নিউয়ৰ্ক
আমেৰিকাৰ ৰাষ্ট্ৰপতি ড’নাল্ড ট্ৰাম্পে টেছলা আৰু স্পেচএক্সৰ চিইঅ’ ইলন মাস্কক বিতাড়নৰ সতৰ্কবাণী জাৰি কৰি কয় যে প্ৰযুক্তিগত ব্যৱসায়ি কোটিপতিগৰাকীয়ে বৈদ্যুতিক বাহন (ইভি) ৰাজসাহায্যৰ অভাৱত “দোকান বন্ধ” কৰি দক্ষিণ আফ্ৰিকালৈ উভতি যোৱাৰ প্ৰয়োজন হ’ব পাৰে।
তেওঁ আৰু মাস্কৰ মাজত ‘ৱান বিগ বিউটিফুল বিল’ক লৈ হোৱা কাজিয়াৰ মাজতে মঙলবাৰে সন্ধিয়া (আমেৰিকাৰ সময় অনুসৰি) তেওঁৰ ট্ৰুথ ছ’চিয়েল প্লেটফৰ্মত ট্ৰাম্পে এই সতৰ্কবাণী প্ৰদান কৰে।
"ইলন মাস্কে মোক ৰাষ্ট্ৰপতি পদৰ বাবে ইমান শক্তিশালীভাৱে সমৰ্থন কৰাৰ বহু আগতেই জানিছিল যে মই ইভি মেণ্ডেটৰ তীব্ৰ বিৰোধী। ই হাস্যকৰ, আৰু মোৰ প্ৰচাৰৰ সদায় এটা ডাঙৰ অংশ আছিল। বৈদ্যুতিক বাহন ঠিকেই আছে, কিন্তু সকলোৱে এনে এখন গাড়ীৰ মালিক হ'বলৈ বাধ্য কৰাটো হ'ব নালাগে। ইলনে এতিয়ালৈকে ইতিহাসৰ যিকোনো মানুহতকৈ বেছি ৰাজসাহায্য লাভ কৰিছে, আৰু ৰাজসাহায্য অবিহনে ইলনে হয়তো দোকান বন্ধ কৰি দক্ষিণ আফ্ৰিকালৈ উভতি যাব লাগিব পাৰে।" ট্ৰাম্পে ট্ৰুথ ছ’চিয়েলত লিখিছে।
"আৰু ৰকেট লঞ্চ, চেটেলাইট, বাবৈদ্যুতিক বাহন উৎপাদন নাথাকিব, আৰু আমাৰ দেশখনে বিশাল পৰিমানৰ ধন ৰাহি কৰিব। ড'জে (চৰকাৰী দক্ষতা বিভাগ) হয়তো এইটো ভালকৈ চিন্তা কৰা উচিত? বৃহৎ ধনৰ সঞ্চয় কৰিব পৰা হ'ব!!!" আমেৰিকাৰ ৰাষ্ট্ৰপতিয়ে আৰু কয়।
ট্ৰাম্পে মাস্কক চৰকাৰী দক্ষতা বিভাগৰ মুৰব্বী নিযুক্তি দিছিল।
ইফালে, অজনপ্ৰিয় বিধেয়কখন সমৰ্থন কৰা সাংসদসকলক পদত্যাগ কৰাৰ হুংকাৰ দিছে মাস্কে।
মে’ মাহলৈকে ট্ৰাম্পৰ ৰাষ্ট্ৰপতিৰ উপদেষ্টা হিচাপে কৰ্মৰত মাস্কে এক্সত এটা পোষ্টত কয় যে, "চৰকাৰী খৰচ কমোৱাৰ প্ৰতিশ্ৰুতি দি নিৰ্বাচনী প্ৰচাৰ চলোৱা আৰু তাৰ পিছতেই ইতিহাসৰ আটাইতকৈ ডাঙৰ ঋণ বৃদ্ধিৰ বাবে তৎক্ষণাত ভোট দিয়া কংগ্ৰেছৰ প্ৰতিজন সদস্যই লাজত মূৰ তল কৰি থ’ব লাগে।"
তেওঁ লগতে কয় যে, "আৰু যদিহে এই পৃথিৱীত মই শেষ কামটোৱেই কৰোঁ তেন্তে তেওঁলোকে অহা বছৰ প্ৰাথমিকতা হেৰুৱাব।"
মাস্কে লগতে সকীয়াই দিয়ে যে যদিহে সাংসদসকলে ট্ৰাম্পৰ খৰচৰ বিধেয়কখন ছিনেটত গৃহীত কৰে তেন্তে তেওঁ এটা নতুন দল -- আমেৰিকান পাৰ্টি -- আৰম্ভ কৰিব।
মঙ্গলবাৰ আমেৰিকাৰ ছিনেটে ৰাষ্ট্ৰপতি ট্ৰাম্পৰ বৃহৎ কৰ কৰ্তন আৰু ব্যয় বিধেয়কখন সংকীৰ্ণভাৱে আগবঢ়াই নিয়ে, যিয়ে আগন্তুক ৪ জুলাইৰ ৰিচেছৰ পূৰ্বে এই আইনখন গৃহীত কৰাৰ দিশত এক গুৰুত্বপূৰ্ণ প্ৰক্ৰিয়াগত পদক্ষেপ গ্ৰহণ কৰে।
আনুষ্ঠানিকভাৱে ৱান বিগ বিউটিফুল বিল এক্ট শীৰ্ষক ৯৪০ পৃষ্ঠাৰ এই বিধেয়কখনে শনিবাৰে গভীৰ নিশা ৫১-৪৯ৰ প্ৰক্ৰিয়াগত ভোটত অনুমোদন জনোৱাৰ ফলত আনুষ্ঠানিক বিতৰ্কৰ মঞ্চ তৈয়াৰ হয়। এই বিধেয়কখনৰ লক্ষ্য হৈছে ২০১৭ চনৰ কৰ কৰ্তনৰ সময়সীমা বৃদ্ধি কৰা, অন্যান্য কৰ কৰ্তন কৰা আৰু সামৰিক আৰু সীমান্ত সুৰক্ষা ব্যয় বৃদ্ধি কৰা, একে সময়তে মেডিকেড, ফুড ষ্টাম্প, নবীকৰণযোগ্য শক্তি আৰু অন্যান্য সমাজ কল্যাণমূলক কাৰ্যসূচীত গভীৰ কৰ্তনৰ জৰিয়তে ৰাজহৰ লোকচান ক্ষতিপূৰণ কৰা।
