বাজেট অধিৱেশনৰ প্ৰথম দিনাই বিধানসভাত উত্তপ্ত পৰিস্থিতিঃ বিদ্যুৎ, শিক্ষা আৰু অনুপ্ৰৱেশৰ ইছ্যুত বিৰোধীৰ ৱাকআউট
আৱাজ - দ্য ভইচ ব্যুৰ’
অসম বিধানসভাৰ বহু প্ৰত্যাশিত বাজেট অধিৱেশনৰ প্ৰথমটো দিনতেই সদনৰ মজিয়াত সৃষ্টি হয় এক উত্তপ্ত পৰিস্থিতিৰ। ৰাজ্যখনৰ কেইবাটাও জলন্ত সমস্যাৰ ওপৰত সৰৱ হোৱা বিৰোধীয়ে উত্থাপন কৰা তিনিটাকৈ সভা স্থগিত ৰখা প্ৰস্তাৱ অধ্যক্ষই নাকচ কৰাৰ লগে লগেই সদনত সৃষ্টি হয় তীব্ৰ প্ৰতিবাদৰ। পৰিস্থিতি এনে পৰ্যায় পায়গৈ যে সমগ্ৰ বিৰোধী পক্ষই ক্ষোভত সদন ত্যাগ কৰিবলৈ বাধ্য হয়।
সোমবাৰে অসম বিধানসভাত অধ্যক্ষই বিভিন্ন বিষয়ৰ ওপৰত উত্থাপন কৰা তিনিটাকৈ সভা স্থগিত ৰখা প্ৰস্তাৱ (Adjournment Motions) নাকচ কৰাৰ পিছতে কংগ্ৰেছ, AIUDF, ৰাইজৰ দল আৰু TMC-ক লৈ গঠিত সমগ্ৰ বিৰোধী পক্ষই একেলগে সদন ত্যাগ কৰে।
বাজেট অধিৱেশনৰ প্ৰথম দিনাই বিৰোধী দলৰ দলপতি তথা কংগ্ৰেছ নেতা ৱাজেদ আলী চৌধুৰীয়ে অনিয়মীয়া বিদ্যুৎ যোগানৰ সন্দৰ্ভত এক সভা স্থগিত ৰখা প্ৰস্তাৱ উত্থাপন কৰে। তেওঁ কয়, "এই প্ৰচণ্ড গৰমৰ মাজত সঘনাই হোৱা বিদ্যুৎ কৰ্তনৰ ফলত সাধাৰণ ৰাইজে হাৰাশাস্তি ভুগিবলগীয়া হৈছে। চৰকাৰে দাবী কৰাৰ দৰে ২৪ ঘণ্টাই বিদ্যুৎ যোগান ধৰা হোৱা নাই। এয়া এক জৰুৰী পৰিস্থিতি, সেয়েহে আন সকলো কাম একাষৰীয়া কৰি ইয়াৰ ওপৰত এক বিশদ আলোচনাৰ প্ৰয়োজন।"
ৰাইজৰ দলৰ বিধায়ক অখিল গগৈয়ে যোৱা চাৰি বছৰত চৰকাৰী বিদ্যালয়সমূহত ছাত্ৰ-ছাত্ৰীৰ নামভৰ্তিৰ হাৰ হ্ৰাস পোৱাৰ বিষয়টোলৈ সদনৰ দৃষ্টি আকৰ্ষণ কৰে। তেওঁ কয়, "যোৱা চাৰি বছৰত চৰকাৰী আৰু প্ৰাদেশীকৃত বিদ্যালয়সমূহত ২৫,৬৭,৭৯৩ গৰাকী ছাত্ৰ-ছাত্ৰী হ্ৰাস পাইছে। কেন্দ্ৰীয় শিক্ষা মন্ত্ৰ্যালয়ৰ এক প্ৰতিবেদনত এই তথ্য উল্লেখ কৰা হৈছে।" গগৈয়ে লগতে কয় যে নামভৰ্তিৰ হাৰ হ্ৰাস পোৱাক লৈ কেন্দ্ৰই ৰাজ্যৰ শিক্ষা বিভাগক বাৰে বাৰে সকীয়াই দি ব্যৱস্থা গ্ৰহণ কৰিবলৈ কৈছিল, কিন্তু কোনো শুধৰণিমূলক ব্যৱস্থা গ্ৰহণ কৰা নহ'ল। "আমাৰ শিক্ষা বিভাগ এতিয়া বিপদত। শিক্ষা খণ্ডটোক ৰক্ষা কৰিবলৈ আন সকলো কাৰ্যসূচী বন্ধ কৰি এই সমস্যাৰ বিষয়ে আলোচনা কৰিবলৈ মই আপোনাক (অধ্যক্ষক) অনুৰোধ জনাইছো," তেওঁ লগতে কয়।
আনহাতে, AIUDFৰ বিধায়ক মজিবুৰ ৰহমানে কয় যে শেহতীয়া মাহবোৰত বহু লোকক অবৈধভাৱে দেশত প্ৰৱেশ কৰা বুলি অভিযোগ তুলি বাংলাদেশলৈ ঘূৰাই পঠিওৱা হৈছে। তেওঁ কয়, "যদি তেওঁলোক সঁচাকৈয়ে অনুপ্ৰৱেশকাৰী, তেন্তে ঠিকেই আছে। কিন্তু বহু ক্ষেত্ৰত প্ৰকৃত ভাৰতীয় নাগৰিকক ঘূৰাই পঠিওৱা হৈছে আৰু 'ন' মেনছ লেণ্ড'ত অৱহেলিত অৱস্থাত এৰি দিয়া হৈছে। এয়া মানৱ অধিকাৰৰ চৰম উলংঘন, লগতে ইয়াত আন্তঃৰাষ্ট্ৰীয় আইনো ভংগ কৰা হৈছে।" গোৱালপাৰাৰ ডিটেনচন কেম্পৰ পৰা বহু আৱাসী নিৰুদ্দেশ হোৱা বুলি উল্লেখ কৰি ৰহমানে এই বিষয়টোৰ ওপৰত জৰুৰী আলোচনাৰ দাবী জনায়।
আটাইকেইটা প্ৰস্তাৱ শুনাৰ পিছত অধ্যক্ষ ৰঞ্জিৎ কুমাৰ দাসে কয়: "মই কংগ্ৰেছ আৰু ৰাইজৰ দলৰ পৰা দুটাকৈ সভা স্থগিত ৰখা জাননী লাভ কৰিছো। যদিও এইবোৰ জনসাধাৰণৰ সমস্যাৰ সৈতে জড়িত, তথাপি এইবোৰ জৰুৰী প্ৰকৃতিৰ নহয়।" তেওঁ কয় যে যিহেতু সদন এক দীঘলীয়া বাজেট অধিৱেশনৰ বাবে মিলিত হৈছে, সেয়েহে এই বিষয়বোৰ আন যিকোনো প্ৰক্ৰিয়াৰ জৰিয়তে আলোচনা কৰিব পৰা যাব।
দাসে লগতে কয়, "AIUDF-ৰ জাননীখন নিৰ্ধাৰিত সময়ৰ উকলি যোৱাৰ পিছতহে লাভ কৰা হৈছিল। তদুপৰি, ৫৪ নং নিয়মৰ জৰিয়তেও একেটা বিষয় উত্থাপন কৰা হৈছে। সেয়েহে একেটা বিষয়ৰ ওপৰত সভা স্থগিত ৰখা প্ৰস্তাৱৰ কোনো প্ৰয়োজন নাই। সেয়ে মই আটাইকেইখন জাননী নাকচ কৰিছো।"
ইয়াৰ প্ৰতিবাদত সকলো বিৰোধী সদস্যই শ্ল’গান দি সদনৰ মজিয়া লৈ ওলাই আহে আৰু প্লেকাৰ্ড প্ৰদৰ্শন কৰে। "২৭৫ নং নিয়ম অনুসৰি আপোনালোকে সদনৰ ভিতৰত প্লেকাৰ্ড দেখুৱাব নোৱাৰে আৰু শ্ল’গান দিব নোৱাৰে," অধ্যক্ষই প্ৰতিবাদকাৰী সদস্যসকলক কয়। ইয়াৰ পিছতে সদনৰ মাৰ্শ্বালসকলে বিৰোধী সদস্যসকলৰ পৰা প্লেকাৰ্ডসমূহ কাঢ়ি লয়।
এই সমগ্ৰ ঘটনাপ্ৰৱাহৰ পিছত ক্ষুব্ধ হৈ সকলো বিৰোধী সদস্যই কিছু সময়ৰ বাবে সদন ত্যাগ কৰে। অৱশ্যে কিছু সময়ৰ পাছত তেওঁলোক পুনৰ সদনলৈ ঘূৰি আহে।
