নতুন দিল্লী
ভাৰতত নিযুক্ত আমেৰিকাৰ ৰাষ্ট্ৰদূত ছাৰ্জিঅ’ গ'ৰ আৰু আমেৰিকাৰ কনছুল জেনেৰেল লা'ৰা উইলিয়ামছে হায়দৰাবাদত ভাৰতৰ আগশাৰীৰ উদ্যোগপতিসকলৰ সৈতে এক ঘূৰণীয়া মেজমেল বৈঠকৰ আয়োজন কৰে। দুয়োখন দেশৰ মাজৰ বাণিজ্যিক সম্পৰ্ক অধিক শক্তিশালী কৰা, অত্যাধুনিক প্ৰযুক্তিৰ যোগান-শৃংখলা সুৰক্ষিত কৰা আৰু আমেৰিকা-ভাৰতৰ বাণিজ্যিক সহযোগিতা বিস্তাৰ কৰাই এই বৈঠকৰ মূল লক্ষ্য আছিল।
আমেৰিকাৰ স্বাধীনতাৰ ২৫০সংখ্যক বৰ্ষপূৰ্তি উপলক্ষে সোমবাৰে অনুষ্ঠিত এই নৈশভোজ অনুষ্ঠানত প্ৰতিৰক্ষা উৎপাদন, ছেমিকণ্ডাক্টৰ, ঔষধ উদ্যোগ আৰু প্ৰযুক্তি খণ্ডৰ কেইবাগৰাকীও শীৰ্ষস্থানীয় উদ্যোগপতি আৰু কাৰ্যবাহী বিষয়াই অংশগ্ৰহণ কৰে। দক্ষিণ ভাৰতত দুয়োখন দেশৰ মাজত গ্ৰহণ কৰা কৌশলগত নীতিসমূহক বাস্তৱিক ব্যৱসায়িক বিনিয়োগলৈ ৰূপান্তৰ কৰাৰ ক্ষেত্ৰত অনুষ্ঠানটোৱে গুৰুত্বপূৰ্ণ ভূমিকা পালন কৰে বুলি হায়দৰাবাদস্থিত আমেৰিকাৰ কনছুল জেনেৰেলে এক বিবৃতিত প্ৰকাশ কৰিছে।
ৰাষ্ট্ৰদূত ছাৰ্জিঅ’ গ'ৰে কয় যে, আমেৰিকা আৰু ভাৰত বহুদিন ধৰি কৌশলগত সহযোগী হিচাপে কাম কৰি আহিছে। তেওঁ কয়, "এনেধৰণৰ বৈঠকে প্ৰমাণ কৰে যে, আমেৰিকা-ভাৰতৰ অংশীদাৰিত্ব কেৱল কৌশলগত সহযোগিতাতে সীমাবদ্ধ হৈ থকা নাই। এতিয়া ই প্ৰতিৰক্ষা, প্ৰযুক্তি, জীৱন বিজ্ঞান আৰু মহাকাশকে ধৰি বিভিন্ন ক্ষেত্ৰত সহযোগিতাৰ এক সুদৃঢ় ব্যৱস্থালৈ ৰূপান্তৰিত হৈছে। এই সহযোগিতাৰ মূল ভেটি হৈছে দুয়োখন দেশৰ মাজত দীৰ্ঘদিন ধৰি গঢ় লৈ উঠা ব্যৱসায়িক অংশীদাৰিত্ব, যি আপোনালোকৰ বহুতৰে সহযোগিতাত স্তৰে স্তৰে শক্তিশালী হৈছে।"
ৰাষ্ট্ৰদূত গ'ৰে সমগ্ৰ তেলেংগানা, অন্ধ্ৰ প্ৰদেশ আৰু ওড়িশাৰ ব্যৱসায়িক নেতাসকলক বিনিয়োগ, যোগান শৃংখলৰ অংশীদাৰিত্ব আৰু বজাৰত প্ৰৱেশৰ প্ৰত্যক্ষ বাহন হিচাপে ট্ৰাষ্ট ইনিচিয়েটিভ, পেক্স চিলিকা, আমেৰিকা-ভাৰত কম্পেক্ট, আৰু আমেৰিকা-ভাৰত কৌশলগত খনিজ পুনৰুদ্ধাৰ পদক্ষেপৰ দৰে নীতিগত কাঠামোৰ সুবিধা ল’বলৈ উৎসাহিত কৰে।
বিবৃতিটোত লগতে কোৱা হয় যে, এই বৈঠকে দুয়োখন দেশৰ বজাৰত অধিক প্ৰৱেশাধিকাৰ নিশ্চিত কৰা, প্ৰতিৰক্ষা উদ্যোগত যৌথ উৎপাদন আৰু সহযোগিতা গভীৰ কৰা আৰু আমেৰিকা-ভাৰতৰ অৰ্থনৈতিক অংশীদাৰিত্বৰ পৰা যাতে বাস্তৱ আৰু দৃশ্যমান সুফল লাভ কৰিব পৰা যায়, সেই ক্ষেত্ৰত দুয়োখন দেশৰ দৃঢ় প্ৰতিশ্ৰুতি পুনৰ স্পষ্ট কৰি তুলিছে।
