উল্লেখ্য যে ১৯৪৩ চনৰ ১ এপ্রিলত জন্মগ্ৰহণ কৰা দুলাল ৰয়ে ১৯৬৬ চনতেই ৰাষ্ট্ৰীয় নাট্য বিদ্যালয়ৰ পৰা পৰিচালনা বিভাগত উত্তীৰ্ণ হোৱাৰ পিচত পুনেৰ ভাৰতীয় চলচ্চিত্র আৰু দূৰদৰ্শন প্রতিষ্ঠানৰ পৰা সম্পাদনাৰ ডিপ্লমা গ্রহণ কৰি নাট আৰু চলচ্চিত্ৰ ক্ষেত্ৰখনৰ সৈতে ওতঃপ্রোতভাৱে জড়িত হৈ পৰে। ইয়াৰ মাজতেই দুলাল ৰয়ে হিন্দী ছবিৰ পৰিচালনাৰ কাম শিকিবৰ বাবে মুম্বাইলৈ যাত্ৰা কৰি ৪ খন হিন্দী ছবিৰ সম্পাদনাৰ সহকাৰী হিচাপে খ্যাতি অর্জন কৰিছে।

আনহাতে ডিব্ৰুগড় অনাতাঁৰ কেন্দ্ৰৰ প্ৰথমগৰাকী বাতৰি পঢ়োতা আৰু দূৰদৰ্শন, নেচনেল জিঅ'গ্ৰাফী, ডিস্ক'ভাৰী চেনেলত এশৰো অধিক ডকুমেন্টৰীত বিৱৰণী দিওঁতা হিচাপে খ্যাতি অর্জন কৰা চৈয়াদ ছাদুল্লাৰ জন্ম হৈছিল ১৯৪৮ চনৰ ১ ফেব্ৰুৱাৰীত। ১৯৭১ চনৰ পৰা ৭৫ চনলৈ ডিব্ৰুগড় অনাতাঁৰ কেন্দ্ৰৰ ঘোষক দায়িত্ব, ১৯৭৫ চনৰ পৰা ৮৩ চনলৈ ডিব্ৰুগড় অনাতাঁৰ কেন্দ্ৰৰ ষ্টাফ আর্টিষ্ট, ১৯৮৩ চনৰ পৰা ৮৫ চনলৈ মুম্বাই অনাতাঁৰ কেন্দ্ৰৰ ষ্টাফ আর্টিষ্ট, ১৯৮৫ চনৰ পৰা ২০০৮ চনলৈ ডিব্ৰুগড় অনাতাঁৰ কেন্দ্ৰৰ ষ্টাফ আর্টিষ্ট হিচাপে নিয়োজিত হৈ থকা চৈয়দ ছাদুল্লা আকাশবাণীৰ একেবাৰে 'এ গ্রেড' গীতিকাৰ, সংগীত ব্যৱস্থাপক, গীটাৰবাদক, অভিনেতা আৰু নাট্যকাৰ হিচাপে কৃতিত্বৰ অধিকাৰী হৈছে।