গুৱাহাটী
অসমৰ মুখ্যমন্ত্ৰী হিমন্ত বিশ্ব শৰ্মাই জনোৱা মতে, ৰাজ্য চৰকাৰে নিজা উপগ্ৰহ উৎক্ষেপণৰ বাবে ব্যক্তিগত খণ্ডৰ এটা অংশীদাৰ বাছনি কৰাৰ প্ৰক্ৰিয়া এতিয়া চূড়ান্ত পৰ্যায়ত উপনীত হৈছে।
তেওঁ কয় যে, ভাৰতৰ ভিতৰত অসমেই প্ৰথমখন ৰাজ্য হ’ব, যিয়ে নিজা পৃথিৱী পৰ্যবেক্ষণ ব্যৱস্থা (Earth Observation System) স্থাপন কৰিব। এই উপগ্ৰহটো ‘DBLOTT’ আৰ্হিৰ অধীনত নিৰ্মাণ কৰা হ’ব। DBLOTTৰ অৰ্থ হৈছে Design, Build, Launch, Operate, Train and Transfer, অৰ্থাৎ উপগ্ৰহটোৰ পৰিকল্পনা, নিৰ্মাণ, উৎক্ষেপণ, পৰিচালনা, প্ৰশিক্ষণ আৰু পিছত দায়িত্ব হস্তান্তৰ।
মুখ্যমন্ত্ৰীগৰাকীয়ে সামাজিক মাধ্যমত প্ৰকাশ কৰা মতে, চলিত বছৰৰ আৰম্ভণিতে এই প্ৰকল্পৰ বাবে ব্যক্তিগত মহাকাশ খণ্ডৰ পৰা আগ্ৰহৰ প্ৰকাশ (Expression of Interest) বিচৰা হৈছিল। দেশৰ কেইবাটাও ব্যক্তিগত মহাকাশ প্ৰযুক্তি প্ৰতিষ্ঠানে ইয়াত যথেষ্ট আগ্ৰহ প্ৰকাশ কৰাৰ পিছত এতিয়া অংশীদাৰ বাছনিৰ গুৰুত্বপূৰ্ণ আৰু চূড়ান্ত পৰ্যায়ৰ কাম চলি আছে। বিভিন্ন সমিতিয়ে প্ৰতিষ্ঠানসমূহে দাখিল কৰা প্ৰস্তাৱসমূহ পৰ্যালোচনা কৰি আছে।
তেওঁ কয় যে ‘AssamSAT’ অসমৰ বাবে এক গুৰুত্বপূৰ্ণ পৰিৱৰ্তনৰ সূচনা কৰিব। এতিয়ালৈকে অসমে উপগ্ৰহৰ পৰা লাভ কৰা তথ্য ব্যৱহাৰ কৰি আহিছিল। কিন্তু এই প্ৰকল্পৰ জৰিয়তে অসমে নিজেই মহাকাশ-প্ৰযুক্তিৰ ক্ষেত্ৰত সক্ৰিয়ভাৱে অংশগ্ৰহণ কৰাৰ সুযোগ লাভ কৰিব। ইয়াৰ ফলত চৰকাৰী কাম-কাজত অধিক দ্ৰুত আৰু তথ্যভিত্তিক সিদ্ধান্ত গ্ৰহণ কৰাটো সম্ভৱ হ’ব।
২০২৫-২৬ বিত্তীয় বৰ্ষৰ ৰাজ্যিক বাজেট উপস্থাপনৰ সময়ত তদানীন্তন বিত্তমন্ত্ৰী অজন্তা নেওগে অসম চৰকাৰে নিজা উপগ্ৰহ স্থাপন কৰাৰ কথা ঘোষণা কৰিছিল। এই উপগ্ৰহৰ জৰিয়তে বিভিন্ন গুৰুত্বপূৰ্ণ সামাজিক আৰু অৰ্থনৈতিক আঁচনি ৰূপায়ণৰ বাবে প্ৰয়োজনীয় তথ্য সংগ্ৰহ কৰাৰ লগতে ৰাজ্যখনৰ সীমান্ত অঞ্চলসমূহৰ ওপৰতো নজৰ ৰখাত সহায় হ’ব বুলি তেওঁ উল্লেখ কৰিছিল।
তেওঁ কৈছিল যে, মহাকাশ বিভাগৰ অধীনস্থ IN-SPACe (Indian National Space Promotion and Authorisation Centre)-ৰ সহযোগত ‘ASSAMSAT’ স্থাপন কৰাৰ পৰিকল্পনা কৰা হৈছে। ইয়াৰ জৰিয়তে ৰাজ্য চৰকাৰে গুৰুত্বপূৰ্ণ সামাজিক-অৰ্থনৈতিক প্ৰকল্পসমূহ ৰূপায়ণৰ বাবে নিয়মীয়া আৰু নিৰ্ভৰযোগ্য উপগ্ৰহ-তথ্য লাভ কৰিব।
অজন্তা নেওগে লগতে উল্লেখ কৰিছিল যে, এই উপগ্ৰহটোৱে কৃষি, দুৰ্যোগ ব্যৱস্থাপনা, আন্তঃগাঁথনি উন্নয়ন, সীমান্ত সুৰক্ষা আৰু আৰক্ষীৰ বিভিন্ন কাম-কাজত বিশেষ সহায় আগবঢ়াব।
.webp "প্ৰতিনিধিত্বমূলক ছবি")
