শিলচৰ
অসমৰ কাছাৰ জিলাৰ আমৰাঘাটত গেছৰ সন্ধান লাভ কৰাৰ পাছত তেল আৰু প্ৰাকৃতিক গেছ নিগম (ONGC)এ অঞ্চলটোত অন্বেষণ আৰু উন্নয়নৰ কাম অধিক তীব্ৰতৰ কৰিছে বুলি অ’এনজিচিৰ সঞ্চালক (ইনভেষ্টিগেচন) ওম প্ৰকাশ সিনহাই উল্লেখ কৰিছে।
অ’এনজিচিৰ কাছাৰ ফৰৱাৰ্ড বেছৰ অধীনত থকা আমৰাঘাট গেছ নিষ্কাশন কেন্দ্ৰ পৰিদৰ্শন কৰি সিনহাই অন্বেষণ কামৰ অগ্ৰগতি, অঞ্চলটোৰ হাইড্ৰ’কাৰ্বনৰ সম্ভাৱনা আৰু প্ৰকল্পটোৰ কাৰিকৰী দিশসমূহ পৰ্যালোচনা কৰে।
সিনহাই কয়, “আমৰাঘাটত গেছ পোৱা গৈছে আৰু প্ৰকল্পটোৰ কাম দ্ৰুতগতিত আগবাঢ়িছে। কেন্দ্ৰটোত প্ৰতিদিনে এক লাখতকৈ অধিক ইউনিট গেছ নিষ্কাশন কৰা হৈছে।"
অ’এনজিচিৰ ভূ-বিজ্ঞানীসকলে অঞ্চলটোৰ সম্ভাৱনা ইতিমধ্যে মূল্যায়ন কৰিছে বুলি উল্লেখ কৰি তেওঁ কয় যে, গেছ পৰিবহণৰ বাবে এটা পাইপলাইন অতি প্ৰয়োজনীয় হ’ব। প্ৰকল্পটোৰ সৈতে জড়িত কাম-কাজ দিনে-নিশাই অব্যাহত আছে।
আমৰাঘাট প্ৰকল্পটোৰ উন্নয়নৰ কাম কেইবাবছৰ ধৰি চলি আছে। অঞ্চলটোত তেল আৰু গেছৰ অন্বেষণ, উন্নয়ন আৰু উৎপাদনৰ বাবে ইতিমধ্যে পৰিৱেশগত অনুমোদন লাভ কৰা হৈছে।
সিনহাই কয় যে, বৰাক উপত্যকা প্ৰায় পাঁচ দশক ধৰি গেছ উৎপাদনৰ সৈতে জড়িত হৈ আহিছে। আমৰাঘাট প্ৰকল্পই অঞ্চলটোত ভৱিষ্যতে আৰু অধিক অন্বেষণৰ নতুন সুযোগ মুকলি কৰিব পাৰে বুলিও তেওঁ আশা প্ৰকাশ কৰে।
প্ৰকল্পটোৰ জৰিয়তে স্থানীয়ভাৱে কৰ্মসংস্থাপন আৰু বিনিয়োগৰ সম্ভাৱনাও বৃদ্ধি পাব বুলি তেওঁ উল্লেখ কৰে। অঞ্চলটোৰ জনসাধাৰণৰ সৈতে সমন্বয় স্থাপন কৰি অ'এনজিচিয়ে কাম কৰি আছে বুলিও সিনহাই কয়।
ইয়াৰ উপৰি, অ'এনজিচিয়ে নিজৰ কৰ্প'ৰেট সামাজিক দায়বদ্ধতা (CSR) কাৰ্যসূচীৰ জৰিয়তে স্বাস্থ্য আৰু শিক্ষা খণ্ডতো বিভিন্ন পদক্ষেপ গ্ৰহণ কৰি আছে বুলি তেওঁ জানিবলৈ দিয়ে।
সিনহাৰ সৈতে অ'এনজিচিৰ বেচিন মেনেজাৰ কে কাৰভান্নান, শিলচৰ ফৰৱাৰ্ড বেছৰ জেনেৰেল মেনেজাৰ তথা মুৰব্বী এ কে ৱালিয়া আৰু জিএম-এলএমডিএছ এছ কে ছ' উপস্থিত আছিল।
