গুৱাহাটী
নিৰ্বাচন আয়োগৰ ওচৰত দাখিল কৰা ব্যয়ৰ প্ৰতিবেদন অনুসৰি, ২০২৬ চনৰ বিধানসভা নিৰ্বাচনৰ সময়ত ভাৰতীয় জনতা পাৰ্টিয়ে অসমত নিৰ্বাচনী প্ৰচাৰৰ বাবে ৯৬.২৭ কোটি টকা খৰচ কৰিছিল। এই পৰিমাণ ৰাজ্যখনত দলীয় সাধাৰণ প্ৰচাৰৰ নামত কংগ্ৰেছে ব্যয় কৰা ২২.৬২ কোটি টকাৰ তুলনাত চাৰিগুণতকৈও অধিক।
ৰাজহুৱা হোৱা তিনিখন ৰাজ্যৰ তথ্যৰ ভিতৰত অসমতেই বিজেপিয়ে সৰ্বাধিক নিৰ্বাচনী ব্যয় কৰিছিল। অসমত ব্যয় কৰা ৯৬.২৭ কোটি টকাৰ ভিতৰত ৭৬.৭৩ কোটি টকা দলীয় সাধাৰণ প্ৰচাৰৰ বাবে আৱণ্টন কৰা হৈছিল আৰু বাকী ১৯.৫৪ কোটি টকা প্ৰাৰ্থীসকলৰ তথা আনুষংগিক ব্যয়ৰ নামত খৰচ কৰা হৈছিল।
অসমত বিজেপিৰ সাধাৰণ প্ৰচাৰ ব্যয়ৰ আটাইতকৈ ডাঙৰ অংশটো আছিল বিজ্ঞাপন, যাৰ বাবদ প্ৰায় ৩৭ কোটি টকা খৰচ হৈছিল। একেদৰে তাৰকা প্ৰচাৰকসকলৰ যাতায়াতৰ নামত আন ২৭.৩ কোটি টকা ব্যয় হৈছিল।
আনহাতে, কংগ্ৰেছে অসমত দলীয় সাধাৰণ প্ৰচাৰৰ নামত ২২.৬২ কোটি টকা ব্যয় হোৱাৰ কথা জনাইছিল। কেৰালাৰ পিছতে অসমতেই কংগ্ৰেছে দ্বিতীয় সৰ্বাধিক প্ৰচাৰ ব্যয় কৰিছিল; দলটোৱে কেৰালাত ৫৯.২৮ কোটি টকা খৰচ কৰিছিল।
পাঁচখন ৰাজ্যৰ বিধানসভা নিৰ্বাচনৰ সময়ছোৱাত দুয়োটা দলৰ হাতত থকা আৰ্থিক সম্পদৰ মাজত দেখা দিয়া বৃহৎ ব্যৱধানৰ বাবেই প্ৰচাৰ ব্যয়ৰ মাজতো এনে এক স্পষ্ট পাৰ্থক্য পৰিলক্ষিত হৈছিল।
দাখিল কৰা হিচাপ অনুসৰি, নিৰ্বাচনৰ সময়ছোৱাত অৰ্থাৎ ১৫ মাৰ্চৰ পৰা ৬ মে’ৰ ভিতৰত বিজেপিৰ কেন্দ্ৰীয় মুখ্য কাৰ্যালয়ে প্ৰায় ১,৪৭৩ কোটি টকা লাভ কৰিছিল। ইয়াৰ বিপৰীতে, কংগ্ৰেছে তেওঁলোকৰ কেন্দ্ৰীয় আৰু ৰাজ্যিক শাখা মিলি সৰ্বমুঠ ২০৭.১৭ কোটি টকা লাভ কৰাৰ কথা সদৰী কৰে।
অসম, কেৰালা, তামিলনাডু, পশ্চিমবংগ আৰু পুডুচেৰী মিলি কংগ্ৰেছে সৰ্বমুঠ ২৪৮.৫৫ কোটি টকা নিৰ্বাচনী ব্যয় হিচাপে দেখুৱাইছে। ইয়াৰ ভিতৰত ১৪৩ কোটি টকা দলীয় সাধাৰণ প্ৰচাৰত আৰু ১০৫.৫৫ কোটি টকা প্ৰাৰ্থী তথা আনুষংগিক ব্যয়ৰ বাবদ খৰচ কৰা হৈছিল।
বিজেপিৰ উপলব্ধ তথ্য অনুসৰি, দলটোৱে অসম, তামিলনাডু আৰু পুডুচেৰী মিলি মুঠ প্ৰায় ১৫৯.৭ কোটি টকা খৰচ কৰিছিল। ইয়াৰে প্ৰায় ১৩০.৪ কোটি টকা দলীয় সাধাৰণ প্ৰচাৰত আৰু বাকী অংশ প্ৰাৰ্থী তথা আনুষংগিক খৰচৰ বাবদ ব্যয় হৈছিল। অৱশ্যে কেৰালা আৰু পশ্চিমবংগৰ ব্যয়ৰ তথ্য এতিয়াও ৰাজহুৱা হোৱা নাই।
নিৰ্বাচনৰ সময়ছোৱাত দুয়োটা দলৰ আৰ্থিক অৱস্থাতো উল্লেখনীয় পাৰ্থক্য দেখা গৈছিল। ১৫ মাৰ্চত বিজেপিৰ কেন্দ্ৰীয় মুখ্য কাৰ্যালয়ত জমা থকা পুঁজিয়ে ৬ মে’ত ৬,৭২২.৬ কোটি টকাৰ পৰা বৃদ্ধি পাই ৭,৬২৭.২ কোটি টকা হয়গৈ—অৰ্থাৎ ৯০৪.৬ কোটি টকা বৃদ্ধি পায়।
ইয়াৰ বিপৰীতে, কংগ্ৰেছৰ কেন্দ্ৰীয় মুখ্য কাৰ্যালয় আৰু পাঁচটা ৰাজ্যিক শাখাৰ সন্মিলিত পুঁজি নিৰ্বাচনৰ আৰম্ভণিতে থকা প্ৰায় ১৬৯.০৬ কোটি টকাৰ পৰা ৬ মে’ৰ ভিতৰত হ্ৰাস পাই প্ৰায় ১০৩.২ কোটি টকা হয়গৈ—অৰ্থাৎ প্ৰায় ৬৫.৮৬ কোটি টকা হ্ৰাস পায়।
অসমৰ এই পৰিসংখ্যাই ৰাজ্যখনৰ নিৰ্বাচনী প্ৰচাৰত দলসমূহৰ মাজত থকা আৰ্থিক বৈষম্যক স্পষ্ট কৰি তুলিছে; য’ত বিজেপিয়ে দাখিল কৰা ৯৬.২৭ কোটি টকাৰ ব্যয় কংগ্ৰেছে সাধাৰণ দলীয় প্ৰচাৰত কৰা ২২.৬২ কোটি টকাৰ ব্যয়ৰ তুলনাত চাৰিগুণতকৈও অধিক আছিল।
