ৰত্যাহাৰৰ সিদ্ধান্ত আনুষ্ঠানিকভাৱে জনাব বুলি গোটটোৰ সৈতে জড়িত সূত্ৰই দাবী কৰিছে।
দলৰ ভিতৰত এই অসন্তোষৰ খবৰ এনে সময়ত আহিছে, যেতিয়া শ্ৰীনগৰৰ সাংসদ আগা ছৈয়দ ৰুহুল্লাহ মেহদীৰ পদত্যাগৰ ঘোষণাক লৈও নেচনেল কনফাৰেন্সৰ নেতৃত্ব চাপৰ সন্মুখীন হৈছে। ৰুহুল্লাহে ৩ নৱেম্বৰত দল আৰু লোকসভাৰ আসন -- উভয়ৰ পৰা আনুষ্ঠানিকভাৱে পদত্যাগ কৰিব বুলি ঘোষণা কৰিছে। তেওঁৰ কাৰ্যালয়েও এই সিদ্ধান্ত ৰাজহুৱা কৰিছে।
ৰুহুল্লাহে দলীয় নেতৃত্বৰ বিৰুদ্ধে আদৰ্শগত অংগীকাৰ শিথিল কৰাৰ অভিযোগ তুলিছে। তেওঁৰ অভিযোগ অনুসৰি, ২০১৯ চনৰ ৫ আগষ্টত অনা সাংবিধানিক পৰিৱৰ্তনসমূহক প্ৰত্যাহ্বান জনোৱাৰ প্ৰতিশ্ৰুতিৰে দলে যি জনাদেশ লাভ কৰিছিল, নেতৃত্ব সেই প্ৰতিশ্ৰুতিৰ পৰা আঁতৰি আহিছে। ৩৭০ অনুচ্ছেদ পুনৰুদ্ধাৰৰ নিৰ্বাচনী প্ৰতিশ্ৰুতি পালন নকৰাক লৈও তেওঁ দলক সমালোচনা কৰিছে।
এফালে ৰুহুল্লাহৰ আদৰ্শগত প্ৰশ্ন আৰু পদত্যাগৰ ঘোষণা, আনফালে বিধায়িনী গোটৰ ২৫ গৰাকী সদস্যৰ সমৰ্থন প্ৰত্যাহাৰৰ ভাবুকি -- এই দুয়োটা ঘটনাই নেচনেল কনফাৰেন্সৰ নেতৃত্বক একাধিক দিশৰ পৰা চাপত পেলাইছে।
৯০ সদস্যবিশিষ্ট জম্মু-কাশ্মীৰ বিধানসভাত নেচনেল কনফাৰেন্সৰ ৪১ গৰাকী বিধায়ক আছে। ইয়াৰে ২৫ গৰাকীয়ে একেলগে সমৰ্থন প্ৰত্যাহাৰ কৰিলে চৰকাৰৰ সংখ্যাগত শক্তি গুৰুতৰভাৱে হ্ৰাস পাব। নিৰ্দলীয় বিধায়ক আৰু বাহিৰৰ পৰা সমৰ্থন আগবঢ়োৱা সহযোগীসকলৰ সমৰ্থনৰ সত্ত্বেও চৰকাৰৰ সংখ্যাগৰিষ্ঠতা আৰু স্থায়িত্ব গভীৰ সংকটত পৰাৰ আশংকা আছে।
এই পৰিস্থিতিত অসন্তোষ প্ৰশমিত কৰা, বিধায়কসকলৰ দাবীৰ সমাধান উলিওৱা আৰু বিধায়িনী দলত বিভাজন ৰোধ কৰাই আব্দুল্লা নেতৃত্বৰ তাৎক্ষণিক প্ৰত্যাহ্বান হৈ পৰিছে। ১৪ দিনৰ সময়সীমা আৰু ৩ নৱেম্বৰত ৰুহুল্লাহৰ ঘোষিত পদত্যাগৰ পৰিপ্ৰেক্ষিতত আগন্তুক দিনকেইটা দল তথা ওমৰ আব্দুল্লা চৰকাৰৰ ভৱিষ্যতৰ বাবে গুৰুত্বপূৰ্ণ হৈ উঠিছে।
