নতুন দিল্লী
শুকুৰবাৰে মাকাউ অ’পেন ছুপাৰ ৩০০ বেডমিণ্টন প্ৰতিযোগিতাত ভাৰতে মিশ্ৰিত সফলতা লাভ কৰিছিল। পুৰুষৰ একক শাখাত লক্ষ্য সেন আৰু থাৰুণ মন্নেপল্লীয়ে ছেমি ফাইনেলত প্ৰৱেশ কৰাৰ বিপৰীতে শীৰ্ষ ডাবলছৰ যুটি সাত্বিকসাইৰাজ ৰেংকিৰেড্ডী আৰু চিৰাগ শ্বেট্টী প্ৰতিযোগিতাখনৰ পৰা বাহিৰ হয়।
পদক লাভৰ বাবে শক্তিশালী প্ৰতিদ্বন্দ্বী বুলি গণ্য কৰা বিশ্বৰ তিনি নম্বৰ স্থানৰ সাত্বিক আৰু চিৰাগৰ যুটিটোক কোৱাৰ্টাৰ ফাইনেলত মালয়েছিয়ান যুটি চং হন জিয়ান আৰু হাইকাল মহম্মদে ১৪-২১, ১৭-২১ ত পৰাস্ত কৰে৷
ভাৰতীয় যুটিটোৱে নিজৰ ছন্দ বিচাৰিবলৈ বহু সংগ্ৰাম কৰিবলগীয়া হৈছিল আৰু দুয়োখন খেলৰ আৰম্ভণিতে পিছ পৰি থকাৰ পিছত পুনৰ প্ৰত্যাৱৰ্তন কৰিব নোৱাৰি পৰাস্ত হৈছিল আৰু প্ৰতিযোগিতাখনৰ পৰা বাহিৰ হৈছিল৷
আনহাতে, দ্বিতীয় ছিড তথা ২০২২ চনৰ কমনৱেলথ গেমছৰ স্বৰ্ণ পদক বিজয়ী লক্ষ্য সেনে চীনৰ ঝুয়ান চেন জুক ১৮-২১, ২১-১৪, ২১-১৭ ত পৰাস্ত কৰে৷
প্ৰথমখন খেলত পৰাস্ত হোৱাৰ পিছত লক্ষ্য সেনে আক্ৰমণাত্মক নেট প্লে আৰু চোকা স্মেছৰ সৈতে প্ৰত্যাৱৰ্তন কৰি প্ৰতিযোগিতাখন সমতা স্থাপন কৰে ৷ ইয়াৰ পিছত তেওঁ তৃতীয় আৰু নিৰ্ণায়ক খেলখনত জয়লাভ কৰি ছেমি ফাইনেলত স্থান লাভ কৰে ৷ ছেমি ফাইনেলত লক্ষ্যৰ মুখামুখি হ’ব পঞ্চম ছিড ইণ্ডোনেছিয়াৰ আলভি ফাৰহান৷
শেষৰ চাৰিত তেওঁৰ সৈতে ২৩ বছৰীয়া থাৰুণ মন্নেপল্লীও আছে, থাৰুণ মন্নেপল্লীয়ে চীনৰ হু ঝেৰ বিৰুদ্ধে ২১-১২, ১৩-২১, ২১-১৮ ত ৰোমাঞ্চকৰ জয় পঞ্জীয়ন কৰে ৷ বিশ্বৰ ৪৭ নম্বৰ স্থানত থকা মন্নেপল্লীয়ে বিশ্বৰ ৮৭ নম্বৰ স্থানৰ খেলুৱৈগৰাকীক পৰাস্ত কৰিবলৈ ৭৫ মিনিট সময় লাগিল ৷ এইখন তেওঁৰ প্ৰথমখন বি ডব্লিউ এফ ছুপাৰ ৩০০ ছেমি ফাইনেল আছিল৷
মেচখনৰ গতিৰ নাটকীয় পৰিৱৰ্তন ঘটিছিল, প্ৰথমখন ছেটত ভাৰতীয় খেলুৱৈগৰাকীয়ে আধিপত্য বিস্তাৰ কৰিছিল যদিও দ্বিতীয় ছেটত হুৱে শক্তিশালীভাৱে প্ৰত্যাৱৰ্তন কৰিছিল ৷ নিৰ্ণায়ক খেলখনত থাৰুনে ৫-০ ত অগ্ৰগতি লাভ কৰি নিজৰ স্থিৰতা বজাই ৰাখি বেকহেণ্ড কৰ্ণাৰত এটা চমৎকাৰ শ্বট দি মেচখন নিজৰ নামত কৰে ৷ ইয়াৰ পূৰ্বে ১৬ ৰাউণ্ডত মন্নেপালিয়ে হংকঙৰ শীৰ্ষ ছিড লি চেউক য়িউক পৰাস্ত কৰিছিল৷
